ប្រែសម្រួល៖សហការី
![](https://cambodiaflashnews.com/wp-content/uploads/2021/06/top-banner.gif)
កាលពីថ្ងៃចន្ទ ១៣ វិច្ឆិកា ក្រុមបះបោរប្រដាប់អាវុធរបស់ជនជាតិភាគតិចមីយ៉ាន់ម៉ាបានវាយប្រហារលើប៉ុស្តិ៍ត្រួតពិនិត្យរបស់របបយោធាមីយ៉ាន់ម៉ា។ មន្ត្រីរបស់របបយោធាមីយ៉ាន់ម៉ាម្នាក់បាននិយាយថា ខណៈដែលមានការប្រយុទ្ធគ្នាបានផ្ទុះឡើងនៅរណសិរ្សថ្មីពីរបានបណ្តាលឲ្យមនុស្សរាប់ពាន់នាក់បានភៀសខ្លួនឆ្លងចូលទៅក្នុងប្រទេសជិតខាងដើម្បីស្វែងរកសុវត្ថិភាព។
របបយោធាមីយ៉ាន់ម៉ាកំពុងប្រឈមមុខនឹងការវាយបកដ៏ធំបំផុតរបស់ខ្លួនចាប់តាំងពីការឡើងកាន់អំណាចដោយការធ្វើរដ្ឋប្រហារនៅក្នុងឆ្នាំ ២០២១ បន្ទាប់ពីកងកម្លាំងជនជាតិភាគតិចមកពី បី អង្គភាព បានបើកការវាយបកយ៉ាងធ្ងន់ធ្ងរកាលពីចុងខែតុលាហើយដណ្តើមបានទីប្រជុំជនសំខាន់ៗ និងទីតាំងយោធាមួយចំនួនថែមទៀតផង។
ប្រធានាធិបតីដែលត្រូវបានតែងតាំងដោយយោធាកាលពីសប្តាហ៍មុនបាននិយាយថា ប្រទេសមីយ៉ាន់ម៉ា ដែលជាប្រទេសមានទំហំធំស្មើនឹងប្រទេសបារាំង កំពុងមានជម្លោះបែកបាក់គ្នាដោយសារតែការឆ្លើយតបរបស់ពួកគេមិនសូវមានប្រសិទ្ធភាពនៅក្នុងការបង្រ្កាបការបះបោរ។ ឧត្តមសេនីយ៍រូបនេះបាននិយាយថាពួកគេកំពុងតែប្រយុទ្ធជាមួយពួក “ភេរវករ” ។
អ្នកនាំពាក្យ AA លោក Khine Thu Kha បាននិយាយថា ក្រុមឧទ្ទាមមួយក្នុងចំណោមក្រុមបះបោរចំនួនបី គឺកងទ័ព Arakan Army (AA) ដែលកំពុងប្រយុទ្ធដើម្បីស្វយ័តភាពមានសន្ទុះកាន់តែខ្លាំងឡើងនៅក្នុងរដ្ឋ Rakhine ភាគខាងលិចនៃប្រទេសមីយ៉ាន់ម៉ា បានវាយដណ្តើមយកទីតាំងឈរជើងនៅក្នុងតំបន់ Rathedaung និង Minbya ដែលមានចម្ងាយប្រហែល ២០០ គីឡូម៉ែត្រពីគ្នា។
លោកបានបន្តថា៖ “ យើងបានវាយដណ្តើមយកទីតាំងឈរជើងរបស់របបយោធាបានមួយចំនួន ហើយការប្រយុទ្ធគ្នាកំពុងតែបន្តនៅតាមកន្លែងមួយចំនួនទៀត។
ប្រជាពលរដ្ឋម្នាក់នៅខេត្តរតនៈដូនបាននិយាយថា សំឡេងបាញ់ចេញដោយកាំភ្លើងធំបានលាន់ឡើងនៅព្រឹកព្រលឹមថ្ងៃចន្ទ ដោយមានការទម្លាក់គ្រាប់បែកអស់ជាច្រើនម៉ោង ហើយឃើញពួកយោធាបានបិទផ្លូវចូលក្នុងតំបន់ និងពង្រឹងសន្តិសុខនៅតាមអគាររដ្ឋបាល។
ការប្រយុទ្ធគ្នាក៏បានផ្ទុះឡើងនៅក្នុងរដ្ឋ Chin ដែលមានព្រំប្រទល់ជាប់ប្រទេសឥណ្ឌា នៅពេលដែលពួកបះបោរបានវាយប្រហារជំរុំយោធាចំនួនពីរ នេះបើយោងតាមប្រភពពីមន្ត្រីឥណ្ឌា។
លោក James Lalrinchana ស្នងការរងនៃស្រុកមួយរបស់ឥណ្ឌាដែលនៅជាប់នឹងព្រំដែនរេបស់មីយ៉ាន់ម៉ា បាននិយាយថាមានមនុស្សប្រហែល ៥,០០០ នាក់មកពីប្រទេសមីយ៉ាន់ម៉ាបានឆ្លងកាត់ព្រំដែនចូលទៅក្នុងរដ្ឋ Mizoram របស់ប្រទេសឥណ្ឌា ដើម្បីស្វែងរកទីជំរកសុវត្ថិភាពដើម្បីគេចចេញពីការប្រយុទ្ធ
គ្នា។
រដ្ឋ Chin ដែលធ្លាប់តែមានសន្តិភាពជាច្រើនឆ្នាំមកហើយ បានធ្លាក់ក្នុងការប្រយុទ្ធគ្នាយ៉ាងធ្ងន់ធ្ងរបន្ទាប់ពីរដ្ឋប្រហារឆ្នាំ ២០២១ ដោយមានប្រជាជនរាប់ពាន់នាក់បានកាន់អាវុធប្រឆាំងនឹងរបបយោធា។
អ្នកនាំពាក្យរបបយោធាមីយ៉ាន់ម៉ាមិនបានឆ្លើយតបភ្លាមៗចំពោះការអត្ថាធិប្បាយអំពីការប្រយុទ្ធគ្នាចុងក្រោយនេះទេ។
- ការថមថយកម្លាំងរបស់យោធា
យោងតាមការប្រយុទ្ធគ្នាថ្មីៗនេះឃើញថាការវាយប្រហារបកមកលើរបបយោធាកាន់តែរីករាលដាលនៅពេលដែលមានការប្រឆាំងដោយប្រដាប់អាវុធកាន់តែរីកធំឡើងដែលជាកំហឹងសងសឹករបស់ក្រុមឧទ្ទាមមកលើរបបរដ្ឋប្រហារដែលធ្វើការបង្ក្រាបដោយបង្ហូរឈាមជាបន្តបន្ទាប់ដែលបានបញ្ចប់ការកែទម្រង់លទ្ធិប្រជាធិបតេយ្យអស់រយៈពេលជាងមួយទសវត្សរ៍កន្លងមក។
ការវាយបកប្រឆាំងនឹងរបបសឹកយោធាដែលបានចាប់ផ្តើមនៅថ្ងៃទី ២៧ ខែតុលា ក្នុងរដ្ឋ Shan នៅភាគឦសានដែលមានទីប្រជុំជនជាច្រើន និងប៉ុស្តិ៍យោធាជាង ១០០ ត្រូវបានរឹបអូសនៅជិតព្រំដែនជាមួយប្រទេសចិន។
ការវាយលុកនៅចំកណ្តាលទីក្រុងក៏បានកើតឡើងនៅក្នុងតំបន់ Sagaing ភាគកណ្តាលនៃប្រទេសមីយ៉ាន់ម៉ា នៅភាគខាងលិចនៃរដ្ឋ Shan ខណៈដែលជម្លោះនៅក្នុងរដ្ឋ Kayah នៅជិតខាងនៅភាគខាងត្បូងរហូតមានការធ្លាក់យន្តហោះចម្បាំងកាលពីថ្ងៃសៅរ៍។
ក្រុមឧទ្ទាមបាននិយាយថា ពួកគេបានបាញ់ទម្លាក់យន្តហោះនេះ ខណៈដែលយោធាបាននិយាយថា វាមានកំហុសបច្ចេកទេស។
Richard Horsey ទីប្រឹក្សាជាន់ខ្ពស់មីយ៉ាន់ម៉ាសម្រាប់ Crisis Group Think Tank បាននិយាយថាតាមបទពិសោធរបស់របបយោធាក្នុងការប្រយុទ្ធគ្នាក្នុងរដ្ឋរ៉ាឃីនឃើញថាមានសភាពទន់ខ្សោយនៅក្នុងតំបន់ជាច្រើន។
លោកបានបញ្ជាក់ថា “ប្រសិនបើការប្រយុទ្ធគ្នានៅតែបន្ត វានឹងបើកមុខសម្រាប់រណសិរ្សប្រយុទ្ធដ៏សំខាន់ថ្មីមួយដែលធ្វើឲ្យហួសកម្លាំងទប់ទល់សម្រាប់របបនេះ”។” វានឹងមានការលំបាកសម្រាប់របបនេះក្នុងការខិតខំប្រឹងប្រែងទប់ទល់នឹងការវាយបកពីគ្រប់ជ្រុងរណសិរ្សប្រយុទ្ធរបស់ពួកគេទាំងអស់”៕
ប្រភព៖ Reuters