ដោយ:សុខុម
កោះកុង: ករណីភ្ញៀវទេសចរចំនួន២នាក់ស្លាប់ក្នុងទឹកនៅតំបន់ផ្ទះលំហែ ចំណុចទឹកស្ទឹង(ជំរំសត្វភេ) ស្ថិតក្នុងភូមិកំលត ឃុំជីផាត ស្រុកថ្មបាំង ខេត្តកោះកុង ការពិតត្រូវបានលាតត្រដាងឲ្យដឹងត្រឹមថ្ងៃទី៤ ខែតុលា ឆ្នាំ២០២៣។
ស្នងការដ្ឋាននគរបាលខេត្តកោះកុងបានស្រាយបំភ្លឺអំពីករណីភ្ញៀវទេសចរពីរនាក់ដែល បានបាត់បង់ជីវិតនៅចំណុចផ្ទះលំហែ។
កាលពីថ្ងៃទី២៤ ខែកញ្ញា ឆ្នាំ២០២៣ ក្រោយពេលកើតហេតុ សមត្ថកិច្ចបានបញ្ជាក់ថា យុវជនពីរនាក់បានទៅក្សាន្តនៅចំណុចស្ទឹងជំរំថ្មបាំង។ក្រោយក្រោយមកក៏ស្រាប់តែបាត់ខ្លួន សមត្ថកិច្ចចុះទៅពិនិត្យនិងរកឃើញសពអណ្ដែតក្នុងទឹកស្ទឹងរួចធ្វើការសន្និដ្ឋានជាបឋមថាករណីលង់ទឹកស្លាប់ មិនជាប់ពាក់ព័ន្ធអំពើឃាតកម្មឬអ្វីមួយនោះឡើយ។
សពទី១.ឈ្មោះខាត់ ប៊ុនណារ៉េត ភេទប្រុស អាយុ២២ឆ្នាំ ជនជាតិខ្មែរ មានទីលំនៅភូមិអង្គគគីរ ឃុំពពេល ស្រុកត្រាំកក់ ខេត្តតាកែវ និងទី២.ឈ្មោះហេង សុវណ្ណចន្ទពេជ្រ ភេទប្រុស អាយុ២២ឆ្នាំ ជនជាតិខ្មែរ មានទីលំនៅភូមិសុវណ្ណសាគរ ឃុំកំពង់កណ្ដាល ស្រុកកំពត ខេត្តកំពត។
ក្រោយពីមានការមន្ទិលសង្ស័យពីក្រុមគ្រួសារទៅលើចំណុចមួយចំនួនដែលមានស្លាកស្នាមសព សមត្ថកិច្ចក៏បានបង្កើតគណៈកម្មការចម្រុះមួយចុះធ្វើការស្រាវជ្រាវបន្ថែមទៀតជាបន្ទាន់ដើម្បីស៊ើបអង្កេតយ៉ាងយកចិត្តទុកដាក់។ក្រុមការងារបានហៅមនុស្សពាក់ព័ន្ធទាំងអស់នៅបម្រើការងារក្នុងផ្ទះលំហែ រួមទាំងម្ចាស់ដើម្បីស្រាយចម្ងល់រកមូលហេតុ។នៅពេលនោះក៏ស្រាប់តែលេចចេញតម្រុយអាថ៌កំបាំងដើមហេតុបង្កឲ្យភ្ញៀវទេសចរពីរនាក់ស្លាប់បាត់បង់ជីវិត។
តាមការសាកសួរបំភ្លឺអ្នកពាក់ព័ន្ធឃើញថាម្ចាស់ទីតាំងឈ្មោះឌុក វណ្ណនីភេទស្រីអាយុ៣៦ឆ្នាំ មុខរបរបើកកន្លែងទីតាំងផ្ទះទទួលភ្ញៀវទេសចរ។ម្ចាស់ទីតាំងបានតខ្សែភ្លើងភ្ជាប់តាមខ្សែពួរឆ្លងទៅត្រើយម្ខាងស្ទឹងដើម្បីឲ្យកូនជាងកាត់ឈើធ្វើរោងសម្រាប់ផ្ញើម៉ូតូភ្ញៀវហើយធ្វើឲ្យឆក់ជនរងគ្រោះម្នាក់និងម្នាក់ទៀតទៅជួយក៏ឆក់ទាំងពីរនាក់បណ្ដាលឲ្យធ្លាក់ទឹកស្លាប់តែម្ដង។
សមត្ថកិច្ចបញ្ជាក់ថា នេះគឺជាករណីធ្វេសប្រហែសរបស់ម្ចាស់ទីតាំងធ្វើផ្ទះលំហែដែលបង្កឲ្យភ្ញៀវពីរនាក់ស្លាប់។ស្ត្រីជាប់សង្ស័យខាងលើនេះត្រូវបានឃាត់ខ្លួនបញ្ជូនទៅតុលាការចាត់ការតាមផ្លូវច្បាប់៕
