ដោយ:សុខុម
សៀមរាប ៖ក្រោយបុរសម្នាក់ត្រូវគេសម្លាប់អូសសពយកទៅទម្លាក់ចោលនៅប្រឡាយទឹកបង្កការភ្ញាក់ផ្អើលកាលពីថ្ងៃទី ៨ តុលា មកដល់ពេលនេះសមត្ថកិច្ចនគរបាលខេត្តសៀមរាប ចាប់ខ្លួនជនដៃដល់ពីរនាក់ប្ដីប្រពន្ធបានហើយនៅថ្ងៃទី៩ ខែតុលាឆ្នាំ២០២៣។
សូមរំលឹកថា បុរសម្នាក់ មានមុខរបរជាអ្នកហៅម៉ូយដាក់រថយន្តត្រូវគេសម្លាប់នៅជិតភោជនីយដ្ឋានអាប៉ូឡូផ្លាហ្សា ថ្លុកទឹកមាត់ប្រឡាយជាប់ផ្លូវជាតិលេខ៦A ស្ថិតនៅភូមិខ្នារ សង្កាត់ជ្រាវ ក្រុងសៀមរាប កាលពីរំលងអធ្រាត្រឈានចូលថ្ងៃទី ៨ តុលាឆ្នាំ២០២៣។
ក្រោយមានអំពើឃាតកម្មកើតឡើង លោកឧត្តមសេនីយ៍ទោ តេង ច័ន្ទណាត ស្នងការនគរបាលខេត្តសៀមរាបបានបញ្ជាកម្លាំងជំនាញចុះស្រាវជ្រាវជាបន្ទាន់ និងមាន កិច្ចសម្របសម្រួលនីតិវិធីពីឯកឧត្តម មាស ច័ន្ទពិសិដ្ឋ ព្រះរាជអាជ្ញា នៃអយ្យការអមសាលាដំបូងខេត្តសៀមរាប។
សមត្ថកិច្ចចាប់ផ្ដើមបើកការស្រាវជ្រាវ ស៊ើបអង្កេត ដោយប្រើកម្លាំងនគរបាលព្រហ្មទណ្ឌកម្រិតធ្ងន់ និងកម្លាំងនគរបាលស្រុកសូទ្រនិគម កំណត់បានមុខសញ្ញាសង្ស័យចំនួន ២នាក់ មានឈ្មោះដូចខាងក្រោម: ១.ឈ្មោះ ហូល ហៃ ហៅ ម៉ែន ភេទប្រុស អាយុ ៣១ឆ្នាំ មុខរបរ កម្មករ ទីកន្លែងកំណើត និងទីលំនៅបច្ចុប្បន្នភូមិបេង ឃុំដានរុន ស្រុកសូទ្រនិគម ខេត្តសៀមរាប។២.ឈ្មោះ កឿម កាន ភេទស្រី អាយុ ២៨ឆ្នាំ មុខរបរ កម្មករ ទីកន្លែងកំណើត និងទីលំនៅបច្ចុប្បន្នភូមិបេង ឃុំដានរុន ស្រុកសូទ្រនិគម ខេត្តសៀមរាប ពាក់ព័ន្ធនឹងករណីឃាតកម្ម កើតហេតុវេលាម៉ោង ០២ និង៣០នាទីរំលងអធ្រាត្រឈានចូលថ្ងៃទី០៨ ខែតុលា ឆ្នាំ២០២៣ មាត់ប្រឡាយជាប់ផ្លូវជាតិលេខ៦A ស្ថិតនៅភូមិខ្នារ សង្កាត់ជ្រាវ ក្រុងសៀមរាប។
ក្រោយពេលឃាត់ខ្លួន នៅចំពោះមុខសមត្ថកិច្ចជនសង្ស័យឈ្មោះ ហូល ហៃ ហៅ ម៉ែន បានសារភាពថា ពិតជាបានសម្លាប់ជនរងគ្រោះប្រាកដមែន ដោយនៅវេលាម៉ោង០២និង០០នាទី រំលងអធ្រាត្រឈានចូលថ្ងៃទី៨ ខែតុលា ឆ្នាំ២០២៣ រូបគេបានបើកម៉ូតូឌុបប្រពន្ធ ប្រដាប់ដោយកាំបិតផ្គាក់១ដើម ចេញពីផ្ទះនៅភូមិបេង ឃុំដានរុន ស្រុកសូទ្រនិគម មករកគូទំនាស់នៅចំណុចតូបលក់បាយកន្លែងកើតហេតុ ព្រោះជនរងគ្រោះជាគូទំនាស់តែងតែដេកនៅទីនោះរៀងរាល់យប់។
ពេលទៅដល់រូបគេបានចុះពីម៉ូតូកាប់ជនរងគ្រោះ ដោយប្រើដៃទាំងសងខាង កាប់ចំក ផ្នែកខាងមុខចំនួន ១កាំបិតខណៈដែលជនរងគ្រោះដេកផ្ងារ ភ្លាមនោះជនរងគ្រោះបានប្រកាច់ចេញពីតូបលក់បាយទៅទិសខាងត្បូងផ្លូវជាតិលេខ៦ ហើយដួលផ្កាប់មុខនៅចិញ្ចើមផ្លូវ ហើយរូបគេបានកាប់បន្ថែមចំត្រង់ស្លាបប្រជៀវផ្នែកខាងស្តាំ ផ្នែកខាងក្រោយ ចំនួន ១កាំបិត និងកាប់ចំត្រង់ចង្កេះខាងស្តាំ ចំនួន ១កាំបិតទៀត បន្ទាប់មកបានឲ្យប្រពន្ធជួយលើកជនរងគ្រោះបោះចូលទៅក្នុងថ្លុកទឹកមាត់ប្រឡាយ ហើយបើកម៉ូតូគេចទៅផ្ទះវិញ ដោយយកក្រណាត់ជូតសម្អាតឈាមចេញពីកាំបិតលុះព្រឹកឡើង រូបគេបានសំលៀង និងលាងសម្អាតហើយយកទៅសៀតនៅលើធ្នឹមផ្ទះ។
ក្រណាត់ដែលប្រឡាក់ឈាមដាក់ដុតជាមួយគំនរសំរាមក្បែរផ្ទះ លុះដល់វេលាម៉ោង១២និង០០នាទី ថ្ងៃខែឆ្នាំដដែល ក៏ត្រូវបានសមត្ថកិច្ចចុះនាំខ្លួនតែម្តង។
ស្ត្រីជាប្រពន្ធជនសង្ស័យឈ្មោះ កឿម កាន អាយុ ២៨ឆ្នាំ បានសារភាពថា នៅមុនថ្ងៃកើតហេតុមួយសប្តាហ៍ ប្តីរបស់ខ្លួនមានទំនាស់ និងប្រើហិង្សាជាមួយជនរងគ្រោះខាងលើ ខណៈកំពុងអង្គុយផឹកស្រាសជុំគ្នា បន្ទាប់មកប្ដីរបស់នាងក៏បានសម្លាប់ជនរងគ្រោះតែម្ដងទៅ៕