ប្រែសម្រួល៖រតនា

អតីតប្រធាន FIFA លោក Sepp Blatter បានរិះគន់ការសម្រេចចិត្តរបស់ស្ថាប័នគ្រប់គ្រងបាល់ទាត់ពិភពលោកក្នុងការរៀបចំការប្រកួតបាល់ទាត់ពិភពលោកក្នុងប្រទេសចំនួនប្រាំមួយនៅទូទាំងទ្វីបចំនួនបី។

ម៉ារ៉ុក អេស្ប៉ាញ និងព័រទុយហ្គាល់ ត្រូវបានតែងតាំងជាម្ចាស់ផ្ទះនៃការប្រកួតឆ្នាំ 2030 ខណៈដែល អ៊ុយរូហ្គាយ អាហ្សង់ទីន និងប៉ារ៉ាហ្គាយ ក៏នឹងធ្វើជាម្ចាស់ផ្ទះការប្រកួតបើកឆាកផងដែរ ដើម្បីរំលឹកខួបមួយរយឆ្នាំនៃការប្រកួតនេះបើយោងតាមការប្រកាសដ៏គួរឱ្យភ្ញាក់ផ្អើលមួយកាលពីថ្ងៃពុធ (ទី 4 ខែតុលា) ។

ការសម្រេចចិត្តនេះត្រូវបានរិះគន់ដោយលោក Sepp Blatter ដែលជាប្រធាន FIFA ពីឆ្នាំ 1998 ដល់ឆ្នាំ 2015 មុនពេលត្រូវបានបណ្តេញចេញបន្ទាប់ពីការស៊ើបអង្កេតអំពើពុករលួយ។

លោក Blatter បាន​ប្រាប់​កាសែត​ស្វីស SonntagsBlick ថា​៖ «វា​ជា​រឿង​មិន​ទំនង​ទាល់​តែ​សោះ​ក្នុង​ការ​បំបែក​ការ​ប្រកួត​ដោយ​របៀប​នេះ»។

លោកបាននិយាយថា “ការប្រកួតវគ្គផ្តាច់ព្រ័ត្រ World Cup ត្រូវតែជាព្រឹត្តិការណ៍បង្រួម” ដោយបន្ថែមថានេះមានសារសំខាន់សម្រាប់អត្តសញ្ញាណនៃព្រឹត្តិការណ៍នេះ សម្រាប់អង្គការ និងសម្រាប់អ្នកទស្សនា។

Blatter ដែលធ្លាប់ជាឥស្សរជនដ៏មានឥទ្ធិពលបំផុតរបស់កីឡាបាល់ទាត់ ធ្លាប់បានរិះគន់ FIFA សម្រាប់ការផ្តល់រង្វាន់ការប្រកួតឆ្នាំ 2022 ដល់ប្រទេសកាតា ដោយនិយាយថាប្រទេសមជ្ឈិមបូព៌ាតូចពេក។

បុរសវ័យ 87 ឆ្នាំរូបនេះបាននិយាយថា ការប្រកួតឆ្នាំ 2030 គួរតែធ្វើឡើងនៅអាម៉េរិកខាងត្បូង ដែលជាការប្រារព្ធខួបលើកទី 100 នៃព្រឹត្តិការណ៍ដំបូងដែលត្រូវបានធ្វើជាម្ចាស់ផ្ទះ និងឈ្នះដោយអ៊ុយរូហ្គាយ៕