ដោយ:សុខុម
រតនគិរី: មកដល់ព្រឹកថ្ងៃទី២៣តុលា សមត្ថកិច្ចនៅមិនទាន់ឃាត់ខ្លួនអ្នក បើកបររថយន្ត ដឹកដីជ្រុលចង្កូតបុកម៉ូតូបណ្ដាលឲ្យជនជាតិគ្រឹងម្នាក់និងទំពូនម្នាក់ស្លាប់កាលពីរសៀលថ្ងៃទី២២ ខែតុលាឆ្នាំ២០២៣ ចំណុចការដ្ឋានផ្លូវលំមួយខ្សែក្នុងភូមិជ្រុងឃុំកិចុងស្រុកបរកែវខេត្តរតនគិរីនៅឡើយ។
![](https://cambodiaflashnews.com/wp-content/uploads/2021/06/top-banner.gif)
សមត្ថកិច្ចបានឲ្យដឹងថា ជនរងគ្រោះទី១ឈ្មោះថូ ញ៉ស់ ភេទប្រុស អាយុ៤១ឆ្នាំ ជនជាតិគ្រឹង ជាអ្នកបើកម៉ូតូ និងទី២ឈ្មោះរម៉ាស់ រើន ភេទប្រុស អាយុ៣៧ឆ្នាំ ជនជាតិទំពូន។អ្នកទាំងពីរ មានទីលំនៅភូមិជ្រុង ឃុំកិចុង ស្រុកបរកែវ។
មន្ត្រីប៉ូលិសមូលដ្ឋានបានឲ្យដឹងថា ករណីគ្រោះថ្នាក់ចរាចរខាងលើនេះគឺបង្កឡើងដោយសារតៃកុងបើកបរធ្វេសប្រហែស បើកក្នុងល្បឿនលឿនពេក ពេលមកដល់ផ្លូវកោងជ្រុលហួសចូលទៅគន្លងខាងផ្លូវម៉ូតូដែលបើកបញ្ច្រាសទិសគ្នា ពីត្បូងទៅជើងហើយឡានក៏បើកបុកម៉ូតូចំពីមុខពេញមួយទំហឹង បណ្ដាលឲ្យមនុស្សពីរនាក់ស្លាប់ចោលប្រពន្ធកូន។
ក្រោយមានហេតុការណ៍កើតឡើង សមត្ថកិច្ចចុះពិនិត្យកន្លែងកើតហេតុនិងបានប្រគល់សពឲ្យសាច់ញតិ ដើម្បីធ្វើបុណ្យតាមប្រពៃណី ។ចំណែកម៉ូតូដែលខូចខាតទាំងស្រុង យកទៅរក្សាទុកនៅប៉ុស្ដិ៍រដ្ឋបាលឃុំកិចុង បណ្ដោះអាសន្ន។ឯឡានបង្កបានដកហូតយកទៅទុកនៅអធិការស្រុកបរកែវ។
ជុំវិញករណីគ្រោះថ្នាក់ចរាចរខាងលើនេះដែរម្ចាស់ការដ្ឋានខាងកងវិស្វកម្មចូលរួមបុណ្យជាថវិកា២ លានរៀលសិនជំនួសតៃកុងរថយន្តដែលរត់គេច។ក៏ប៉ុន្តែក្រុមគ្រួសារជនជាតិដើមភាគតិចដែលរងគ្រោះថ្នាក់ពុំទាន់ទទួលយកសំណងនៅឡើយដោយលើកហេតុផលថាចំណាយបុណ្យអស់ជាង ៤ លានរៀលបូកទាំងទិញក្របី,ក្តារមឈូសស្រាពាងរៀបចំពិធីបុណ្យតាមប្រពៃណីជនជាតិដើមភាគតិច៕