ប្រែសម្រួល៖សហការី
ក្នុងរយៈពេលប្រហែលប្រាំមួយខែ អ្នកបម្រើម្នាក់បានដកប្រាក់ជាបន្តបន្ទាប់សរុបអស់ចំនួន ៨៨,៦០០ ដុល្លារសិង្ហបុរី ពីគណនីធនាគាររបស់បុរសចំណាស់អាយុ ៩៥ឆ្នាំ ដែលជាឪពុករបស់ថៅកែរបស់នាង ដោយបិទបាំងមិនឲ្យមានការជូនដំណឹងដោយស្វ័យប្រវត្តិអំពីកិច្ចប្រតិបត្តិការរបស់ធនាគារក្នុងតួលេខដែលមានចំនួនច្រើន។
បទល្មើសនេះត្រូវបានគេរកឃើញបន្ទាប់ពីបុរសចំណាស់រូបនេះបានស្លាប់ហើយកូនប្រុសរបស់គាត់បានទទួលរបាយការណ៍អំពីការដកប្រាក់នេះចេញពីធនាគារ។
ស្រ្តីដែលជាជនជាតិឥណ្ឌូនេស៊ី Eka Yuniarsih មានអាយុ ៣២ ឆ្នាំត្រូវបានកាត់ទោសឲ្យជាប់ពន្ធនាគាររយៈពេល ១៥ ខែក្នុងថ្ងៃអង្គារទី១៤ ខែវិច្ឆិកា ពីបទល្មើសរំលោភលើទំនុកចិត្តដោយមានចេតនាទុច្ចរិតកេងប្រវ័ញ្ចមិនស្មោះត្រង់។
នាងក៏ត្រូវបានបញ្ជាឲ្យបង់ប្រាក់ជាសំណងចំនួន ៥,៤៤២ ដុល្លារសិង្ហបុរី រួមជាមួយនឹងចំនួនប្រាក់សិង្ហបុរីដែលត្រូវបានរឹបអូសពីនាងបន្ទាប់ពីត្រូវបានចាប់ខ្លួន។
តុលាការបានដឹងថា នាង Eka ឯកា ត្រូវបានជួលឲ្យមើលថែឪពុករបស់ថៅកែរបស់នាង។ នាងបានធ្វើការឲ្យគ្រួសារនេះក្នុងរយៈពេល ២ ទៅ ៣ ឆ្នាំរហូតដល់បុរសចំណាស់ម្នាក់នេះបានស្លាប់នៅអាយុ ៩៥ ឆ្នាំកាលពីខែកក្កដា។
កាលពីខែសីហាឆ្នាំមុន បុរសចំណាស់នេះបានសុំ Eka ឲ្យជួយគាត់ដកប្រាក់ពីគណនីធនាគារ DBS របស់គាត់ ខណៈដែលគាត់ត្រូវជិះនៅលើរទេះរុញ។
គាត់បានប្រគល់កាត ATM និងលេខ PIN ឲ្យអ្នកបម្រើស្រីម្នាក់នេះដើម្បីឲ្យនាងកាន់តែងាយស្រួលក្នុងការដកប្រាក់ជំនួសគាត់។
Eka មានជំពាក់បំណុលយ៉ាងច្រើននៅក្នុងប្រទេសឥណ្ឌូនេស៊ីនាងក៏បានសម្រេចចិត្តដកប្រាក់ពីគណនីធនាគាររបស់បុរសចំណាស់នេះដើម្បីធ្វើការទូទាត់បំណុលរបស់នាង។
នៅចន្លោះថ្ងៃទី ៣០ ខែមករា ដល់ថ្ងៃទី ៧ ខែកក្កដា នាងបានធ្វើការដកប្រាក់ចំនួន ៨៩ ដងពីគណនីធនាគារ ក្នុងមួយលើកៗមិនឲ្យដកលើសពី ១,០០០ ដុល្លារសិង្ហបុរីប្រសិនបើលើសចំនួនវានឹងបង្កឲ្យមានការជូនដំណឹងដោយស្វ័យប្រវត្តិរបស់ DBS។
Eka បានផ្ញើប្រាក់ទូទាត់ឲ្យទៅម្ចាស់បំណុលរបស់នាងនៅប្រទេសឥណ្ឌូនេស៊ី ហើយបានដកប្រាក់ចំនួន ៨,០០០ ដុល្លារសិង្ហបុរីយកជាប់នឹងខ្លួនទៅប្រទេសឥណ្ឌូនេស៊ីក្នុងដំណើរកម្សាន្តកាលពីខែមេសា។
ក្រោយមកបុរសចំណាស់នេះក៏បានស្លាប់ទៅនៅក្នុងថ្ងៃទី ១០ ខែកក្កដា។ ប្រាំមួយថ្ងៃក្រោយមកកូនប្រុសរបស់គាត់បានទទួលរបាយការណ៍ពីធនាគារសម្រាប់ខែមិថុនាហើយបានរកឃើញថាការដកសាច់ប្រាក់ផ្សេងៗត្រូវបានធ្វើឡើង។ គាត់ក៏បានប្រឈមមុខនឹងនាង Eka ដែលដំបូងបានអះអាងថាជាឪពុករបស់ខ្លួនជាអ្នកដកប្រាក់។
កូនប្រុសជនរងគ្រោះបានធ្វើរបាយការណ៍ជូនប៉ូលិស ដំបូងឡើយ Eka បានសារភាពថាបានដកប្រាក់ត្រឹមតែ ៥០,០០០ ដុល្លារសិង្ហបុរីប៉ុណ្ណោះ តែនៅគ្រាចុងក្រោយនាងបានសារភាពថាបានដកប្រាក់សរុបចំនួន ៨៨,៦០០ ដុល្លារសិង្ហបុរី។
នាងត្រូវបានចាប់ខ្លួន ហើយកាត ATM របស់ជនរងគ្រោះត្រូវបានដកហូតពីនាង រួមជាមួយនឹងសាច់ប្រាក់ចំនួន ៥,៤៤២ ដុល្លារសិង្ហបុរី និងប្រហែលស្មើនឹង ៧.៥ លានរូពី ក្រោយមកនាងមិនបានសងប្រាក់ទាំងនោះវិញទេ។
ព្រះរាជអាជ្ញាបានស្វែងរកការដាក់បន្ទុកតាមផ្លូវច្បាប់ដោយតម្រូវឲ្យជាប់គុគចាប់ពី ១៦ ទៅ ២០ ខែសម្រាប់នាង Eka ដោយសំអាងទៅលើចំនួនដកប្រាក់ដ៏ច្រើនដែលមិនត្រឹមត្រូវអស់រយៈពេលដ៏វែងមួយនៃការប្រព្រឹត្តបទល្មើសដោយគិតទុកជាមុនយោងតាមការអះអាងរបស់នាងថាបានដកប្រាក់មិនលើសពី១,០០០ដុល្លារសិង្ហបុរីក្នុងមួយលើកៗ។
ព្រះរាជអាជ្ញារង Etsuko Lim បាននិយាយថា ជនរងគ្រោះជាមនុស្សពិការ ជាមនុស្សវ័យចំណាស់ ហើយ Eka បានឆ្លៀតឱកាសពីការអសមត្ថភាពរបស់គាត់ក្នុងការទៅដកលុយតាម ATM ដោយខ្លួនឯង ឬតាមដានតួលេខគណនេយរបស់គាត់ឲ្យបានដិតដល់នោះ នាងបានបិទបាំងសកម្មភាពនេះពីគាត់។
នាងត្រូវបានបញ្ជាឲ្យទូទាត់សំណងយ៉ាងហោចណាស់ ៦,០០០ ដុល្លារសិង្ហបុរីពីលើសាច់ប្រាក់ដែលរឹបអូសបាន។
ក្នុងការស្នើសុំបន្ធូបន្ថយទោសនេះ ឯកា បាននិយាយតាមរយៈអ្នកបកប្រែថា នាងជាអ្នកដែលត្រូវបានប្តីលែងលះ និងជាអ្នករកស៊ីចិញ្ចឹមគ្រួសារតែម្នាក់ឯងគត់។
នាងបានស្នើសុំឲ្យមានបការសម្រាលទោសស្រាលជាងមុន ខណៈដែលនាងត្រូវបន្តសំណុំរឿងឡើងទៅតុលាការឧទរណ៍ថា៖ “ខ្ញុំធ្វើនេះក្នុងមូលហេតុជួយដល់គ្រួសារខ្ញុំដែលជំពាក់បំណុលគេ”។
នាងក៏បានស្នើសុំឲ្យតុលាការជួយបញ្ជូនពាក្យថាសុំទោសរបស់នាងទៅថៅកែរបស់នាងថា៖ “ខ្ញុំសុំទោស… ខ្ញុំមិនអាចមកសុំទោសនិងសងគុណអ្នកបានទេ ឲ្យខ្ញុំ… សុំទោសពួកគេផង”៕
ប្រភព៖ CNA