ប្រែសម្រួល៖សហការី
កាលពីថ្ងៃពុធ លោក វ្ល៉ាឌីមៀ ពូទីន ប្រធានាធិបតីរុស្ស៊ី បានបង្ហាញនូវភាពស្និទ្ធស្នាលគ្នាយ៉ាងស៊ីជម្រៅជាមួយនឹងលោកប្រធានាធិបតីចិនលោក ស៊ី ជីនពីង ក្នុងខណៈដែលលោកបានបង្ហាញខ្លួននៅលើវេទិការក្នុងនាមជាភ្ញៀវកិត្តិយសនៃពិធីជួបជុំជាសកលនៅទីក្រុងប៉េកាំងដែលជាកន្លែងមេដឹកនាំចិនលោក ស៊ី ជីនពីង បានលើកឡើងអំពី ចក្ខុវិស័យសម្រាប់ការផ្លាស់ប្តូរសណ្តាប់ធ្នាប់ពិភពលោក។
ក្នុងសុន្ទរកថាដែលមិនបានប្រាប់ជាមុនក្នុងឱកាសបើកវេទិកាខ្សែក្រវាត់ និងផ្លូវនោះ លោកពូទីនបានសាទរចំពោះគំនិតផ្តួចផ្តើមដែលជាគោលនយោបាយការបរទេសដ៏លេចធ្លោរបស់លោក Xi ថាជា “គោលបំណងមួយដើម្បីបង្កើតពិភពលោកមួយឱ្យប្រកបទៅដោយភាពយុត្តិធម៌ និងពហុប៉ូលជាសាកល”។
ប្រទេសស្ស៊ី និងចិនបានចែករំលែកនូវ “សេចក្តីប៉ងប្រាថ្នាលើកិច្ចសហប្រតិបត្តិការស្មើភាព និងដើម្បីផលប្រយោជន៍ទៅវិញទៅមក” ជារួមមានដូចជា “ការគោរពនូវអរិយធម៌ចម្រុះជាតិសាសន៍ និងសិទ្ធិរបស់រដ្ឋនីមួយៗសម្រាប់ជាដៃគូគំរូក្នុងការអភិវឌ្ឍប្រទេសរៀងៗខ្លួន” លោកបានបន្ថែមថា នៅក្នុងសន្ទុះជាក់ស្តែងដែលជាការប្រឆាំងទៅនឹងការលាបពណ៌ថាជាមេដឹកនាំរុស្ស៊ី និងចិនជាជនផ្តាច់ការដើម្បីលើកកម្ពស់តម្លៃមនុស្សជាតិ សិទ្ធិ និងសេរីភាពនយោបាយរបស់ប្រទេសនិមួយៗ។
លោក ពូទីន បានធ្វើសេចក្តីថ្លែងការនៅបន្ទាប់ពីលោក Xi ដែលបានស្វាគមន៍ដល់មេដឹកនាំពិភពលោកនិងគណៈប្រតិភូជាងមួយរយនាក់ទៅកាន់ព្រឹត្តិការណ៍រំលឹកខួបលើកទី ១០ នៃគំនិតផ្តួចផ្តើមខ្សែក្រវាត់ និងផ្លូវ ដែលជាគោលបំណងប្រកបដោយមហិច្ឆតាដែលនៅតែមានភាពចម្រូងចម្រាសចាក់ស្រេះនៅក្នុងការគាំទ្រដល់ការតភ្ជាប់ពាណិជ្ជកម្មនៅជុំវិញពិភពលោកជាមួយនឹងគម្រោងហេដ្ឋារចនាសម្ព័ន្ធរបស់ចិន។
លោក Xi បានកោតសរសើរចំពោះគំនិតផ្តួចផ្តើមរបស់ខ្លួនថាបានផ្តល់នូវគំរូអភិវឌ្ឍន៍ជាកម្លាំងចលករសម្រាប់ពិភពលោកដោយបញ្ជាក់ថាវា “បានបង្កើតក្របខ័ណ្ឌថ្មីសម្រាប់កិច្ចសហប្រតិបត្តិការអន្តរជាតិ” ។
ការប្រមូលផ្តុំគ្នានៅក្នុងមហាសាលប្រជាជននៅទីក្រុងប៉េកាំងបានធ្វើឡើងក្រោមស្រមោលនៃសង្រ្គាមនៅមជ្ឈិមបូព៌ាដែលគំរាមកំហែងដល់ការកើនឡើងទៅជាជម្លោះក្នុងតំបន់កាន់តែទូលំទូលាយ ហើយបានដើរតួជាការបង្ហាញពីការបែកបាក់កាន់តែស៊ីជម្រៅរវាងមហាអំណាចពិភពលោក។
នៅចំពេលដែលមេដឹកនាំ និងអ្នកតំណាងមកពីប្រទេសភាគច្រើននៅក្នុងសកលលោកនៃប៉ូលប៉ែកខាងត្បូងបានប្រមូលផ្តុំគ្នានៅក្នុងរដ្ឋធានីរបស់ប្រទេសចិន ប្រធានាធិបតីសហរដ្ឋអាមេរិកលោក Joe Biden គ្រោងនឹងទៅដល់ប្រទេសអ៊ីស្រាអែលនៅពេលក្រោយក្នុងថ្ងៃពុធនេះផងដែរក្នុងការបង្ហាញការគាំទ្រយ៉ាងម៉ឺងម៉ាត់ចំពោះសម្ព័ន្ធមិត្តរបស់ខ្លួន ដែលបានប្តេជ្ញាវាយកម្ទេចនិងលុបបំបាត់ក្រុមហាម៉ាសដែលជាក្រុមសកម្មប្រយុទ្ធអ៊ីស្លាមជ្រុលនិយមដ៏សាហាវឃោរឃៅឱ្យអស់ពីភពផែនដីនេះតែម្តងនេះជាប្រតិបត្តិការឆ្លើយតបទៅនឹងការវាយប្រហារដ៏ឃោរឃៅរបស់ក្រុមសកម្មប្រយុទ្ធអ៊ីស្លាមជ្រុលនិយមទៅលើអ៊ីស្រាអែលកាលពីដើមខែនេះ។
ចិន និងរុស្ស៊ីទាំងពីរបានប្រកាន់ជំហរកណ្តាលនិងខិតខំអំពាវនាវឱ្យមានបទឈប់បាញ់គ្នានៅក្នុងជម្លោះដែលកំពុងផ្ទុះរាលដាលកាន់តែកើនឡើងពាសពេញតំបន់មជ្ឈិមបូព៌ា ហើយក៏មិនបានថ្កោលទោសក្រុមសកម្មប្រយុទ្ធអ៊ីស្លាមជ្រុលនិយមហាម៉ាសដែលមានសភាពផ្ទុយគ្នាស្រឡះទៅនឹងសហរដ្ឋអាមេរិកនិងមេដឹកនាំនៅទូទាំងទ្វីបអឺរ៉ុបដែលបានបង្ហាញពីការគាំទ្រយ៉ាងពេញទំហឹងដល់អ៊ីស្រាអែល។
ចំណែកនៅលើវេទិកាខ្សែក្រវាត់ និងផ្លូវក្នុងក្រុងប៉េកាំងលោក អគ្គលេខាធិការអង្គការសហប្រជាជាតិ លោក Antonio Guterres បានអំពាវនាវឱ្យមានបទឈប់បាញ់ជាលក្ខខណ្ឌមនុស្សធម៌ជាបន្ទាន់។
“ខ្ញុំដឹងច្បាស់អំពីមហាទុក្ខសោកដ៏ជ្រាលជ្រៅបំផុតរបស់ប្រជាជនប៉ាឡេស្ទីនបន្ទាប់ពីការកាន់កាប់អស់រយៈពេលជាង ៥៦ ឆ្នាំ ប៉ុន្តែពេលនេះសេចក្តីសោកសៅឃើញថាមានសភាពធ្ងន់ធ្ងរជាងពេលណាៗទាំងអស់ គឺពួកគេមិនបានបង្ហាញអំពីជំហរដ៏ត្រឹមត្រូវសម្រាប់ការវាយប្រហារសងសឹកទៅលើអំពើភេរវកម្មរបស់ក្រុមសកម្មប្រយុទ្ធអ៊ីស្លាមជ្រុលនិយមហាម៉ាសប្រឆាំងនឹងជនស៊ីវិលដែលបានផ្ទុះឡើងកាលពីថ្ងៃទី ៧ ខែតុលា ដែលខ្ញុំបានធ្វើការថ្កោលទោសភ្លាមៗ” លោកបានថ្លែងដូច្នេះ។
ព្រឹត្តិការណ៍ដ៏មហាវិនាសកម្មទាំងនោះមិនអាចបង្ហាញពីភាពត្រឹមត្រូវហើយត្រូវបានចាត់ទុកថាវាបានប្រែក្លាយទៅជាការដាក់ទណ្ឌកម្មជារួមមកលើប្រជាជនប៉ាឡេស្ទីនទាំងមូលទៅវិញ។
លោក Xi មិនបាននិយាយអំពីជម្លោះរវាងអ៊ីស្រាអែលនិងក្រុមសកម្មប្រយុទ្ធអ៊ីស្លាមជ្រុលនិយមហាម៉ាសនៅក្នុងសុន្ទរកថារបស់គាត់នោះទេ តែគាត់បាននិយាយអំពីការផ្លាស់ប្តូរសណ្តាប់ធ្នាប់ពិភពលោករជាក់ស្តែងនៅក្នុងភាពជាអ្នកដឹកនាំតែម្តង។ លោកបានមានប្រសាសន៍ថា៖ “ការផ្លាស់ប្តូរសណ្តាប់ធ្នាប់ពិភពលោកក្នុងសម័យកាលរបស់យើងគឺមានសារសំខាន់ជាប្រវត្តិសាស្ត្រហើយកំពុងលេចធ្លោឡើងដែលមិនធ្លាប់មានពីមុនមកនោះទេ។
“ចិនកំពុងខិតខំប្រឹងប្រែងអភវឌ្ឍន៏ឱ្យខ្លួនក្លាយទៅជាមហាប្រទេសដ៏រឹងមាំមួយ និងធ្វើឱ្យប្រជាជាតិចិនរស់នៅក្នុងសភាពដ៏ស្រស់បំព្រងនិងជ្រះថ្លាលើគ្រប់វិស័យតាមរយះការបន្តធ្វើទំនើបកម្មបច្ចេកវិទ្យារបស់ខ្លួន។ ទំនើបភាវូបនីយកម្មដែលចិនកំពុងរត់រកគឺមិនមែនសម្រាប់ប្រទេសចិនតែមួយនោះទេ ក៏ប៉ុន្តែសម្រាប់បណ្តាប្រទេសដែលកំពុងអភិវឌ្ឍន៍ទាំងអស់ក្នុងសាកលលោកតាមរយៈកិច្ចខិតខំប្រឹងប្រែងរួមគ្នាឱ្យកាន់តែស៊ីជម្រៅថែមទៀត”។
ក្នុងការវាយប្រហារតាមវោហាសាស្ត្រកំបាំងមុខដែលទំនងជាសំដៅលើសហរដ្ឋអាមេរិក មេដឹកនាំចិនបាននិយាយថា ចិនប្រឆាំងនឹងការដាក់ទណ្ឌកម្មជាឯកតោភាគី ការដាក់សម្ពាធជាលក្ខណបង្ខិតបង្ខំលើវិស័យសេដ្ឋកិច្ច ការផ្តាច់ចំណងទំនាក់ទំនង និងការរំខានដល់ចង្វាក់ផ្គត់ផ្គង់លទ្ធកម្មគ្រប់ប្រភេទ។
លោកបានមានប្រសាសន៍ថា “ការប្រឈមមុខដាក់គ្នាខាងមនោគមវិជ្ជា ការប្រជែងភូមិសាស្ត្រនយោបាយ និងនយោបាយប្រកាន់ប៉ូលនិងប្លុកមិនមែនជាជម្រើសសម្រាប់យើងទៀតនោះទេ”។
“ការតាមមើលការអភិវឌ្ឍន៍របស់អ្នកដទៃក្នុងបំណងជាន់ពន្លិចគឺជាការគំរាមកំហែងមួយដ៏ធ្ងន់ធ្ងរ ឬក៏ទទួលយកការពឹងពាក់គ្នាទៅវិញទៅមកខាងសេដ្ឋកិច្ចដែលគេចាត់ទុកថាជាហានិភ័យសម្រាប់គេដែលមិនធ្វើឱ្យជីវិតរបស់គេកាន់តែប្រសើរឡើងហើយក៏មិនព្រមងាកមកបង្កើនល្បឿនអភិវឌ្ឍន៍របស់ខ្លួននោះទេ”។
មេដឹកនាំពិភពលោកផ្សេងទៀតដែលចូលរួម រួមទាំងប្រធានាធិបតីកាហ្សាក់ស្ថាន Kassym-Jomart Tokayev និងលោក Joko Widodo របស់ប្រទេសឥណ្ឌូនេស៊ី ក៏បានថ្លែងសុន្ទរកថាផងដែរ ជាមួយនឹងការអំពាវនាវជាច្រើនរបស់លោក Xi ឱ្យបង្កើនការអភិវឌ្ឍន៍ជាសកល និងពិភពលោកមានកិច្ចសហប្រតិបត្តិការជាពហុភាគី។
លោក ស៊ី និងពូទីន បានជួបពិភាក្សាគ្នាបន្ទាប់ពីព្រឹត្តិការណ៍នេះ ដោយហៅលោកពូទីនថា “មិត្តចាស់របស់ខ្ញុំ” លោក Xi បានសាទរចំពោះការធ្វើឱ្យកាន់តែស៊ីជម្រៅនៃការជឿទុកចិត្តផ្នែកនយោបាយរវាងប្រជាជាតិទាំងពីរ និង “ការសម្របសម្រួលយុទ្ធសាស្ត្រដ៏ជិតស្និទ្ធ និងប្រកបដោយប្រសិទ្ធភាពរបស់ពួកគេ” ទូរទស្សន៍រដ្ឋរបស់ប្រទេសចិន CCTV បានរាយការណ៍អំពីព្រឹត្តិការណ៍នេះ។
ដំណើរទស្សនកិច្ចទៅកាន់ទីក្រុងប៉េកាំងគឺជាដំណើរនៅក្រៅប្រទេសដ៏កម្រមួយសម្រាប់លោកពូទីន ដែលលោកបារម្ភពី តុលាការឧក្រិដ្ឋកម្មអន្តរជាតិចាប់ខ្លួនពីបទឧក្រិដ្ឋកម្មសង្រ្គាមនៅអ៊ុយក្រែន។
ជំនួបរបស់លោកជាមួយលោក Xi ធ្វើឡើងនៅពេលដែលរុស្ស៊ីបន្តធ្វើការវាយប្រហារបំផ្លិចបំផ្លាញលើអ៊ុយក្រែន ជាកន្លែងដែលមនុស្សពីរនាក់ត្រូវបានសម្លាប់កាលពីថ្ងៃពុធ បន្ទាប់ពីការវាយប្រហារដោយកាំជ្រួចរបស់រុស្ស៊ីទៅលើទីក្រុង Zaporizhzhia នេះបើយោងតាមមន្ត្រីអ៊ុយក្រែន។
- ការដាក់ជំនួសមេដឹកនាំលំដាប់ពិភពលោក
លោក Xi ដែលជាមេដឹកនាំចិនដ៏មានឥទ្ធិពលបានអះអាងជារឿយៗថានៅក្នុងរយៈពេលជាច្រើនទសវត្សរ៍នេះ ចិនបាននិងកំពុងបង្កើនកិច្ចខិតខំប្រឹងប្រែងដើម្បីដាក់ចេញនូវគោលដៅសម្រាប់ប្រទេសចិនជាអ្នកដឹកនាំជំនួសឱ្យសហរដ្ឋអាមេរិក ជាមួយនឹងចក្ខុវិស័យធានានិរន្តរភាពសន្តិសុខសាកល និងការអភិវឌ្ឍន៍ពិភពលោក។
ការធ្វើជាម្ចាស់ផ្ទះនៅក្នុងទីក្រុងប៉េកាំង ដែលជាព្រឹត្តិការណ៍អន្តរជាតិដ៏សំខាន់ដំបូងបង្អស់របស់ប្រទេសចិន ចាប់តាំងពីការបិទបញ្ចប់នៃជំងឺរាតត្បាត Covid-19 គឺជាផ្នែកមួយដ៏សំខាន់នៃការលើកស្ទួយរបស់គាត់ក្នុងលើទស្សនៈវិស័យតម្រង់ទិសទៅកាន់ប្រទេសនានា ដែលខ្លួនបានបង្កើតឡើងនូវទំនាក់ទំនងយ៉ាងជិតស្និទ្ធដ៏ស៊ីជម្រៅជាមួយនៅក្នុងរយៈពេលជាងមួយទសវត្សរ៍កន្លងមកនេះ ខណៈដែលលោក Xi បានផ្តោតគោលដៅលើការពង្រីកវិសាលភាពឱ្យបានទូលំទូលាយដែលជះឥទ្ធិពលជាលក្ខណៈសកល។
មេដឹកនាំពិភពលោក តំណាង និងគណៈប្រតិភូមកពី ១៤០ ប្រទេស រួមទាំងនៅមជ្ឈិមបូព៌ា និងពួកតាលីបង់ កំពុងចូលរួមក្នុងការជួបជុំនេះ រំលឹកខួបមួយទសវត្សរ៍ចាប់តាំងពីការចាប់ផ្តើមគំនិតផ្តួចផ្តើមខ្សែក្រវាត់ និងផ្លូវដ៏ល្បីល្បាញរបស់លោក Xi។
ប៉ុន្តែវាក៏មានកើតឡើងផងដែរ នៅពេលដែលប្រទេសចិនកំពុងប្រឈមមុខនឹងបញ្ហាខ្លាំងនៅក្នុងផ្ទះរបស់ខ្លួន ជាមួយនឹងសេដ្ឋកិច្ចដាំក្បាលចុះ ភាពអត់ការងារធ្វើហក់ឡើងខ្ពស់ និងការរង្គោះរង្គើច្របូកច្របល់ដែលមិនអាចពន្យល់បាននាពេលថ្មីៗនេះនៅថ្នាក់លើរបស់បក្សកុម្មុយនិស្តដែលកំពុងកាន់អំណាច។
ក្រុងប៉េកាំងមិនមានឆន្ទះក្នុងការបំភ្លឺលើបញ្ហាប្រឈមទាំងនេះនៅក្នុងពេលជួបជុំគ្នាដោយសារតែចង់បង្ហាញពីអំណាចរបស់ខ្លួន និងធ្វើឲ្យគេកោតសរសើរចំពោះការរួមចំណែករបស់ខ្លួនក្នុងការអភិវឌ្ឍជាសាកលដែលជាគំរូចម្បងដើម្បីទទួលបានការគាំទ្រ។
គោលនយោបាយការបរទេសដែលចុះហត្ថលេខាបង្គ្រប់ហិរញ្ញប្បទានចិនរាប់រយពាន់លានដើម្បីសាងសង់កំពង់ផែ ស្ថានីយថាមពល ស្ពាន ផ្លូវដែក និងផ្លូវជុំវិញពិភពលោក ដើម្បីពង្រីកផលប្រយោជន៍ និងឥទ្ធិពលជាលក្ខណអន្តរជាតិសម្រាប់ប្រទេសចិនដែលមានសារសំខាន់នៅក្នុងគម្រោងផ្លូវនិងខ្សែក្រវាត់។
ប្រទេសជាង ១៥០ ក៏បានចូលសហការលើកម្មវិធីនេះ ដែលទីក្រុងប៉េកាំងនិយាយថាបានកៀរគរថវិការបានចំនួន “រហូតដល់មួយពាន់ពាន់លានដុល្លារក្នុងការវិនិយោគ” ដែលជំរុញឱ្យមានកំណើនសដ្ឋកិច្ចនៅក្នុងប្រទេសដែលកំពុងអភិវឌ្ឍន៍។
ប៉ុន្តែវាក៏មានការប្រឈមទៅនឹងការកើនឡើងនៅពេលដែលចរន្តកំណើនសេដ្ឋកិច្ចរបស់ប្រទេសចិនធ្លាក់ចុះនៅចំពេលដែលស្ថិរភាពហិរញ្ញវត្ថុមានការប្រែប្រួលនៅជុំវិញពិភពលោក និងការចោទឡើងជាបញ្ហាលើការចំណាយខ្ពស់សម្រាប់ប្រទេសនានាដែលជាប់បំណុលដែលនិងរងផលប៉ះពាល់យ៉ាងធ្ងន់ធ្ងរ។
អ្នកវិភាគបាននិយាយថា ភាពរីកចំរើននៃការកសាងហេដ្ឋារចនាសម្ព័ន្ធរបស់ប្រទេសចិនឥឡូវនេះបានធ្វើឱ្យប្រទេសនេះក្លាយជាអ្នកប្រមូលបំណុលដ៏ធំបំផុតលើពិភពលោក។
នៅក្នុងសុន្ទរកថារបស់លោកកាលពីថ្ងៃពុធ លោក Xi បានច្រានចោលការរិះគន់ ហើយបានបញ្ជាក់ឡើងវិញនូវការប្តេជ្ញាចិត្តរបស់លោកចំពោះគំនិតផ្តួចផ្តើមមួយនេះ។
“អ្វីដែលសម្រេចបានក្នុងរយៈពេល ១០ ឆ្នាំចុងក្រោយនេះ បានបង្ហាញថា កិច្ចសហប្រតិបត្តិការខ្សែក្រវាត់ និងផ្លូវ គឺស្ថិតនៅផ្លូវដ៏ត្រឹមត្រូវនៃកង់ប្រវត្តិសាស្ត្រ។ វាជាតំណាងឱ្យការជឿនលឿននៃសម័យកាលរបស់យើង ហើយវាជាមាគ៌ាដែលឆ្ពោះទៅមុខជានិច្ចនិរន្ត”។
លោក Xi ក៏បានលើកឡើងអំពីផែនការសកម្មភាពប្រាំបីមុំលើគំនិតផ្តួចផ្តើមខ្សែក្រវាត់ និងផ្លូវ រួមទាំងការដកចេញទាំងស្រុងនូវការរឹតបន្តឹងលើការវិនិយោគបរទេសនៅក្នុងលទ្ធកម្មរបស់ចិន និងគំនិតផ្តួចផ្តើមស្តីពីការគ្រប់គ្រងបញ្ញាសិប្បនិម្មិតជាសកលផងដែ៕