ប្រែសម្រួល៖រតនា
សិង្ហបុរី៖ប៉ូលិសបានចាប់ខ្លួនបុរសម្នាក់ និងដកហូតអាវុធជាច្រើន បន្ទាប់ពីគេឃើញគាត់បានប្រើដាវសាម៉ូរ៉ៃក្នុងវីដេអូបង្ហោះលើបណ្តាញសង្គមដែលមើលទៅគួរឲ្យខ្លាចហើយវាជារឿងខុសនឹងច្បាប់។
អាវុធផ្សេងទៀតរួមមាន កាំបិតមេអំបៅ កាំបិតផ្គាក់ និងកាំបិតស្នៀតមួយ ព្រមទាំងឧបករណ៍ប្រើប្រាស់គ្រឿងញៀន ត្រូវបានរកឃើញ និងរឹបអូសនៅពេលដែលប៉ូលិសបានលួចឆ្មក់ចូលផ្ទះរបស់គាត់។
“នៅថ្ងៃទី 28 ខែតុលាឆ្នាំ 2023 ប៉ូលិសបានទទួលរបាយការណ៍នៃវីដេអូដែលបានបង្ហោះនៅលើប្រព័ន្ធផ្សព្វផ្សាយសង្គមដែលបង្ហាញពីបុរសម្នាក់កាន់ដាវសាមូរ៉ៃជាសាធារណៈ។ ការស៊ើបអង្កេតបឋមបានបង្ហាញថាវីដេអូនេះត្រូវបានបង្ហោះនៅលើទំព័រប្រព័ន្ធផ្សព្វផ្សាយសង្គមរបស់បុរសនោះ” កងកម្លាំងប៉ូលិសសិង្ហបុរី ( SPF) បាននិយាយនៅក្នុងសេចក្តីប្រកាសព័ត៌មានកាលពីថ្ងៃអាទិត្យ (ថ្ងៃទី 29 ខែតុលា)។
ក្នុងវីដេអូបង្ហោះលើហ្វេសប៊ុក បុរសរូបនេះបាននិយាយថាគាត់ចង់សាកល្បងដាវថាមុតប៉ុណ្ណា មុននឹងកាត់ដបទឹកជ័រមួយដាច់ជាពាក់កណ្តាល។
មន្រ្តីប៉ូលិសបានកត់សម្គាល់អត្តសញ្ញាណបុរសនោះ ហើយបានចាប់ខ្លួនគាត់នៅឯ លំនៅឋានមួយ ដែលមានទីតាំងនៅផ្លូវ Chin Swee ។
បុរសនេះនឹងត្រូវចោទប្រកាន់នៅតុលាការនៅថ្ងៃចន្ទពីបទកាន់កាប់អាវុធ។ បទល្មើសកាន់អាវុធកំណត់ពេលនៅទីសាធារណៈ ក្នុងគោលបំណងមិនស្របច្បាប់ ត្រូវផ្ដន្ទាទោសដាក់ពន្ធនាគាររហូតដល់៥ឆ្នាំ។
SPF បាននិយាយថា “ប៉ូលិសមិនមានការអត់ឱនចំពោះទង្វើដ៏ល្ងង់ខ្លៅបែបនេះទេ ហើយនឹងមិនស្ទាក់ស្ទើរក្នុងការធ្វើសកម្មភាពប្រឆាំងនឹងអ្នកដែលមិនគោរពច្បាប់” ដោយបន្ថែមថាការស៊ើបអង្កេតកំពុងបន្ត។
ការិយាល័យប្រឆាំងគ្រឿងញៀនកណ្តាលក៏កំពុងស៊ើបអង្កេតបុរសនេះផងដែរពីបទសង្ស័យពាក់ព័ន្ធគ្រឿងញៀន៕
ប្រភព៖ CNA/kg(mi)