ប្រែសម្រួល៖សហការី
ក្រុងវ៉ាស៊ីនតោន បានជូនដំណឹងដល់អ៊ីស្រាអែលថាក្នុងរយ:ពេលប៉ុន្មានសប្តាហ៍ខាងមុខនេះ រដ្ឋបាលរបស់លោក បៃឌិននឹងដាក់បម្រាមទិដ្ឋាការលើអ្នកតាំងលំនៅជ្រុលនិយមអ៊ីស្រាអែល ដែលបានប្រើអំពើហិង្សាលើជនស៊ីវិលប៉ាឡេស្ទីននៅតំបន់ West Bank ដែលកាន់កាប់ដោយប៉ាឡេស្ទីន។
ក្នុងជំនួបរបស់គាត់ជាមួយនាយករដ្ឋមន្ត្រីអ៊ីស្រាអែល លោក Benjamin Netanyahu និងគណៈរដ្ឋមន្ត្រីរបស់គាត់ រដ្ឋមន្ត្រីការបរទេសអាមេរិក លោក Antony Blinken បានប្រាប់ពួកគេឲ្យដឹងថា សហរដ្ឋអាមេរិកនឹងចាត់វិធានការប្រឆាំងនឹងអ្នកតាំងទីលំនៅជ្រុលនិយមអ៊ីស្រាអែលមួយចំនួននៅតំបន់ West Bank ។
តំបន់ West Bank ជាទឹកដីដែលប៉ាឡេស្ទីនស្វែងរកអធិបតេយ្យភាពក្នុងនាមជារដ្ឋឯករាជ្យមួយត្រូវបានជួបប្រទះនូវការកើនឡើងនៃអំពើហិង្សានៅក្នុងប៉ុន្មានខែថ្មីៗនេះ នៅចំពេលដែលមានការពង្រីកនូវការតាំងទីលំនៅរបស់ជនជាតិជ្វីហ្វបន្ថែមទៀតនិងការជាប់គាំងជិតមួយទសវត្សរ៍ក្នុងការបង្កើតសន្តិភាពដែលគាំទ្រដោយសហរដ្ឋអាមេរិក។
អំពើហិង្សាដែលកាន់តែកើនឡើងក្នុងកម្រិតខ្ពស់ជាង ១៥ ឆ្នាំមុននៅឆ្នាំនេះបានកើនឡើងបន្ថែមទៀតបន្ទាប់ពីអ៊ីស្រាអែលបានធ្វើសង្រ្គាមជាថ្មីមួយនៅក្នុងតំបន់ហ្គាហ្សាដែលជាការឆ្លើយតបទៅនឹងក្រុមសកម្មប្រយុទ្ធប៉ាឡេស្ទីន Hamas ដែលបានបញ្ចេញថ្វីដៃដ៏សាហាវបំផុតមិនធ្លាប់មាននៅក្នុងប្រវត្តិសាស្រ្តរបស់អ៊ីស្រាអែលកាលពីថ្ងៃទី ៧ ខែតុលាកន្លងមក។
នៅពេលសាកសួរដោយអ្នកសារព័ត៌មាន លោក Eylon Levy អ្នកនាំពាក្យរដ្ឋាភិបាលអ៊ីស្រាអែលបាននិយាយថា លោកមិនមានការធ្វើអត្ថាធិប្បាយលើបញ្ហានេះទេ ប៉ុន្តែលោកបាននិយាយថា អ៊ីស្រាអែលបានថ្កោលទោសយ៉ាងម៉ឺងម៉ាត់ចំពោះអំពើទុច្ចរិត ឬការប៉ុនប៉ងណាមួយរបស់សកម្មប្រយុទ្ធប៉ាឡេស្ទីន Hamas ដែលពួកគេបានលេងសើចជាមួយនឹងច្បាប់។
សហរដ្ឋអាមេរិកមានការព្រួយបារម្ភជុំវិញការកើនឡើងនៃអំពើហិង្សានៅតំបន់ West Bank ដោយបេ្តជ្ញាថាត្រូវតែបញ្ឈប់អំពើហិង្សានៅតំបន់ West Bank ។ ប្រធានាធិបតីសហរដ្ឋអាមេរិលោក Joe Biden ត្រូវបាន Washington Post ចុះផ្សាយនៅក្នុងអត្ថបទរបស់ខ្លួនកាលពីថ្ងៃទី ១៨ ខែវិច្ឆិកាក្រោមចំណងជើងថាការគំរាមចាត់វិធានការប្រឆាំងនឹងអ្នកតាំងលំនៅជ្រុលនិយមអ៊ីស្រាអែលរបស់លោក Joe Biden ។
“ខ្ញុំបាននិយាយជាមួយមេដឹកនាំអ៊ីស្រាអែលដោយសង្កត់ធ្ងន់ទៅលើអំពើហិង្សាជ្រុលនិយមប្រឆាំងនឹងជនជាតិប៉ាឡេស្ទីននៅតំបន់ West Bank ត្រូវតែបញ្ឈប់ ហើយអ្នកដែលប្រព្រឹត្តអំពើហិង្សាត្រូវតែទទួលខុសត្រូវតាមច្បាប់។ សហរដ្ឋអាមេរិកបានត្រៀមចាត់វិធានការដោយចេញបម្រាមទិដ្ឋាការប្រឆាំងនឹងពួកជ្រុលនិយមដែលបានវាយប្រហារមកលើជនស៊ីវិល។
មន្ត្រីក្រសួងការបរទេស ដែលនិយាយក្នុងលក្ខខណ្ឌមិនបញ្ចេញឈ្មោះព្រោះវាជាបញ្ហារសើប បាននិយាយថា ទីក្រុងវ៉ាស៊ីនតោន ចង់ឲ្យអ៊ីស្រាអែលកាត់ទោសជនល្មើស ប៉ុន្តែនៅមិនទាន់ឃើញវិធានការបែបនេះនៅឡើយទេ។ មន្ត្រីរូបនេះបាននិយាយថាមានការហាមប្រាមទិដ្ឋាការអាចនឹងកើតមានក្នុងប៉ុន្មានសប្តាហ៍ខាងមុខនេះ។
បើតាមតួលេខរបស់អង្គការសហប្រជាជាតិបានបង្ហាញថា ការវាយប្រហារប្រចាំថ្ងៃបានកើនឡើងទ្វេដង ចាប់តាំងពីក្រុមហាម៉ាសបានសម្លាប់ជនជាតិអ៊ីស្រាអែលចំនួន ១,២០០ នាក់ និងចាប់ជាចំណាប់ខ្មាំងប្រហែល ២៤០ នាក់។ ចាប់តាំងពីពេលនោះមក អ៊ីស្រាអែលបានទម្លាក់គ្រាប់បែក និងចូលឈ្លានពានតំបន់ហ្គាហ្សា ដោយបានសម្លាប់មនុស្សជាង ១៥,០០០ នាក់៕
ប្រភព៖ Reuters