ប្រែសម្រួល៖សហការី
![](https://cambodiaflashnews.com/wp-content/uploads/2021/06/top-banner.gif)
យោងតាមមន្ត្រីអ៊ីស្រាអែលបានឲ្យដឹងថាមានចំណាប់ខ្មាំងដែលជាពលរដ្ឋអ៊ីស្រាអែលចំនួនពីរនាក់ទៀតត្រូវបានដោះលែងពីការឃុំឃាំងរបស់ក្រុមហាម៉ាស់ ក្នុងខណៈដែលមានការសម្របសម្រួលពីក្រុមមន្ត្រីកាតា និងអេហ្ស៊ីប ។
ចំណាប់ខ្មាំងទាំងពីរនាក់នេះត្រូវបានគេកំណត់អត្តសញ្ញាណថាជាពលរដ្ឋអ៊ីស្រាអែលដែលមានឈ្មោះ Nurit Cooper អាយុ ៧៩ ឆ្នាំ និង Yocheved Lifshitz អាយុ ៨៥ ឆ្នាំ។
កូនស្រីរបស់គាត់ឈ្មោះ Sharone Lifschitz បាននិយាយនៅក្នុងសេចក្តីថ្លែងការណ៍មួយដែលបានដកស្រង់យកមកចេញផ្សាយលើប្រព័ន្ធផ្សព្វផ្សាយសង្គមថា “ម្តាយរបស់ខ្ញុំឈ្មោះ Yochi (Yocheved) Lifshitz គឺជាចំណាប់ខ្មាំងម្នាក់ក្នុងចំណោមចំណាប់ខ្មាំងពីរនាក់ដែលត្រូវបានដោះលែងតាមរយៈកាកបាទក្រហមនៅល្ងាចនេះខណៈពេលនេះខ្ញុំនៅតែផ្តោតលើការធានាការដោះលែងឪពុករបស់ខ្ញុំ និងមនុស្សដទៃទៀតទាំងអស់។ មានមនុស្សស្លូតត្រង់ប្រហែល ២០០ នាក់ ដែលនៅសេសល់ជាប់ជាចំណាប់ខ្មាំងរបស់ក្រុមហាម៉ាសនៅក្នុងតំបន់ Gaza” ។
“ពួកគេត្រូវបានបានក្រុមហាម៉ាសប្រគល់ទៅឱ្យកាកបាទក្រហមនៅឯ Rafah ហើយធ្វើការឆ្លងកាត់តាមច្ររបៀងមួយក្នុងរយៈពេលដ៏ខ្លីនៅមុនពេលដែលពួកគេត្រូវបានប្រគល់ទៅឲ្យមន្ត្រីអ៊ីស្រាអែល។ ក្រុមគ្រួសារត្រូវបានជូនដំណឹង” សេចក្តីថ្លែងការណ៍របស់គ្រួសារ Lifshitz ក៏ត្រូវបានធ្វើឡើងផងដែ។
ហាម៉ាសក៏បាននិយាយផងដែរថា ខ្លួនបានដោះលែងចំណាប់ខ្មាំងពីរនាក់ នេះបើយោងតាមសេចក្តីថ្លែងការណ៍របស់អ្នកនាំពាក្យក្រុមហាម៉ាស Abu Obaida ។
លោក Abu Obaida បាននិយាយថា “យើងបានដោះលែងចំណាប់ខ្មាំងពីរនាក់ដោយក្នុងចិត្តចាត់ទុកថាពួកគេគឺជាសត្រូវរបស់យើង។ យើងបានសម្រេចចិត្តដោះលែងពួកគេដោយសារហេតុផលមនុស្សធម៌ និងសុខភាពរបស់ពួកគេ។
![](https://cambodiaflashnews.com/wp-content/uploads/2023/10/០៤-3-300x152.png)
គណៈកម្មាធិការអន្តរជាតិនៃកាកបាទក្រហម (ICRC) បានបញ្ជាក់ថា ពួកគេបាននិងកំពុងតែធ្វើការសម្របសម្រួលក្នុងការដោះលែងចំណាប់ខ្មាំងពីរនាក់បន្ថែមទៀត។
“យើងបានសម្របសម្រួលការដោះលែងចំណាប់ខ្មាំង ពីរនាក់បន្ថែមទៀតហើយនិងបញ្ជូនពួកគេចេញពី ហ្គាហ្សានៅថ្ងៃល្ងាចនេះ។ តួនាទីរបស់យើងជាអន្តរការីអព្យាក្រឹតសម្រាប់ធ្វើការងារដែលអាចធ្វើទៅបានហើយយើងត្រៀមខ្លួនជាស្រេចដើម្បីជួយសម្របសម្រួលដល់ការដោះលែងចំណាប់ខ្មាំងនាពេលអនាគត។ យើងសង្ឃឹមថាពួកគេនឹងត្រឡប់មកផ្ទះវិញនៅក្នុងពេលឆាប់ៗនេះ។ ” ICRC បានបង្ហោះនៅលើគណនី X ផ្លូវការរបស់ខ្លួន។
CNN បានទាក់ទងទៅយោធាអ៊ីស្រាអែលតែពួកគេបានបដិសេធមិនធ្វើអត្ថាធិប្បាយលើសេចក្តីថ្លែងការណ៍របស់ក្រុមហាម៉ាស។ ការិយាល័យនាយករដ្ឋមន្ត្រីអ៊ីស្រាអែលក៏បាននិយាយថាពួកគេមិនមានការអត្ថាធិប្បាយទេ។
កាលពីថ្ងៃអាទិត្យ អ៊ីស្រាអែលបាននិយាយថា ខ្លួននឹងមិនឆ្លើយតបនឹងការអះអាងរបស់ក្រុម Hamas ថាពួកគេបានត្រៀមខ្លួនរួចរាល់ដើម្បីដោះលែងចំណាប់ខ្មាំងពីរនាក់បន្ថែមទៀតនោះទេ ដោយចាត់ទុកវាថាជា ការឃោសនាភូតកុហក។
កាលពីថ្ងៃសុក្រ ក្រុមហាម៉ាសបានដោះលែងចំណាប់ខ្មាំងជនជាតិអាមេរិកពីរនាក់ម្តាយនិកូនគឺ Judith Tai Raanan និង Natalie Raanan ៕
ប្រភព៖CNN