បាត់ដំបង÷ ទឹកភ្លៀងបន្តធ្លាក់ជោកជាំក្នុងស្រុកកំរៀង បង្កជាជំនន់កើនឡើងប៉ះពាល់លិចដំណាំចម្ការ និងលំនៅដ្ឋានពលរដ្ឋជាង៤០០គ្រួសារ។
![](https://cambodiaflashnews.com/wp-content/uploads/2021/06/top-banner.gif)
មន្ត្រីសាលាស្រុកកំរៀងបានឲ្យដឹងថា÷ មូលដ្ឋានស្រុកកំរៀង ទឹកភ្លៀងបានបន្តធ្លាក់ជាបន្តបន្ទាប់ចាប់តាំងពីថ្ងៃទី២៨ ខែកញ្ញា រហូតដល់ថ្ងៃទី៣ ខែតុលា ឆ្នាំ២០២៣កន្លងមកនេះបានបង្កជាជំនន់ប៉ះពាល់ដល់លំនៅដ្ឋានប្រជាពលរដ្ឋចំនួន៤ ឃុំ ស្មើប្រជាជនចំនួន៤៤៤គ្រួសារ។
ភូមិសាស្ត្រដែលប៉ះពាល់ជន់លិចដោយទឹកភ្លៀងនេះរួមមាន៖ ឃុំអូរដា ប៉ះពាល់ ៧៦ខ្នង, ឃុំត្រាង ប៉ះពាល់ ១៤១ខ្នង, ឃុំតាសែនជន់លិចចំនួន៩៦ខ្នង និងឃុំតាក្រី ជន់លិចចំនួន១៣១ខ្នង។
លោក សុខ ដែន អភិបាលស្រុកកំរៀងប្រាប់ឲ្យដឹងនៅថ្ងៃទី៤ ខែតុលានេះថា÷ នៅព្រឹកនេះទឹកភ្លៀងនៅតែបន្តធ្លាក់ និងរលឹមដោយកន្លែង ចំណែកឯកម្ពស់ទឹកជំនន់ក៏នៅតែបន្តជន់ និងកើនឡើង។ ជាមួយគ្នាលោកបានប្រើប្រាស់កម្លាំងគណ:បញ្ជាការស្រុកជាច្រើនចុះប្រចាំការតាមគោលដៅដែលត្រូវប្រុងប្រយ័ត្នទាំងអស់ហើយផងដែរដើម្បីបង្ការអន្តរាគមន៍ជួយសង្គ្រោះ៕