ប្រែសម្រួល៖សហការី
នៅថ្ងៃសៅរ៍ ថ្ងៃទី ២ ខែធ្នូ Gina Raimondo រដ្ឋមន្ត្រីក្រសួងពាណិជ្ជកម្មអាមេរិកបានជំរុញសមាជិកសភា Silicon Valley និងសម្ព័ន្ធមិត្តអាមេរិកឲ្យឈប់នាំចេញឧបករណ៍អេឡិចត្រូនិក និងបច្ចេកវិទ្យាទំនើបៗទៅកាន់ប្រទេសចិនព្រោះវាអាចបង្កនូវហានិភ័យដល់សន្តិសុខជាតិ។
ថ្លែងនៅក្នុងវេទិកាសន្តិសុខជាតិប្រចាំឆ្នាំនៅ Simi Valley រដ្ឋកាលីហ្វ័រញ៉ា Raimondo បានចាត់ទុកក្រុងប៉េកាំងថាជា “ការគំរាមកំហែងដ៏ធំមិនធ្លាប់មានពីមុនមក” ថែមទាំងសង្កត់ធ្ងន់ថា “ចិនមិនមែនជាមិត្តរបស់យើងនោះទេ” ។
ទំនាក់ទំនងរវាងប្រទេសដែលមានសេដ្ឋកិច្ចកំពូលទាំងពីរនៅលើពិភពលោកត្រូវបានជាប់គាំងដោយសារតែការប្រកួតប្រជែងផ្នែកពាណិជ្ជកម្ម និងភូមិសាស្ត្រនយោបាយដ៏ចម្រូងចម្រាស់រហូតមកទល់នឹងពេលនេះ។
កាលពីខែតុលា Raimondo បានធ្វើការរឹតបន្តឹងជាបន្តបន្ទាប់ចំពោះការនាំចេញបន្ទះឈីបដែលមាន
បច្ចេកវិទ្យាកម្រិតខ្ពស់ទៅកាន់ប្រទេសចិន រួមទាំងឧបករណ៍សម្រាប់ប្រើក្នុងការអភិវឌ្ឍបញ្ញាសិប្បនិម្មិត (AI) ដើម្បីជៀសវាងយកទៅប្រើប្រាស់សម្រាប់ក្នុងគោលដៅយោធារបស់ប្រទេសចិន។
“ខ្ញុំដឹងថានាយកប្រតិបត្តិរបស់ក្រុមហ៊ុនបន្ទះឈីបមួយចំនួនមានការមិនពេញចិត្តជាមួយខ្ញុំនៅពេលដែលខ្ញុំធ្វើដូច្នេះដោយសាខ្ញុំធ្វើឲ្យអ្នកបាត់បង់ប្រាក់ចំណូល។ វិធានការរបស់ខ្ញុំគឺធ្វើឡើងដើម្បីការពារអាយុជីវិតប្រទេសជាតិនិងព្យាយាមរក្សាការពារសន្តិសុខជាតិរបស់យើងដែលមានសារសំខាន់ជាងប្រាក់ចំណូលរបស់អ្នក”។
សារព័ត៌មាន “Newsflash បានដកស្រង់សម្តី Raimondo ថា រក្សាការពារប្រជាធិបតេយ្យគឺជាយុទ្ធសាស្ត្រដ៏ល្អសម្រាប់ស្ថិរភាបអាជីវកម្មរបស់អ្នក។ ពង្រឹងនីតិរដ្ឋនៅជុំវិញពិភពលោកគឺជាវិធានដ៏ល្អសម្រាប់ការអភវឌ្ឍអាជីវកម្មរបស់អ្នក”។
Raimondo បានកត់សម្គាល់ថា Nvidia ដែលជាក្រុមហ៊ុនផលិតបន្ទះសៀគ្វីដ៏ទំនើបបំផុតដែលជាតម្រូវការសម្រាប់ផលិត AI ជំនាន់ចុងក្រោយបង្អស់ត្រូវបានក្រសួងពាណិជ្ជកម្មកំណត់ឲ្យផលិតក្នុងបរិមាណទាបបំផុតដើម្បីជៀសវាងការនាំចេញទៅកាន់ប្រទេសចិន។
គាត់ទទួលស្គាល់ស្នាដៃរបស់ “ឧស្សាហកម្មផលិតឧបករណ៍” ប៉ុន្តែគាត់បានលើកឡើងថាផលិតកម្មនៃឧបករណ៍ទាំងនោះមិនមែនជាផលិតភាពនោះទេ”។
“ជារៀងរាល់ថ្ងៃចិនបាននិងកំពុងព្យាយាមរកវិធីគេចចេញពីការគ្រប់គ្រងរបស់យើងក្នុងការនាំចេញឧបករណ៍បច្ចេកវិទ្យាទាំងនោះមានន័យថារាល់ថ្ងៃនៅរៀងរាល់វិនាទីយើងត្រូវរឹតបន្តឹងជាមួយនឹងសម្ព័ន្ធមិត្តរបស់យើងក្នុងការគ្រប់គ្រងឲ្យកាន់តែមានប្រសិទ្ធភាពទ្វេដង ” ។
Raimondo បានសង្កត់ធ្ងន់ថាស្ថាប័នរបស់នាងត្រូវការមូលនិធិឲ្យបានច្រើនថែមទៀតដើម្បីអនុវត្តវិធានការនេះប្រកបដោយប្រសិទ្ធភាពបំផុត។
គាត់បាននិយាយថា៖”ខ្ញុំមានថវិកាត្រឹមតែ ២០០ លានដុល្លារទេបើធៀបនឹងថ្លៃយន្តហោះចម្បាំងគឺស្មើនិងយន្តហោះចម្បាំងពីរបីគ្រឿងតែប៉ុណ្ណោះសូមជួយផ្តល់មូលនិធិសម្រាប់គាំទ្រកិច្ចប្រតិបត្តិការនេះយើងកំពុងត្រូវការមូលនិធិបន្ថែម”ខ្ញុំជឿថាយើងអាចធ្វើបាន យើងត្រូវធ្វើរឿងមួយនេះដើម្បីការពារប្រទេសជាតិរបស់យើង”។
Raimondo បានចង្អុលបង្ហាញថា “អាមេរិកជាប្រទេសឈានមុខគេនៅលើពិភពលោកក្នុងវិស័យបញ្ញាសិប្បនិមិត្តហើយអាមេរិកក៏នាំមុខគេក្នុងការរចនាគ្រឿងអេឡិចត្រូនិកបច្ចេកវិទ្យាកម្រិតខ្ពស់ផងដែរ” Raimondo បានបញ្ជាក់យ៉ាងដូច្នេះ៕
ប្រភព៖ AFP