ប្រែសម្រួល៖សហការី
![](https://cambodiaflashnews.com/wp-content/uploads/2021/06/top-banner.gif)
តូក្យូ៖តម្លៃប្រេងបានឡើងថ្លៃក្នុងការជួញដូរលើទីផ្សារអាស៊ីកាលពីថ្ងៃអង្គារ ដោយបានស្ដារឡើងវិញនូវការខាតបង់មួយចំនួនកាលពីពេលមុន ក្នុងខណៈដែលអ្នកវិនិយោគនៅតែមានការបារម្ភខ្លាចសង្រ្គាមរវាងអ៊ីស្រាអែល និងក្រុមហាម៉ាស់អាចរីករាលដាលទៅជាជម្លោះកាន់តែធំនៅក្នុងតំបន់ដែលមានការនាំចេញប្រេងជាហេតុបង្ករឱ្យមានការរំខានដល់ការផ្គត់ផ្គង់ជាដើម។
តម្លៃប្រេងឆៅនាពេលអនាគតរបស់ Brent បានកើនឡើង ៧០ សេន ឬ ០.៨ ភាគរយស្មើនឹង ៩០.៥៣ ដុល្លារក្នុងមួយបារ៉ែលគិតមកត្រឹមម៉ោង 0032 GMT នៅខណៈពេលដែលប្រេងឆៅរបស់អាមេរិក West Texas Intermediate បានកើនឡើង ៧១ សេន ឬ ០.៨ ភាគរយស្មើនឹង ៨៦.២០ ដុល្លារក្នុងមួយបារ៉ែល។
លោក Yuki Takashima សេដ្ឋវិទូនៅក្រុមហ៊ុន Nomura Securities បាននិយាយថា “តម្លៃប្រេងលើទីផ្សារបានកើនឡើងបន្ទាប់ពីមានការធ្លាក់ចុះនៅក្នុងវគ្គទីពីរកន្លងមកដោយសាតែមានការភ័យខ្លាចថានឹងមានការរំខានដល់ការផ្គត់ផ្គង់ដែលអាចកើតមាននៅក្នុងតំបន់មជ្ឈិមបូព៌ា” ។
គោលដៅទាំងពីរបានធ្លាក់ចុះជាង ២ ភាគរយកាលពីថ្ងៃចន្ទ ដោយសារកិច្ចខិតខំប្រឹងប្រែងការទូតនៅមជ្ឈិមបូព៌ា ដែលជាតំបន់ផ្គត់ផ្គង់ប្រេងដ៏ធំបំផុតរបស់ពិភពលោកដើម្បីទប់ស្កាត់ជម្លោះរវាងអ៊ីស្រាអែល និងក្រុមហាម៉ាស ដែលអាចបន្ធូរបន្ថយការព្រួយបារម្ភរបស់វិនិយោគិនលើការរំខានដល់សង្វាក់ផ្គត់ផ្គង់ប្រេង។
ក្រុមហាម៉ាស់កាលពីថ្ងៃចន្ទបាននិយាយថា ខ្លួនបានដោះលែងស្ត្រីជនជាតិអ៊ីស្រាអែលពីរនាក់ដែលស្ថិតក្នុងចំណោមចំណាប់ខ្មាំងជាង ២០០ នាក់ដែលត្រូវបានចាប់ខ្លួនក្នុងអំឡុងពេលការវាយឆ្មក់កាលពីថ្ងៃទី ៧ ខែតុលារបស់ខ្លួននៅភាគខាងត្បូងប្រទេសអ៊ីស្រាអែល ខណៈដែលប្រភពបាននិយាយថា សហរដ្ឋអាមេរិកបានណែនាំឱ្យអ៊ីស្រាអែលបញ្ឈប់ការវាយលុកដោយទ័ពថ្មើរជើងចូលទៅក្នុងតំបន់ហ្គាហ្សាស្ទ្រីប។
ប៉ុន្តែអ៊ីស្រាអែលបានបន្តការទម្លាក់គ្រាប់បែកលើតំបន់ហ្កាហ្សារបស់ខ្លួនកាលពីថ្ងៃចន្ទបន្ទាប់ពីបានបើកការវាយប្រហារតាមអាកាសលើភាគខាងត្បូងប្រទេសលីបង់អស់ពេលពេញមួយយប់កន្លងមក។
អ៊ីស្រាអែលបានវាយលុកគោលដៅរាប់រយនៅហ្គាហ្សាពីលើអាកាសកាលពីថ្ងៃចន្ទ ខណៈទាហានរបស់ខ្លួនបានប្រយុទ្ធជាមួយក្រុមសកម្មប្រយុទ្ធហាម៉ាសនៅអំឡុងការវាយឆ្មក់ចូលក្នុងតំបន់ប៉ាឡេស្ទីនដែលបានឡោមព័ទ្ធដែលធ្វើឲ្យមានការស្លាប់កាន់តែកើនឡើងថែមទៀតធ្វើឲ្យជនស៊ីវិលស្លូតត្រង់ត្រូវស្ថិតនៅក្នុងស្ថានភាពដ៏អាក្រក់បំផុត។
លោក Takashima បាននិយាយថា “យើងរំពឹងថា WTI នឹងប្រែប្រួលតម្លៃនៅចន្លោះ ៨០ទៅ៩០ដុល្លារ សម្រាប់ពេលមួយគឺអាស្រ័យទៅលើស្ថានភាពនៅអ៊ីស្រាអែល និង Gaza ផលិតកម្ម OPEC និងសន្ទុះនៃការងើបឡើងវិញនូវតម្លៃប្រេងគឺដោយសាមានតម្រូវការនៅក្នុងប្រទេសចិន” លោក Takashima បាននិយាយថា “អ្នកវិនិយោគក៏កំពុងផ្តោតលើសារពើភ័ណ្ឌរបស់សហរដ្ឋអាមេរិកផងដែរ។
ការស្ទង់មតិបឋមរបស់ Reuters បានបង្ហាញកាលពីថ្ងៃចន្ទថា ស្តុកប្រេងឆៅរបស់សហរដ្ឋអាមេរិកត្រូវបានគេរំពឹងថានឹងកើនឡើងកាលពីសប្តាហ៍មុន ខណៈដែលស្តុកប្រេង និងប្រេងសាំងមានការធ្លាក់ចុះជារួម។
ការស្ទង់មតិនេះត្រូវបានធ្វើឡើងនៅមុនរបាយការណ៍ចេញពីក្រុមឧស្សាហកម្មវិទ្យាស្ថានប្រេងអាមេរិកដែលត្រូវកំណត់នៅត្រឹមម៉ោង 2030 GMT នៅថ្ងៃអង្គារ និងព័ត៌មានថាមពល ដែលជាផ្នែកស្ថិតិនៃក្រសួងថាមពលសហរដ្ឋអាមេរិកនឹងកំណត់នៅត្រឹមម៉ោង 1430 GMT នៅក្នុងថ្ងៃពុធ។
ប្រភព៖ Reuters