ប្រែសម្រួល៖សហការី
![](https://cambodiaflashnews.com/wp-content/uploads/2021/06/top-banner.gif)
នៅក្នុងសុន្ទរកថាដ៏រំជើបរំជួលទៅកាន់ប្រជាជាតិ ពីការិយាល័យបច្ចកោណជាកន្លែងដែលគាត់បានរៀបចំជំនួយដល់អ៊ុយក្រែន និងអ៊ីស្រាអែលកាលពីថ្ងៃព្រហស្បតិ៍ លោកប្រធានាធិបតី Joe Biden បាននិយាយថា ក្រុមហាម៉ាស និងរុស្ស៊ី កំពុង “បំផ្លាញ” លទ្ធិប្រជាធិបតេយ្យ ដែលសហរដ្ឋអាមេរិកយល់ថាវាមានសារសំខាន់ខ្លាំងណាស់ក្នុងការផ្តល់ជំនួយអាមេរិកដល់អ៊ីស្រាអែល និងអ៊ុយក្រែនឲ្យបានឆាប់បំផុត។
លោក Biden បានសង្កត់ធ្ងន់ដំបូងគេទៅលើក្រុម Hamas និងលោកប្រធានាធិបតីរុស្ស៊ី លោក Vladimir Putin “ជាក្រុមគំរាមកំហែងដែលមានទម្រង់ខុសៗគ្នា ប៉ុន្តែពួកគេបានផ្តល់នូវបទពិសោធដល់យើងដូចៗគ្នា៖ ក្រុមទាំងពីរនេះមានគោលដៅចង់បំផ្លាញលទ្ធិប្រជាធិបតេយ្យរបស់ប្រទេសដែលនៅជិតខាងពួកគេឲ្យអស់ទាំងស្រុងតែម្តង”។
លោកបានលើកឡើងថា លោកនឹងស្នើសុំទៅកាន់សភានៅថ្ងៃសុក្រ ដើម្បីអនុម័តការផ្តល់មូលនិធិដ៏ច្រើនសម្រាប់អ៊ុយក្រែន និងអ៊ីស្រាអែល ដោយលើកហេតុផលថាវាគឺជាការវិនិយោគសម្រាប់អនាគតរបស់អាមេរិកក្នុងនាមជាមេដឹកនាំពិភពលោក។
អ្នកប្រជាធិបតេយ្យចាស់វស្សាវ័យ ៨០ ឆ្នាំរូបនេះបាននិយាយនៅក្នុងសុន្ទរកថាទីពីរអំពីតំណែងប្រធានាធិបតីរបស់គាត់ដែលថ្លែងនៅពីខាងក្រោយតុ Resolute Desk ថា “គឺជាការវិនិយោគដ៏ឆ្លាតវៃដែលនឹងផ្តល់បុព្វលាភសម្រាប់សន្តិសុខអាមេរិកបានច្រើនជំនាន់ថែមទៀត” ។
លោកបានគូសបញ្ជាក់ថា “ភាពជាអ្នកដឹកនាំរបស់អាមេរិកគឺជាអ្នកដែលលធ្វើឱ្យពិភពលោកទាំងមូលរួបរួមគ្នា។ សម្ព័ន្ធភាពរបស់អាមេរិកគឺជានយោបាយថែរក្សាអាមេរិកឲ្យមានសុវត្ថិភាពជានិរន្ត។ តម្លៃតបស្នងរបស់អាមេរិកគឺធ្វើឲ្យអាមេរិកក្លាយជាដៃគូដ៏សំខាន់ដែលប្រទេសផ្សេងៗទៀតលើសាកលលោកចង់ធ្វើការជាមួយ” ។
គាត់បានថ្លែងថា “អាមេរិកគឺជានិមិតសញ្ញាដ៏គំរូមួយសម្រាប់ពិភពលោក។
ក្នុងដំណើរទស្សនកិច្ចដ៏កក្រើកមួយទៅកាន់ប្រទេសអ៊ីស្រាអែលនៅក្នុងសប្តាហ៍នេះ លោក Biden ចង់យកចិត្តអ្នកបោះឆ្នោតដែលគាំទ្រគាត់ហើយមានការធុញទ្រាន់នឹងសង្គ្រាម និងគណបក្សសាធារណរដ្ឋដែលមាននិន្នាការរឹងរូស ខណៈដែលគាត់បាននិងកំពុងបង្កើនយុទ្ធនាការប្រកួតប្រជែងសម្រាប់ការជ្រើសរើសរូបគាត់ឡើងវិញម្តងទៀតនៅក្នុងឆ្នាំ ២០២៤ ខាងមុខនេះ។
សេតវិមានត្រូវបានគេនិយាយថាកំពុងរៀបចំសំណើដ៏ធំមួយទៅកាន់សភាសម្រាប់កញ្ចប់ថវិកាចំនួន ១០០ ពាន់លានដុល្លារអាមេរិក ដែលនឹងរួមបញ្ចូលនូវការផ្តល់មូលនិធិសម្រាប់អ៊ីស្រាអែលក្នុងសង្គ្រាមរបស់ខ្លួនជាមួយក្រុមហាម៉ាស និងសម្រាប់ការប្រយុទ្ធរបស់អ៊ុយក្រែនប្រឆាំងនឹងការឈ្លានពានរបស់រុស្ស៊ីផងដែរ។
ការភ្ជាប់ជម្លោះពីរជាមួយគ្នានៅមហាសមុទ្រដ៏សែនឆ្ងាយពីសហរដ្ឋអាមេរិកគឺជាការតាមប្រមាញ់របស់លោក Biden ក្នុងការតស៊ូដ៏ស្វិតស្វាញខ្លាំងជាងមុននៅក្នុងការរៀបចំសណ្តាប់ធ្នាប់ពិភពលោក និងកិច្ចការពារជនជាតិអាមេរិកនៅក្នុងផ្ទះរបស់ខ្លួន។
- ការជួបជុំនៅការិយាល័យបញ្ចកោណ
លោកប្រធានាធិបតីថ្លែងសុន្ទរកថាដ៏ឧឡារិកចេញពីការិយាល័យបញ្ចកោណដ៏កម្របំផុតគឺសម្រាប់តែនៅក្នុងគ្រាដែលមានសារសំខាន់សម្រាប់ប្រទេសជាតិ។
លោក Bidenបានថ្លែងសុន្ទរកថាលើកមុនតែមួយគត់ចេញពីទីនោះគឺនៅក្នុងខែមិថុនា នៅចំពេលដែលលោកបានសាទរចំពោះកិច្ចព្រមព្រៀងជាមួយសភា ដើម្បីបញ្ចៀសនូវមហន្តរាយបំណុលរបស់អាមេរិក។
ក៏ប៉ុន្តែឥឡូវនេះសភាបានក្លាយជាពិការភាពអស់រយៈពេលជាង ២ សប្តាហ៍មកហើយ ក្នុងខណៈដែលគណបក្សសាធារណរដ្ឋដែលគ្រប់គ្រងសំឡេងភាគច្រើននៅក្នុងសភាមានការបែកបាក់គ្នាដ៏ចម្រូងចម្រាស់ទទួលរងនូវការបរាជ័យម្តងហើយម្តងទៀតក្នុងការយល់ព្រមបោះឆ្នោតជ្រើសរើសប្រធានសភាថ្មី។
គណបក្សសាធារណរដ្ឋមានចរិករឹងរូសហើយចំនួនអ្នកបោះឆ្នោតក្នុងសភាក៏បានកើនឡើងប្រឆាំងយ៉ាងខ្លាំងទៅលើការបន្ថែមជំនួយសន្តិសុខចំនួន ៤៣.៩ ពាន់លានដុល្លារ ដែលសហរដ្ឋអាមេរិកបានប្តេជ្ញាចិត្តផ្តល់ឲ្យអ៊ុយក្រែន ចាប់តាំងពីទីក្រុងមូស្គូបានបើកការឈ្លានពានរបស់ខ្លួននៅក្នុងខែកុម្ភៈ ឆ្នាំ ២០២២កន្លងមក។
នៅលើប្រព័ន្ធផ្សព្វផ្សាយរបស់អាមេរិកបានរាយការណ៍ថាសំណើកញ្ចប់ថវិកាជំនួយនៅថ្ងៃសុក្រនឹងរួមបញ្ចូលទឹកប្រាក់ដល់ទៅ ១០ ពាន់លានដុល្លារសម្រាប់សង្គ្រោះបន្ទាន់ដល់អ៊ីស្រាអែលនិង ៦០ ពាន់លានដុល្លារសម្រាប់ផ្តល់ឲ្យអ៊ុយក្រែន។
នៅមុនពេលថ្លែងសុន្ទរកថា លោក Biden បាននិយាយជាមួយប្រធានាធិបតីអ៊ុយក្រែន Volodymyr Zelenskyy។
Zelensky បានស្វាគមន៍ចំពោះការបញ្ជូនកាំជ្រួចរយៈចម្ងាយឆ្ងាយ ATACMS ពីសហរដ្ឋអាមេរិកនាពេលថ្មីៗនេះ ដោយបន្ថែមថា “អ៊ុយក្រែនមានអំណរគុណចំពោះការគាំទ្រយូរអង្វែងរបស់សហរដ្ឋអាមេរិកក្នុងការប្រយុទ្ធដើម្បីសេរីភាពរបស់យើងហើយប្រឆាំងនឹងការឈ្លានពានរបស់រុស្ស៊ី” ។
លោក Biden ក៏បានកៀរគររកសំឡេងគាំទ្រដោយខិតខំដើរតួនាទីដ៏សំខាន់នៅក្នុងសង្រ្គាមអ៊ីស្រាអែល និងក្រុមហាម៉ាស ដែលលោកមើលឃើញថាអ្នកបោះឆ្នោតអាមេរិកមានទំនោរគាំទ្រយ៉ាងខ្លាំងលើអ៊ីស្រាអែល ទោះបីជាគណបក្សប្រជាធិបតេយ្យប្រកាន់ឆ្វេងនិយមប្រឆាំងនឹងជំហររបស់គាត់ក៏ដោយ។
នៅទីក្រុង Tel Aviv កាលពីថ្ងៃពុធ លោក Biden បានគាំទ្រអ៊ីស្រាអែល ខណៈដែលពួកគេកំពុងត្រៀមលក្ខណៈសម្រាប់ការចូលលុកលុយលើតំបន់ Gaza បន្ទាប់ពីមានការវាយប្រហារកាលពីថ្ងៃទី ៧ ខែតុលា ដោយក្រុមសកម្មប្រយុទ្ធប៉ាឡេស្ទីន Hamas ដែលបានសម្លាប់មនុស្សជាង ១,៤០០ នាក់។
លោកក៏បានចុះកិច្ចព្រមព្រៀងដើម្បីទទួលបានជំនួយខ្លះតាមរយៈអេហ្ស៊ីបចូលទៅក្នុងតំបន់ហ្គាហ្សាស្ទ្រីបដែលជាកន្លែងមានការទម្លាក់គ្រាប់បែកពីសំណាក់កងទ័ពអាកាសអ៊ីស្រាអែលដែលបានសម្លាប់ជនជាតិប៉ាឡេស្ទីនយ៉ាងហោចណាស់ ៣,៧៨៥ នាក់ ដែលភាគច្រើនជាជនស៊ីវិលស្លូត្រង់ នេះបើយោងតាមមន្រ្តីសុខាភិបាលរបស់ពួកហាម៉ាស។
ការគម្រាមកំហែងនៃជម្លោះនៅក្នុងតំបន់មជ្ឈិមបូព៌ាកាន់តែផ្ទុះរាលដាលធំឡើងហើយនៅក្នុងពេលនេះ។
សហរដ្ឋអាមេរិកបានប្តូរនាវាផ្ទុកយន្តហោះពីរគ្រឿងទៅកាន់សមុទ្រមេឌីទែរ៉ាណេភាគខាងកើត ដើម្បីរារាំងអ៊ីរ៉ង់ ឬក្រុមហេសបូឡា របស់លីបង់ ដែលជាសម្ព័ន្ធមិត្តរបស់ពួកហាម៉ាស ពីការចូលពាក់ព័ន្ធក្ន្ងងសង្រ្គាមជាមួយនឹងអ៊ីស្រាអែល ៕
ប្រភព៖ AFP