ប្រែសម្រួល៖ សហការី
អ្នកនាំពាក្យក្រសួងមហាផ្ទៃ នាយឧត្តមសេនីយ៍ ខៀវ សុភ័គ បានថ្លែងថាកាលពីថ្ងៃពុធ ទី៨ ខែវិច្ឆិកានេះថាមានជនជាតិជប៉ុនចំនួន ២៥នាក់ ដែលជាប់សង្ស័យថាមានជាប់ពាក់ព័ន្ធនឹងអំពើឆបោកតាមប្រព័ន្ធអ៊ីនធឺណិតនៅក្នុងប្រទេសកម្ពុជា ត្រូវបាននិរទេសខ្លួនទៅកាន់ប្រទេសជប៉ុនដែលជាប្រទេសដើមកំណើតរបស់ជនសង្ស័យទាំងនោះវិញ។
លោក នាយឧត្តមសេនីយ៍ កែវ វ៉ាន់ថន អ្នកនាំពាក្យនគរបាលអន្តោប្រវេសន៍របស់ប្រទេសកម្ពុជាបានប្រាប់សារព័ត៌មាន The Associated Press ថា មន្រ្តីប៉ូលិសកម្ពុជាបានទទួលព័ត៌មានពីសមភាគីជប៉ុនថារដ្ឋាភិបាលជប៉ុនបានរៀបចំជើងហោះហើរដ៏សមញ្ញមួយដើម្បីដឹកជញ្ជូនជនសង្ស័យទាំងនេះដែលត្រូវបានឃុំខ្លួនកាលពីខែកញ្ញាត្រឡប់ទៅប្រទេសរបស់ពួកគេវិញនៅក្រោយពេលដែលអ្នកទាំង២៥នាក់ត្រូវបានចាប់ខ្លួននិងឃុំខ្លួននៅក្នុងរាជធានីភ្នំពេញ។
លោក ខៀវ សុភ័គ បានថ្លែងអំណរគុណចំពោះរដ្ឋាភិបាលជប៉ុន លើការគាំទ្រ និងសហប្រតិបត្តិការបានល្អប្រសើរជាមួយរដ្ឋាភិបាលកម្ពុជា ដើម្បីចាប់ខ្លួនជនល្មើសទាំងនេះ”បានដោយជោគជ័យ។
អំពើឆបោកតាមអ៊ីនធឺណិតបានក្លាយជាបញ្ហាចម្បងនៅអាស៊ី។
កាលពីខែសីហា ការិយាល័យសិទ្ធិមនុស្សរបស់អង្គការសហប្រជាជាតិបាននិយាយថា ក្រុមឧក្រិដ្ឋជនបានចាប់បង្ខំមនុស្សរាប់សែននាក់នៅអាស៊ីអាគ្នេយ៍ឲ្យចូលរួមក្នុងកិច្ចប្រតិបត្តិការឆបោកតាមប្រព័ន្ធអ៊ីនធឺណេតដោយខុសច្បាប់ រួមទាំងល្បែងស្នេហាក្លែងក្លាយ គម្រោងវិនិយោគក្លែងក្លាយ និងគម្រោងល្បែងស៊ីសងខុសច្បាប់ជាដើម។
នៅក្នុងរបាយការណ៍មួយរបស់ការិយាល័យឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្សប្រចាំប្រទេសកម្ពុជា បានដកស្រង់ “ប្រភពដ៏គួរឲ្យទុកចិត្តបាន” និយាយថាយ៉ាងហោចណាស់មានមនុស្សចំនួន ១២០.០០០ នាក់នៅក្នុងប្រទេសមីយ៉ាន់ម៉ា និងប្រហែល ១០០.០០០ នាក់នៅក្នុងប្រទេសកម្ពុជា “បានក្លាយជាជនរងគ្រោះ” ។ របាយការណ៍នេះបានបង្ហាញនូវពន្លឺថ្មីមួយស្តីពីអំពើរឆបោករបស់ឧក្រិដ្ឋកម្មតាមអ៊ីនធឺណិតដែលបានក្លាយជាបញ្ហាចម្បងដ៏គួរឲ្យព្រួយបារម្ភនៅក្នុងតំបន់អាស៊ីអាគ្នេយ៍។
កាលពីខែមេសា ជនជាតិជប៉ុនចំនួន ១៩ នាក់ត្រូវបានគេដាក់ការសង្ស័យថាបានចូលរួមក្នុងអំពើឆបោកតាមទូរសព្ទ និងតាមអ៊ីនធឺណិតក៏ត្រូវបាននិរទេសខ្លួនចេញពីទឹកដីកម្ពុជាទៅកាន់ប្រទេសកំណើតរបស់ពួកគេវិញនៅក្រោយពេលចាប់ខ្លួននៅភាគខាងត្បូងនៃក្រុងព្រះសីហនុពីបទឆបោកតាមអ៊ីនធឺណិត។
អំពើរឆបោកបែបនេះបានក្លាយជាប្រធានបទដ៏រំជើបរំជួលមួយនៅក្នុងប្រទេសកម្ពុជាកាលពីឆ្នាំមុន នៅពេលដែលមានរបាយការណ៍ជាច្រើននិយាយអំពីប្រជាជនចិននិងសាសន៍ដទៃទៀតមកពីបណ្តាប្រទេសអាស៊ីផ្សេងៗគ្នា និងមកពីកន្លែងផ្សេងៗទៀតត្រូវបានគេឆបោកដោយប្រើប្រាស់មធ្យបាយអូសទាញឲ្យជនរងគ្រោះទាំងនោះមកធ្វើការនៅក្នុងប្រទេសកម្ពុជា។ ទោះជាយ៉ាងណាក៏ដោយ ជារឿយៗពួកគេបានរកឃើញថាពួកគេត្រូវបានជាប់នៅក្នុងសភាវៈជាទាសករសិប្បនិម្មិត ហើយត្រូវបានបង្ខំឲ្យចូលរួមក្នុងអំពើឆបោកដែលផ្តោតលើបុគ្គលណាដែលមានប្រើប្រាស់បណ្តាញអ៊ីនធឺណិត។
បណ្តាញឆបោក ដែលជារឿយៗមានទំនាក់ទំនងជាមួយឧក្រិដ្ឋកម្មឆ្លងដែនត្រូវបានបង្កើតឡើងនៅក្នុងប្រទេសដែលមានអនុវត្តច្បាប់ទន់ខ្សោយ និងប្រព្រឹត្តអំពើឆបោកដើម្បីទាក់ទាញកម្មករវ័យក្មេងៗដែលមានការអប់រំតិចតួចជាមួយនឹងការសន្យាថានឹងទទួលបានប្រាក់ចំណូលខ្ពស់។ ក្រោយមក កម្មករទាំងនោះត្រូវបានគេបង្ខាំងទុកនៅក្នុងទីតាំងលាក់តំបាំងដាច់ដោយឡែកៗពីគ្នា និងរងការគំរាមកំហែងព្រមទាំងប្រើអំពើហិង្សាមកលើពួគេទាំងនោះរហូតដល់ពួកគេយល់ព្រមចូលរួមក្នុងអំពើឆបោកដោយធ្វើការទំនាក់ទំនងមកបុគ្គលផ្សេងៗទៀតតាមទូរសព្ទដោយប្រើវិធីសាស្រ្តឆបោកឲ្យផ្ទេរប្រាក់ទៅក្នុងគណនីធនាគារនៅក្រៅប្រទេសជាដើម៕
ប្រភព៖ AP