ប្រែសម្រួល៖សហការី
![](https://cambodiaflashnews.com/wp-content/uploads/2021/06/top-banner.gif)
បុរសបីនាក់បានមករស់នៅក្នុងប្រទេសសិង្ហបុរីមួយរយៈហើយនៅមុនពេលចាកចេញពីប្រទេសសិង្ហបុរីទៅកាន់ប្រទេសកំណើតរៀងៗខ្លួនវិញពួកគេក៏បានឃុបឃិតគ្នាចូលលួចចិញ្ចៀនពេជ្រមួយវង់មានទំហំ ៣ ការ៉ាត់ដែលដាក់តាំងលក់នៅក្នុងហាងបញ្ចាំឈ្មោះថាLucky Plaza។ ចិញ្ចៀនពេជ្រនោះមានតម្លៃជាង ១៣២,០០០ ដុល្លារសិង្ហបុរីស្មើនឹង ៩៧,៧០០ ដុល្លារអាមេរិក។
បុរសឈ្មោះថា Lu Jingnan ជាជនជាតិចិនមានអាយុ ៤៩ ឆ្នាំត្រូវបានកាត់ទោសឲ្យជាប់ពន្ធនាគាររយៈពេល ២ ឆ្នាំ ៨ ខែ កាលពីថ្ងៃព្រហស្បតិ៍ទី ១៦ ខែវិច្ឆិកា ។ គាត់បានសារភាពកំហុសក្នុងករណីលួចដោយចេតនាដែលមានស្ថានទម្ងន់ទោស។
គាត់បានមកដល់ប្រទេសសិង្ហបុរីកាលពីថ្ងៃទី ១១ ខែកក្កដា ជាមួយនឹងបក្ខពួកជនជាតិចិនឈ្មោះ Luo Yi អាយុ ៥០ ឆ្នាំ និងឈ្មោះ He Yuanlin អាយុ ៥៩ ឆ្នាំ តាមជើងហោះហើរដាច់ដោយឡែកពីគ្នា ដោយមានចេតនាចូលលួចចិញ្ចៀនពេជ្រនៅក្នុងហាងមួយនេះ។
នៅក្នុងថ្ងៃទី ១២ ខែកក្កដា Lu បានទៅហាងបញ្ចាំ ValueMax នៅ Lucky Plaza លើផ្លូវ Orchard ។ គាត់បានសួរតម្លៃនាឡិកា និងចិញ្ចៀនពេជ្រដែលដាក់តាំងលក់នៅក្នុងហាង ហើយអ្នកគ្រប់គ្រងហាងជាស្ត្រីក៏បានបង្ហាញគ្រឿងអលង្ការច្រើនប្រភេទដល់គាត់។
Lu បាននិយាយថាគាត់បានទិញចិញ្ចៀនទម្រង់បែបនេះនៅហុងកុងប៉ុន្តែមានបញ្ហាជាមួយនឹងវិញ្ញាបនបត្រគាត់ថាគាត់ចង់ទិញចិញ្ចៀនពេជ្រនេះឲ្យទៅប្រពន្ធគាត់ទុកជាអនុស្សាវរីយ៏នៅថ្ងៃខួបកំណើតរបស់គាត់។
បន្ទាប់មក Lu បានប្រាប់អ្នកគ្រប់គ្រងហាងថា គាត់នឹងត្រឡប់មកវិញនៅក្រោយពេលដែលបានពិនិត្យសាកមើលជាមួយប្រពន្ធគាត់ពីទម្រង់ចិញ្ចៀនពេជ្រថាតើវាមានទំហំធំសមល្មមឬអត់។
ក្រោយមកនៅថ្ងៃទី ១៦ ខែកក្កដា Lu, He និង Luo បានចូលទៅក្នុងហាង Lucky Plaza ជាមួយគ្នា។ Lu និង Luo ចូលហាង ValueMax មួយទៀតដែលនៅជាប់គ្នាក្នុងខណៈពេលដែលគាត់ដើរលេងនៅខាងក្រៅ ហើយមើលមកខាងក្នុងតាមចន្លោះបន្ទះកញ្ចក់។
Lu និង Luo មិនបានប្រាស្រ័យទាក់ទងគ្នាដោយចំហនៅក្នុងហាងនោះទេ ហើយ Lu បានប្រាប់បុគ្គលិកដូចគ្នាថាគាត់ត្រឡប់ទៅមើលចិញ្ចៀនពេជ្រវិញសិន។
ក្នុងពេលជាមួយគ្នានោះ Luo បាននិយាយទៅកាន់បុគ្គលិកប្រុសម្នាក់អំពីគ្រឿងអលង្ការច្នៃពីមាសនៅខាងផ្នែកផ្សេងក្នុងហាងនោះ។
បុគ្គលិកស្រីនោះបានទៅយកចិញ្ចៀនពេជ្រពីរវង់ពីទូកញ្ចក់ដើម្បីបង្ហាញដល់ Lu ប៉ុន្តែ Lu បាននិយាយថាគាត់កំពុងស្វែងរកចិញ្ចៀនពេជ្រធំជាងនេះពីរទៅបីការ៉ាត់។
គាត់បានអះអាងថាគាត់មានសាច់ប្រាក់ជាង ៥០,០០០ ដុល្លារសិង្ហបុរីបន្ទាប់មកបុគ្គលិកនោះក៏បានទៅយកចិញ្ចៀនពេជ្រទំហំ ៣,០១ ការ៉ាត់បង្ហាញទៅ Lu។
ចិញ្ចៀននេះមានតម្លៃ ១៣២,៤៧៩ ដុល្លារសិង្ហបុរីហើយនៅទីបំផុតក៏ត្រូវគាត់លួចយក។
Lu បានកាន់ចិញ្ចៀននោះហើយប្រាប់អ្នកគ្រប់គ្រងហាងថាគាត់ចាប់អារម្មណ៍ទិញវា។ ទោះជាយ៉ាងណា នាយកប្រតិបត្តិមានការលំបាកក្នុងការស្វែងរកចិញ្ចៀនដែលធំល្មមនឹងចិញ្ចៀននេះណាស់។
បន្ទាប់មក Lu បានសួរអំពីពេជ្រតូចមួយទៀត ដែលស្ត្រីនោះបានយកមកវិញហើយក៏រៀបចំទុកដាក់វិញ។
នៅពេលនេះ Lu មើលទៅ Luo ហើយក៏ងក់ក្បាលជាសញ្ញា។ បន្ទាប់មក Luo បានទៅសួររំខានបុគ្គលិកប្រុសដែលនៅជាមួយគាត់មិនឲ្យដើរចេញពីកន្លែងនោះដើម្បីរារាំងគាត់មិនឲ្យឃើញ Luលួចបន្លំយកពេជនៅពីជ្រុងម្ខាងទៀតនៃហាងនោះ ។
ដោយសារតែបុគ្គលិកស្រីម្នាក់ទៀតកំពុងជាប់រវល់នឹងការរៀបចំពេជ្រតូចៗជាងនោះ Lu បានលួចយកចិញ្ចៀនពេជ្រទំហំ ៣ ការ៉ាត់ដាក់ចូលទៅក្នុងហោប៉ៅឆ្វេងរបស់គាត់ភ្លាមៗតែម្តង។
រួចហើយគាត់ធ្វើជាដើរមើលពេជ្រតូចៗជាងនេះ ហើយក៏ធ្វើជាប្រាប់បុគ្គលិកស្រីថា គាត់សម្រេចចិត្តទិញវាជាជំនួសអាធំវិញ។
ស្ត្រីនោះបានសុំមិត្តរួមការងារឲ្យទុកចិញ្ចៀនពេជ្រមួយវង់ទៀតទៅវិញ ខណៈដែលនាងទៅការិយាល័យខាងក្រោយ ដើម្បីពិនិត្យមើលតម្លៃពេជ្រដែលតូចជាងនេះ ។
នៅក្នុងពេលដែលនាងចាកចេញពីកន្លែងលក់ Lu ក៏បានចាកចេញពីហាងដោយបន្លំយកចិញ្ចៀនមកជាមួយ ហើយ Luo ក៏ចេញទៅផងដែ។
Lu បានជិះតាក់ស៊ីទៅ Woodlands Checkpoint ខណៈពេលដែល Luo និង He បានចាកចេញពីផ្សារទំនើបក្នុងទិសដៅផ្សេងគ្នា។
សកម្មភាពរបស់ពួកគេត្រូវបានថតដោយមេរ៉ាសុវត្ថិភាពក្នុងផ្សារទំនើប និងនៅក្នុងហាង ValueMax។
Lu និង He បានចាកចេញពីសិង្ហបុរីតាមឡានក្រុងតាមច្រក Woodlands នៅថ្ងៃដដែលនោះ ខណៈ Luo បានចាកចេញតាមអាកាសយានដ្ឋាន Changi នៅយប់នោះផងដែរ។
Lu និង He ត្រូវបានប៉ូលិសម៉ាឡេស៊ីចាប់ខ្លួនក្នុងប្រទេសម៉ាឡេស៊ីកាលពីថ្ងៃទី ១៩ ខែកក្កដា ដោយរកឃើញចិញ្ចៀនដែលគាត់លួចបាននៅជាប់នឹងខ្លួនរបស់គាត់។
ជនល្មើសទាំងពីរនាក់នេះត្រូវបានគេធ្វើបត្យាប័នទៅប្រទេសសិង្ហបុរីវិញនៅថ្ងៃបន្ទាប់។
ព្រះរាជអាជ្ញាបានធ្វើការចោទប្រកាន់ពួកគេហើយបានកាត់ទោសដាក់ពន្ធនាគារយ៉ាងហោចណាស់ក្នុងរយៈពេលបីឆ្នាំសម្រាប់ Lu ដោយមានការថ្លឹងថ្លែងលើតម្លៃចិញ្ចៀនពេជ្រដែលគាត់បានលួច និងធាតុផ្សំនៃបទល្មើសដែលជាការគិតទុកជាមុន។
លោក James Chew ព្រះរាជអាជ្ញារងអមសាលាក្តីសាធារណៈបាននិយាយថា ភាគីនីមួយៗបាន
ប្រព្រឹត្តបទល្មើសមានស្ថានទម្ងន់ទោសដោយមានការរៀចំទុកជាមុនក្នុងដំណើររបស់ពួកគេដើម្បីស្វែងរកគោលដៅសម្រាប់ប្រព្រឹត្តបទល្មើស។
គាត់បានបន្តថា Lu គឺជាជនល្មើសដ៏សំខាន់ពាក់ព័ន្ធនឹងការសើបសួរក្នុងចេតនាលួចពិតប្រាកដហើយមានពិរុទ្ធភាពធ្ងន់ជាងគេក្នុងចំណោមអ្នកទាំងបីនេះ។
លោក Chew បានបន្ថែមថា នៅមានបទល្មើសឆ្លងដែនផងដែរ ដោយហេតុថា Lu និងបក្ខពួករបស់គាត់គឺជាជនបរទេសដែលបានកំណត់គោលដៅប្រព្រឹត្តបទល្មើសនៅក្នុងប្រទេសសិង្ហបុរី។
ចំពោះបទចូលលួចក្នុងហាងលក់គ្រឿងអលង្ការ Lu ត្រូវកាត់ទោសដាក់គុកដល់ទៅប្រាំពីរឆ្នាំ និងត្រូវពិន័យជាសាច់ប្រាក់ថែមទៀតផង៕
ប្រភព៖ CNA