ដោយ៖សុខុម
បាត់ដំបង: ទើបតែបែកធ្លាយចុងក្រោយនេះមានករណីកម្មករដឹករ៉ែខ្មែរម្នាក់កំពុងដឹករ៉ែត្រូវរទេះគាបស្លាប់ក្នុងក្រុមហ៊ុនមួយក្នុងស្រុកភ្នំព្រឹក ជាទីតាំងដែលដាក់បម្រាមតឹងតែងបំផុតហាមមិនឲ្យចូលសូម្បីអាជ្ញាធរ ឬសមត្ថកិច្ច។
ប្រភពព័ត៌មានបង្ហើបដោយសមត្ថកិច្ចបានឲ្យដឹងថា÷ ករណីកម្មករខ្មែរស្លាប់ពេលកំពុងបំពេញការងារនេះបានកើតឡើងតាំងពីថ្ងៃទី១៨ ខែតុលា ឆ្នាំ២០២៣មកតែត្រូវបានខាងក្រុមហ៊ុនរ៉ែមាសដ៏អាថ៌កំបាំងខាងលើព្យាយាមលាក់បំបាំងរហូតដល់ថ្ងៃទី២០ ខែតុលានេះទើបលេចចេញជាព័ត៌មាន សូម្បីលោក ហេង បារាំង អធិការនគរបាលស្រុកភ្នំព្រឹកក៏បញ្ជាក់ថាមិនមានករណីនេះដែរនៅលើតំបន់គ្រប់គ្រងរបស់ខ្លួន។
បុរសជនរងគ្រោះដែលស្លាប់មានឈ្មោះសៀក ម៉េង អាយុ៣០ឆ្នាំ រស់នៅភូមិភ្នំព្រឹក ឃុំភ្នំព្រឹក ស្រុកភ្នំព្រឹក ខេត្តបាត់ដំបង។
នៅថ្ងៃកើតហេតុ ជនរងគ្រោះខណ:បើកកង់បីដឹករ៉ែដូចរាល់ដងចៃដន្យរទេះបានច្រឡោតបះកង់នាំឲ្យបាត់ការគ្រងរួចក៏បានជ្រុលរទេះទៅបុកផ្ទប់នឹងថ្មភ្នំបណ្តាលបុរសរងគ្រោះស្លាប់តែម្តង ពេលនោះសាច់ញាតិបានដឹកយកទៅកាន់មន្ទីពេទ្យដែរ តែជនរងគ្រោះបានស្លាប់បាត់ទៅហើយ។
សមត្ថកិច្ចតួនាទីជាអធិការរង ក៏ដូចជាប្រជាពលរដ្ឋជាច្រើននាក់កន្លងមកធ្លាប់បានលើកឡើងថា÷ ទីតាំងក្រុមហ៊ុនរ៉ែមាស ភូយ៉ាង នេះមានសន្តិសុខយាមកាមហាមចូលដ៏តឹងរ៉ឹងបំផុតមិនចំពោះប្រជាពលរដ្ឋ អ្នកសារព័ត៌មាន សមត្ថកិច្ច មន្ត្រីជំនាញ ឬអាជ្ញាធរមូលដ្ឋានឡើយ។
ករណីដដែលនេះចុងក្រោយគ្រួសារសាច់ញាតិបានត្រឹមយកសាកសពជនរងគ្រោះទៅធ្វើបុណ្យតាមប្រពៃណី ប៉ុន្តែការរ៉ាប់រងយ៉ាងណានោះនៅមិនដឹងនៅឡើយ៕