ប្រែសម្រួល៖សហការី
កាលពីថ្ងៃពុធទី ៨ ខែវិច្ឆិកាអតីតរដ្ឋមន្ត្រីទំនាក់ទំនងឥណ្ឌូណេស៊ីម្នាក់ត្រូវបានកាត់ទោសឲ្យជាប់ពន្ធនាគាររយៈពេល ១៥ ឆ្នាំ បន្ទាប់ពីតុលាការរកឃើញថាមានពិរុទ្ធភាពពីបទល្មើសពុករលួយនៅក្នុងសំណុំរឿងរបស់គាត់ដែលធ្វើឲ្យប្រទេសនេះខាតបង់ប្រាក់ចំណូលច្រើនជាង ៥០០ លានដុល្លារ។
អតីតរដ្ឋមន្ត្រីក្រសួងគមនាគមន៍ និងព័ត៌មានវិទ្យា លោក Johnny Gerard Plate មានពិរុទ្ធពីបទប្រើប្រាស់អំណាចក្នុងតួនាទីជាអ្នកគ្រប់គ្របលើគម្រោងទូរគមនាគមន៍ក្រោយមកតុលាការប្រឆាំងនឹងអំពើពុករលួយរបស់ប្រទេសឥណ្ឌូណេស៊ីបានរកឃើញអំពីពិរុទ្ធភាពពីបទប្រព្រឹត្តអំពើពុករលួយ។
ចៅក្រមស៊ើបសួរលោក Fahzal Hendri បានប្រាប់តុលាការថា “ចុងចោទត្រូវបានរកឃើញថាមានទោសតាមផ្លូវច្បាប់លើបទល្មើសប្រព្រឹត្តអំពើពុករលួយរួមគ្នាជាមួយបុគ្គលផ្សេងទៀតតុលាការបានកាត់ទោសចុងចោទឲ្យជាប់គុកចំនួន ១៥ ឆ្នាំ” ។
តុលាការក៏បានបញ្ជាឲ្យបុរសអាយុ ៦៧ ឆ្នាំរូបនេះបង់ប្រាក់ពិន័យចំនួន ១ ពាន់លានរូពៀរបស់ឥណ្ឌូនេស៊ីស្មើនឹង ៦៣,៧៥០ ដុល្លារអាមេរិក ឬដាក់ពន្ធនាគាររយៈពេលប្រាំមួយខែបន្ថែមទៀត។
គាត់ក៏ត្រូវបានបញ្ជាឲ្យបង់ប្រាក់ចំនួន ១៥.៥ ពាន់លានរូពីក្នុងសំណង ឬត្រូវតុលាការរឹបអូសទ្រព្យសម្បត្តិ។
គាត់ត្រូវបានចាប់ខ្លួនកាលពីខែឧសភាជុំវិញរឿងមួយនេះការជាប់ពាក់ព័ន្ធរបស់គាត់នៅក្នុងគម្រោងស្ថានីយ៍បញ្ជូនទិន្នន័យមូលដ្ឋាន (BTS) Plate គឺចង់និយាយសំដៅទៅលើការផ្តល់ការចូលប្រើអ៊ីនធឺណិត ៤G ទៅកាន់តំបន់ដាច់ស្រយាលនៅទូទាំងប្រជុំកោះ ដែលត្រូវបានដឹកនាំដោយភ្នាក់ងារមួយនៅក្រោមក្រសួងទំនាក់ទំនង។
ការិយាល័យអគ្គមេធាវីបាននិយាយថា ភាពខុសឆ្គងនៅក្នុងគម្រោងនេះបានបណ្តាលឱ្យមានការខាតបង់សរុបចំនួន ៨.០៣ ពាន់ពាន់លានរូពៀ ស្មើនឹងបាត់បង់ប្រាក់ចំនួន៥៤០ លានដុល្លារអាមេរិក។
តុលាការបានរកឃើញថា Plate មានពិរុទ្ធពីបទពុករលួយកិបកេងប្រាក់រដ្ឋដាក់ហោប៉ៅខ្លួនឯងចំនួន ១០ ពាន់លានរូពីស្មើនឹង ៦៣៨.៥០០ ដុល្លារអាមេរិក ពីគម្រោងមួយនេះ។
AGO បានរាយការណ៍ថា ខ្លួនបានរកឃើញភាពមិនប្រក្រតីនៅក្នុងដំណើរការលទ្ធកម្មដែលពាក់ព័ន្ធនឹងក្រុមហ៊ុនក្នុងស្រុក និងបរទេស ហើយបានដាក់ការសង្ស័យលើបុគ្គល៥រូបផ្សេងទៀត រួមទាំងនាយកប្រតិបត្តិនៃក្រុមហ៊ុនបុត្រសម្ព័ន្ធរបស់ក្រុមហ៊ុនទូរគមនាគមន៍យក្សចិន Huawei ផងដែរ។
ប្រទេសឥណ្ឌូនេស៊ីបានចាប់ខ្លួនមន្ត្រីសាធារណៈជាច្រើននាក់ពីបទប្រព្រឹត្តអំពើពុករលួយក្នុងរយៈពេលប៉ុន្មានឆ្នាំថ្មីៗនេះ។
នៅក្នុងឆ្នាំ ២០២១ អតីតរដ្ឋមន្ត្រីក្រសួងសង្គមកិច្ចម្នាក់ត្រូវបានកាត់ទោសឲ្យជាប់ពន្ធនាគាររយៈពេល ១២ ឆ្នាំបន្ទាប់ពីត្រូវបានកាត់ទោសពីបទទទួលសំណូកចំនួន ១.២ លានដុល្លារអាមេរិក ពាក់ព័ន្ធនឹងជំនួយស្បៀងអាហារសម្រាប់គ្រួសារក្រីក្រដែលរងគ្រោះដោយជំងឺរាតត្បាតរាតត្បាត។
ប្រភព៖ AFP/wk