ប្រែសម្រួល៖ រតនា
វ៉ាស៊ីនតោន៖ រដ្ឋមន្ត្រីការពារជាតិអាម៉េរិក លោក Lloyd Austin បាននិយាយថា សហរដ្ឋអាម៉េរិកនឹងបញ្ជូននាវា និងយន្តហោះយោធាជាច្រើនគ្រឿងទៅកាន់ប្រទេសអ៊ីស្រាអែល ដើម្បីជាការបង្ហាញពីការគាំទ្រ ដោយទីក្រុងវ៉ាស៊ីនតោនជឿជាក់ថា ការវាយប្រហារដ៏សាហាវរបស់ពួកហាម៉ាសអាចនឹងត្រូវបានជំរុញឱ្យរំខានដល់ការធ្វើឱ្យមានប្រក្រតីភាពនៃទំនាក់ទំនងអ៊ីស្រាអែល និងអារ៉ាប៊ីសាអូឌីត។
ក្រុមយុទ្ធជនហាម៉ាសបានវាយលុកតាមទីប្រជុំជនអ៊ីស្រាអែល ខណៈប្រទេសនេះបានរងនូវថ្ងៃបង្ហូរឈាមបំផុតក្នុងរយៈពេលជាច្រើនទសវត្សរ៍កាលពីថ្ងៃសៅរ៍។ អ៊ីស្រាអែលបានវាយប្រហារជនប៉ាឡេស្ទីនដោយការវាយប្រហារតាមអាកាសនៅតំបន់ហ្គាហ្សាកាលពីថ្ងៃអាទិត្យ (៨ តុលា) ដោយរាប់រយនាក់ត្រូវបានគេរាយការណ៍ថាបានស្លាប់ទាំងសងខាង។ អំពើហិង្សាដែលកំពុងកើនឡើងគម្រាមចាប់ផ្តើមសង្រ្គាមថ្មីដ៏ធំមួយនៅមជ្ឈិមបូព៌ា។
CNN បានរាយការណ៍កាលពីថ្ងៃអាទិត្យដោយដកស្រង់សំណេររបស់សហរដ្ឋអាម៉េរិកថាយ៉ាងហោចណាស់មានជនជាតិអាម៉េរិកបីនាក់ក្នុងចំណោមអ្នកដែលត្រូវបានសម្លាប់។
Austin នៅក្នុងសេចក្តីថ្លែងការណ៍មួយបាននិយាយថា លោកបានបញ្ជាឱ្យផ្លាស់ប្តូរក្រុម USS Gerald R Ford Carrier Strike Group ទៅកាន់សមុទ្រមេឌីទែរ៉ាណេភាគខាងកើត ខិតទៅជិតអ៊ីស្រាអែល។ កម្លាំងនោះរួមមាននាវាផ្ទុកយន្តហោះ នាវាផ្ទុកមីស៊ីលដឹកនាំ និងនាវាពិឃាតមីស៊ីលដឹកនាំ៤គ្រឿង ។
លោក Austin ក៏បាននិយាយផងដែរថា សហរដ្ឋអាម៉េរិកក៏បានចាត់វិធានការដើម្បីបង្កើនកងយន្តហោះចម្បាំង F-35, F-15, F-16 និង A-10 របស់កងទ័ពអាកាសអាម៉េរិកនៅក្នុងតំបន់។ លោកថា សហរដ្ឋអាម៉េរិកក៏នឹងផ្តល់អាវុធដល់អ៊ីស្រាអែលផងដែរ។
សេតវិមានបាននិយាយបន្ទាប់ពីការហៅរបស់ពួកគេថា ប្រធានាធិបតីអាម៉េរិក Joe Biden បានប្រាប់នាយករដ្ឋមន្ត្រី Benjamin Netanyahu កាលពីថ្ងៃអាទិត្យថា ជំនួយបន្ថែមសម្រាប់កងកម្លាំងការពារអ៊ីស្រាអែលកំពុងធ្វើដំណើរទៅកាន់ប្រទេសអ៊ីស្រាអែល ហើយអ្វីៗជាច្រើនទៀតនឹងកើតឡើងក្នុងរយៈពេលប៉ុន្មានថ្ងៃខាងមុខនេះ។ អនុប្រធានាធិបតីអាមេរិក Kamala Harris ក៏បានជួបសន្ទនាជាមួយប្រធានាធិបតីអ៊ីស្រាអែល Isaac Herzog ផងដែរ។
មន្ទីរបញ្ចកោណនៅក្នុងសេចក្តីថ្លែងការណ៍បាននិយាយថា Austin បាននិយាយទៅកាន់រដ្ឋមន្ត្រីការពារជាតិអ៊ីស្រាអែល Yoav Gallant ដើម្បីធ្វើបច្ចុប្បន្នភាពអំពីការឆ្លើយតបរបស់សហរដ្ឋអាម៉េរិក និង “ដើម្បីបង្ហាញពីការគាំទ្រសម្រាប់ប្រជាជនអ៊ីស្រាអែល និងដើម្បីទទួលបានព័ត៌មានថ្មីៗអំពីប្រតិបត្តិការរបស់អ៊ីស្រាអែលក្នុងការស្តារសន្តិសុខ និងសុវត្ថិភាពពីការវាយប្រហាររបស់ក្រុមហាម៉ាស”៕