ដោយ៖វិចិត្រ

ភ្នំពេញ៖កម្លាំងនគរបាលខណ្ឌឫស្សីកែវ បានចាប់ជនសង្ស័យម្នាក់ចំណោម២នាក់ បន្ទាប់ពីធ្វើសកម្មភាពលួចម៉ូតូ។ករណីនេះនៅផ្លូវលេខ១០៣ ភូមិទួលថ្ងាន់ សង្កាត់ទួលសង្កែទី២ ខណ្ឌឫស្សីកែវ កាលពីល្ងាចថ្ងៃទី៧ ខែវិច្ឆិកា។

លោក ហ៊ាង ថារ៉េត អធិការនគរបាលខណ្ឌឫស្សីកែវបានឱ្យដឹងថា ម្ចាស់ម៉ូតូឈ្មោះ ព្រុំ រ៉ង អាយុ៦០ឆ្នាំ ស្នាក់នៅភូមិទួលថ្ងាន់ សង្កាត់ទួលសង្កែទី២ ខណ្ឌឫស្សីកែវ។រីឯជនសង្ស័យឈ្មោះ ហៀង រ៉ាស៊ីម អាយុ១៧ឆ្នាំនៅផ្ទះជួល ក្រុម៣ ភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ និងម្នាក់ទៀតបានរត់គេចខ្លួន។

ពេលឃាត់ខ្លួនសមត្ថកិច្ចបានដកហូតវត្ថុតាង សោខ្សៀ១-ដែកសំប៉ែតចុងស្រួច១ដើម-ទូរសព្ទម៉ាក oppo A83 ១គ្រឿង និងម៉ូតូ១គ្រឿងម៉ាកឃ្លីក ផ្លាកលេខបន្ទាយមានជ័យ 1M-8163 បានប្រគល់ឱ្យម្ចាស់ដើមវិញ។ក្រោយមកកម្លាំងជំនាញបាននាំទៅអធិការដ្ឋាននគរបាលខណ្ឌដើម្បីចាត់ការតាមនីតិវិធី ហើយបន្តតាមចាប់បក្ខពួកបន្ថែមទៀត៕