ដោយ៖ គង់ហេង
កំពង់ចាម៖ ពិធីប្រណាំងទូក ដើម្បីអបអរសាទរពិធីបុណ្យចេញព្រះវស្សា ដែលប្រព្រឹត្តទៅក្រុងកំពង់ចាម រយៈពេលពីរថ្ងៃ គឺនឹងចាប់ផ្តើមប្រកួត នៅម៉ោង ១ រសៀលថ្ងៃទី ២៨ តុលានេះ ដោយមានទូកចូលរួមសរុបចំនួន ៤៨ ទូក និងកីឡាករចំនួនជាង ២.០០០ នាក់។
![](https://cambodiaflashnews.com/wp-content/uploads/2021/06/top-banner.gif)
លោក ស្រី សុភ័ក្រ្ត អភិបាលរងខេត្តកំពង់ចាម និងជាអ្នកនាំពាក្យរដ្ឋបាល ខេត្ត បានប្រាប់ឱ្យដឹងនៅក្រោយពិធីបើកការប្រកួតនៅមាត់ទន្លេ មេគង្គ ទន្ទឹមទូកស្គរជ័យថា៖ ទូកចំនួន ៤៨ ទូកចូលរួមប្រណាំង ដោយមានទូកខ្លី ឬទូកខ្នាតអន្តរជាតិចំនួន ២៨ ទូក និងទូកវែង ឬទូកងចំនួន ២០ ទូក។
លោកអ្នកនាំពាក្យបានបន្តថា៖ ក្នុងនោះយើងមានពានរង្វាន់ចំនួន ប្រាំ ហើយលក្ខខណ្ឌ នៃការប្រកួត គឺទី១ ផ្អែកលើការប្រកួតទំាងពីរថ្ងៃ( ថ្ងៃទី ២៨-២៩ តុលា) ដោយទូកមួយអុំចំនួន ពីរ ជើងក្នុងមួយថ្ងៃ គឺទូកណាឈ្នះ ទាំងពីរថ្ងៃស្មើចំនួន បួន ជើងយើងជ្រើសរើសមកផ្គូផ្គងគ្នា ហើយគិតលើ ល្បឿនថែមទៀត នោះយើងនឹងរកឃើញទូកង និងទូកខ្នាតអន្តរជាតិ មួយណាជាប់លេខ១ , ២, ៣ បន្តបន្ទាប់គ្នា។
លោក មាន សាម៉ន អ្នកគ្រប់គ្រងចំណុះទូកងឈ្មោះ«ដីលើទួល រកាតេជោសែនជ័យ»បានឱ្យដឹងថា៖ ទូកនេះជារបស់វត្តវេឡុវ័នទួលរកា ឃុំពាមកោះស្នា ស្រុកស្ទឹងត្រង់ចំណុះ ៧០ នាក់ឧបត្ថម្ភដោយចំណុះ ជើងវត្តវេឡុវ័នទួលរកា ជាគូទី៦ ត្រូវប្រកួតជាមួយទូកឈ្មោះ «នាគវ័ន» នៅភូមិទី៥ ឃុំរកាខ្នុរ ស្រុកក្រូចឆ្មារ ខេត្តត្បូងឃ្មុំចំណុះ ៧២ នាក់ ឧបត្ថម្ភដោយលោក ជា សុផារ៉ា និងលោកស្រី។
លោកអ្នកគ្រប់គ្រងទូកដីលើទួលរកាតេជោសែនជ័យ បានបន្តថា៖ ចំពោះការប្រកួតលើនេះខាងលោកបានហ្វឹកហាត់មុនការប្រកួតចំនួន ១២ ថ្ងៃ ដូច្នេះខាងលោកមានសង្ឃឹមឈ្នះការប្រកួតចំនួន ៨០ ភាគរយ ហើយក៏ត្រៀមទៅចូលរួមប្រកួតនៅរាជធានីភ្នំពេញនាឱកាសបុណ្យអុំទូក នាពេលខាងមុខនេះផងដែរ៕