ប្រែសម្រួល៖សហការី
លោក Liu បានរៀបការនៅក្នុងប្រទេសចិនគាត់បានប្តឹងក្រុមហ៊ុនធានារ៉ាប់រងពីបទខកខានមិនអនុវត្តតាមគោលការណ៍របស់ក្រុមហ៊ុន “ធានារ៉ាប់រងសម្រាប់ចំណងអាពាហ៍ពិពាហ៍” ដែលគាត់បានបង់ប្រាក់សម្រាប់អាពាហ៍ពិពាហ៍អស់ចំនួន ៩,៩៩៥ យន់ ស្មើនឹង១,៤០០ ដុល្លារអាមេរិកធ្វើឲ្យមានការគាំទ្រយ៉ាងខ្លាំងនៅលើបណ្តាញសង្គមចិន។
បុរសម្នាក់ឈ្មោះLiu Xiaoming មកពីខេត្ត Sichuan ភាគនិរតីនៃប្រទេសចិន បានទិញបណ្ណធានារ៉ាប់រងសម្រាប់ចំណងអាពាហ៍ពិពាហ៍កាលពីខែមីនា ឆ្នាំ ២០១៨ ដើម្បីផ្គាប់ចិត្តមិត្តស្រីរបស់គាត់។
អនាគតគូស្វាមីភរិយាមួយគូនេះបានជួបគ្នាដំបូងកាលនៅរៀនក្នុងវិទ្យាល័យ ហើយបានទំនាក់ទំនងស្នេហារវាងពួកគេទាំងពីរហើយក៏បានចាប់ផ្តើមបង្កើតភាពស្និទ្ធស្នាលកាន់តែផ្អែមល្ហែមឡើងនៅពេលដែលពួកគេទាំងពីរនាក់បានចូលរៀននៅសកលវិទ្យាល័យ។
បើយោងតាមគោលការណ៍របស់ក្រុមហ៊ុនធានារ៉ាប់រងបានកំណត់ថា ប្រសិនបើគូស្នេហ៍រៀបការចាប់ពី ៣ ទៅ ១០ ឆ្នាំបន្ទាប់ពីបានទិញបណ្ណធានារ៉ាប់រង ជាពិសេសនៅចន្លោះខែមីនា ឆ្នាំ ២០២១ដល់ខែមីនា ឆ្នាំ ២០២៨ ពួកគេនឹងត្រូវទទួលបានអត្ថប្រយោជន៏ជាទឹកប្រាក់ចំនួន ៩,៩៩៥ យន់។
តែបន្ទាប់ពីគូស្នេហ៍ទាំងពីរបានភ្ជាប់ពាក្យរួចមកនៅថ្ងៃទី ១ ខែធ្នូ ឆ្នាំ ២០២២ ហើយបានបញ្ជូនឯកសារស្នើសុំការទូទាត់ប្រាក់ដែលជាអត្ថប្រយោជន៏ស្របតាមគោលការណ៍របស់ក្រុមហ៊ុននោះ ក្រុមហ៊ុនធានារ៉ាប់រងបានបដិសេធមិនព្រមធ្វើការទូទាត់ជូនគាត់នោះទេទោះបីជាមានពាក្យបណ្តឹងតវ៉ាជាច្រើនលើកក៏ដោយ។
លោក Liu បានប្រាប់សារព័ត៌មាន Jimu News ថាអ្នកប្រើប្រាស់ជាច្រើនបានទិញ “បណ្ណធានារ៉ាប់រងសម្រាប់ចំណងអាពាហ៍ពិពាហ៍” ហើយការផ្សព្វផ្សាយដោយផ្ទាល់ចេញពីក្រុមហ៊ុនបានប្រកាសថាមនុស្សជាង ១៥,០០០ នាក់បានទិញបណ្ណធានារាប់រងសម្រាប់គោលនយោបាយនេះ។
បើយោងតាមគណនី Weibo ដែលប្រើជាផ្លូវការរបស់ក្រុមហ៊ុននៅពេលនោះ បង្ហាញថាការធានារ៉ាប់រងសម្រាប់ចំណងអាពាហ៍ពិពាហ៍ក្នុង ៣ កម្រិតគឺអាចទទួលបាននូវបុព្វលាភចាប់ពី ៩៩ ទៅ ២៩៧ យន់ និងរហូតដល់ ៤៩៥ យន់។
ក្នុងកម្រិត ៩៩ យន់ អតិថិជនត្រូវបង់ប្រាក់ចំនួន ១,៩៩៩ យន់ ប៉ុន្តែ Liu បានជ្រើសរើសសម្រាប់កម្រិត ៤៩៥ យន់ ដែលជាកម្រិតខ្ពស់បំផុតជាមួយនឹងការទូទាត់ប្រាក់ដល់ទៅ ៩,៩៩៥ យន់។
ដោយមានការខកចិត្តចំពោះការបដិសេធរបស់ក្រុមហ៊ុនធានារ៉ាប់រងក្នុងការទូទាត់ប្រាក់គោលនយោបាយរបស់ខ្លួននោះលោក Liu ក៏បានបញ្ជូនសំណុំរឿងរបស់គាត់ទៅតុលាការ ដើម្បីទាមទារសំណងធានារ៉ាប់រង រួមជាមួយនឹងប្រាក់ពិន័យក្នុងការខកខានធ្វើការទូទាត់។
គាត់បានចាញ់ក្នុងការកាត់ក្តីនៅសាលាដំបូង ដោយសារតែតុលាការសាលាដំបូងបានយល់ស្របជាមួយនឹងមេធាវីការពារក្តីឲ្យក្រុមហ៊ុនថា ចំណងស្នេហាគឺជាទំនាក់ទំនងផ្លូវចិត្តដែលមិនស្ថិតក្នុងវិសាលភាពនៃប្បញ្ញត្តិធានារ៉ាប់រងនោះទេ ហើយកិច្ចសន្យាធានារ៉ាប់រងគឺមិនត្រឹមត្រូវតាមគោលការណ៏នោះទេ។
ដោយមានការមិនពេញចិត្តចំពោះការវិនិច្ឆ័យរបស់សាលាដំបូងលោក Liu បានប្តឹងឧទ្ធរណ៍ទៅតុលាការហិរញ្ញវត្ថុក្នុងទីក្រុងប៉េកាំងទាមទារឲ្យមានការជម្រះក្តីជាលើកទីពីរ។
តុលាការហិរញ្ញវត្ថុបានវាយតម្លៃលើករណីនេះទៅតាមទស្សនៈថ្មីមួយ ដោយបញ្ជាក់ថា ការធានារ៉ាប់រងមិនទាក់ទងនឹង “ទំនាក់ទំនងស្នេហា” ទេ ប៉ុន្តែជាផលប្រយោជន៍ហិរញ្ញវត្ថុដែលអាចកើតឡើងពីការរៀបចំអាពាហ៍ពិពាហ៍ ដែលត្រូវបានចាត់ទុកថាស្របច្បាប់ហើយស្ថិតនៅក្រោមច្បាប់។
លើសពីនេះ គោលការណ៍ជាមូលដ្ឋាននៃអាណត្តិធានារ៉ាប់រងក្រោមគោលការណ៏ដែលគ្របដណ្តប់ដោយកិច្ចសន្យាធានារ៉ាប់រងមានភាពមិនច្បាស់លាស់ហើយជាកាតព្វកិច្ចរបស់ក្រុមហ៊ុនត្រូវតែទទួលខុសត្រូវ។
នៅទីបំផុត តុលាការបានសម្រេចតម្កល់បណ្តឹងឧទ្ធរណ៍របស់លោក Liu ហើយបានបង្គាប់ឲ្យក្រុមហ៊ុនធានារ៉ាប់រងបង់ប្រាក់ជូនគាត់ចំនួន ៩,៩៩៥ យន់។
អារម្មណ៍របស់សាធារណជនបានជម្រុញឲ្យមានការរិះគន់ក្រុមហ៊ុនធានារ៉ាប់រងបើសង្កេតនៅលើអនឡាញឃើញមានការរិះគន់មកលើក្រុមហ៊ុនធានារ៉ាប់រងជាច្រើនដែលត្រូវបានគេបង្ហោះចែករំលែកជាបទពិសោធនៅលើបណ្តាញសង្គមចិន។
អ្នកខ្លះនិយាយថា “ខ្ញុំបានជួបប្រទះរឿងវិវាទផ្ទាល់ខ្លួនជាមួយនឹងក្រុមហ៊ុននេះដោយបញ្ជាក់ថាក្រុមហ៊ុនមិនបានបង់ប្រាក់ធានារ៉ាប់រងសម្រាប់ថ្លៃព្យាបាលមហារីកទេ ហើយអ្នកខ្លះផ្តល់ជាយោបល់ថា “អ្នកត្រូវតែប្តឹងក្រុមហ៊ុនដើម្បីទាមទារសំណង” ។
អ្នកខ្លះសួរថា “តើគាត់គួរតែប្តឹងក្រុមហ៊ុនធានារ៉ាប់រងពីបទរកស៊ីកេងបន្លំដែឬទេ?” អ្នកបន្ទាប់បាននិយាយថា” វាពិតជាអាក្រក់ណាស់!” ៕