ដោយ:សុខុម
កំពង់ស្ពឺ:អ្នកដើររើសអេតចាយបានប្រទះឃើញសាកសពបុរសម្នាក់អណ្តែតក្នុងទឹកស្ទឹងព្រែកត្នោតមកទើរនៅគល់ស្ពានថ្មី ស្ថិតក្នុងភូមិត្រស់សាលាសង្កាត់ស្វាយក្រវ៉ាន់ ក្រុងច្បារមន ខេត្តកំពង់ស្ពឺ កាលពីវេលាម៉ោង៧និង៥៧នាទីព្រឹកថ្ងៃទី១ ខែវិច្ឆិកា ឆ្នាំ២០២៣។
សមត្ថកិច្ចបានស្រង់សាកសពដែលអណ្តែក្នុងស្ទឹងព្រែកត្នោនេះយកមកពិនិត្យមើលហើយក៏បានស្គាល់អត្តសញ្ញាណហើយដែរ។
បើតាមសម្តីស្ត្រីឈ្មោះ កន សុផល អាយុ៣២ឆ្នាំរស់នៅភូមិស្គុះសង្កាត់ស្វាយក្រវ៉ាន់ ក្រុងច្បារមន បាននិយាយថាសាកសពដែលពលរដ្ឋប្រទះឃើញគឺជាសពឪពុកគាត់មានឈ្មោះ សឹម កន អាយុ៥៤ឆ្នាំ។
ស្ត្រីខាងលើបានបន្តទៀតថា ឪពុករបស់គាត់ទំនងជាដើរវង្វេងចេញពីផ្ទះតាំងពីថ្ងៃទី២០ខែតុលាឆ្នាំមកម៉្លេះ ហើយពួកគាត់បាននាំគ្នាដើរករហូតមកដល់នេះរយះពេល១២ថ្ងៃទើបឃើញសាកសព។
មន្ត្រីជំនាញកោសល្យវិច័យនៃស្នងការដ្ឋាននគរបាលខេត្តកំពង់ស្ពឺបានពិនិត្យសាកសពខាងលើនេះ សពបុរសនោះពិតជាលង់ទឹកស្លាប់ពិតប្រាកដមែនមិនមានពាក់ព័ន្ធករណីឃាតកម្មឡើយ៕
