ប្រែសម្រួល៖សហការី
មេបញ្ជាការកងទ័ពជើងគោករបស់អ៊ីស្រាអែលកំពុងប្រមូលផ្តុំកងទ័ពសម្រាប់ការវាយលុកតាមជើងគោក។ លោក នាយករដ្ឋមន្ត្រី Benjamin Netanyahu បានចុះសួរសុខទុក្ខកងទាហាននៅជួរមុខជាប់នឹងតំបន់ Gaza ដោយលើកទឹកចិត្តដល់ពួកគេឲ្យប្រយុទ្ធយ៉ាងខ្លាំងក្លា “ដូចតោ” និង “យកឈ្នះដោយកម្លាំងអាវុធ” ។
រដ្ឋមន្ត្រីការពារជាតិ Yoav Gallant បាននិយាយលម្អិតអំពីគោលដៅបើកយុទ្ធនាការវាយលុកដោយទ័ពថ្មើរជើងចូលទៅក្នុងតំបន់ហ្គាហ្សាក្នុងគោលបំណងកំចាត់ក្រុមហាម៉ាសចោលឲ្យអស់ទាំងស្រុងតែម្តងដើម្បីលប់បំបាត់នូវការទទួលខុសត្រូវរបស់អ៊ីស្រាអែលលើបញ្ហាសុខសុវត្ថិភាពក្នុងតំបន់ហ្គាហ្សាស្ទ្រីបហើយនិងបង្កើតនូវយន្តការថែរក្សាសន្តិសុខថ្មីមួយនៅក្នុងតំបន់នេះ”។
ស្នងការជាន់ខ្ពស់អង្គការសហប្រជាជាតិទទួលបន្ទុកជនភៀសខ្លួនបាននិយាយកាលពីថ្ងៃសុក្រ ទី ២០ ខែតុលានេះ ថាការកើនឡើងនូវភាពតានតឹងដែលបណ្តាលមកពីសកម្មភាពយោធារបស់ភាគីជម្លោះណាមួយនឹងបង្កឲ្យមានគ្រោះ “មហន្តរាយដែលមិននឹកស្មានដល់” កើតឡើងចំពោះប្រជាជនស្លូតត្រង់ដែលរស់នៅក្នុងតំបន់ហ្គាហ្សាស្ទ្រីប។
- ជំនួយសម្រាប់យោធា និងមនុស្សធម៌
លោក ប្រធានាធិបតីអាមេរិក Joe Biden កំពុងខិតខំកៀរគររកមូលនិធិរាប់ពាន់លានដុល្លារដើម្បីជួយអ៊ីស្រាអែលក្នុងការប្រយុទ្ធប្រឆាំងនឹងក្រុមសកម្មប្រយុទ្ធហាម៉ាសដែលលោកបាននិយាយថាគាត់នឹងធ្វើសំណើជា “បន្ទាន់មួយ” ទៅកាន់សភាអាមេរិកសម្រាប់កញ្ចប់ជំនួយនៅថ្ងៃសុក្រនេះ។
ភ្នាក់ងាអង្គការសហប្រជាជាតិបាននិយាយថា ការផ្តល់ជំនួយមនុស្សធម៌ដំបូងទៅកាន់តំបន់ហ្គាហ្សាស្ទ្រីបតាមច្រករបៀងព្រំដែន Rafah ជាមួយអេហ្ស៊ីបគួរតែប្រព្រឹត្តទៅ “នៅថ្ងៃបន្ទាប់ជាបន្ទាន់”។
ប្រជាជនជាងមួយលាននាក់ក្នុងចំណោមប្រជាជន២,៤លាននាក់ក្នុងតំបន់ហ្គាហ្សាត្រូវបានភៀសខ្លួនចេញពីទីលំឋានរបស់ពួកគេ។
- ការភ័យខ្លាចសង្គ្រាមបានផ្ទុះឡើង
អ៊ីស្រាអែលកំពុងតែជម្លៀសប្រជាជនចេញពីទីក្រុង Kiryat Shmona នៅភាគខាងជើងនៃប្រទេសលីបង់ បន្ទាប់ពីមានការប៉ះទង្គិចគ្នាជាច្រើនថ្ងៃជាមួយក្រុមសកម្មប្រយុទ្ធហេសបូឡាតាមបណ្តោយព្រំដែន។
ការរីករាលដាលនូវអំពើហិង្សានៅក្នុងតំបន់ West Bank ដែលកំពុងកាន់កាប់ដោយអ៊ីស្រាអែលបានកើនឡើងខ្ពស់ជាហេតុបង្ករឲ្យមានការព្រួយបារម្ភថា វាអាចនឹងក្លាយទៅជារណសិរ្សមួយផ្សេងទៀតនៅក្នុងសង្រ្គាមដែលនឹងផ្ទុះឡើងកាន់តែធំជាងនេះទៀត។
សហរដ្ឋអាមេរិកបានធ្វើសេចក្តីថ្លែងការថា មាននាវាចម្បាំងកងទ័ពជើងទឹករបស់ខ្លួនមួយគ្រឿងដែលបានស្ទាក់ចាប់កាំជ្រួចដែលវាយប្រហារមកលើនាវាបានចំនួន ៣ គ្រាប់ និងយន្តហោះគ្មានមនុស្សបើកជាច្រើនគ្រឿងដែលបាញ់ចេញដោយក្រុមឧទ្ទាម Houthi នៅក្នុងប្រទេសយេម៉ែន។
អ្នកនាំពាក្យរបស់មន្ទីរប៉ង់តាហ្គោន បានបញ្ជាក់ថា ការវាយប្រហារនេះគឺ “មានគោលដៅប្រកបដោយសក្តានុពលផ្តោតមកលើប្រទេសអ៊ីស្រាអែល” ៕
ប្រភព៖ Agency