ដោយ៖សុខុម
បាត់ដំបង÷ ទឹកភ្លៀងជន់ខ្លាំងច្រកអន្តរជាតិដូង ខេត្តបាត់ដំបង បានបិទការចរាចរណ៍ជាបណ្តោះអាសន្ននូវការដឹកជញ្ជូនចេញចូលទំនិញផ្សេងៗ អនុញ្ញាតត្រឹមតែថ្មើរជើងប៉ុណ្ណោះ។
លោក សុខ ដែន អភិបាលស្រុកកំរៀងបានបញ្ជាក់ឲ្យដឹងថា÷ ចាប់តាំងពីយប់ថ្ងៃទី៤ តុលា ប៉ុន្មានម៉ោងមុននេះ មន្ត្រីជំនាញពាក់ព័ន្ធទាំង២ភាគី កម្ពុជា – ថៃ ដែលប្រចាំការនៅច្រកទ្វារអន្តរជាតិដូងបានសម្រេចបិទជាបណ្តោះអាសន្នមួយរយ:សិននូវការធ្វើចរាចរណ៍ទំនិញចេញចូលគ្រប់ប្រភេទមិនឲ្យឆ្លងកាត់តាមកំណាត់ផ្លូវស្ពានផ្នែកខាងក្រោម ដោយអនុញ្ញាតតែត្រឹមថ្មើរជើងប៉ុណ្ណោះដោយសារទឹកជំនន់បានកើនឡើងខ្ពស់។
មកទល់ត្រឹមម៉ោងជិត១២:០០នាទីថ្ងៃទី៤ នេះ ទឹកបានស្រកប្រមាណជា២តឹកវិញហើយ ដរាបណាលែងមានភ្លៀងធ្លាក់បន្ថែមទៀត តែចំពោះមុននេះអាកាសធាតុផ្ទៃមេឃកំពុងតែស្រទំរកកល់ភ្លៀងនៅឡើយ។
មន្ត្រីមូលដ្ឋានខាងលើបញ្ជាក់បន្តថា÷ ស្ថានភាពកម្ពស់ទឹកជំនន់នៅនឹងច្រកទ្វារអន្តរជាតិដូង និងនៅតាមតំបន់លំនៅដ្ឋានរបស់ប្រជាពលរដ្ឋរស់នៅ មន្ត្រីរដ្ឋបាលស្រុក ក៏ដូចជាកងកម្លាំងទាំងបីកងឯកភាពកំពុងតាមដាន និងចុះជាប់ជាប្រចាំយ៉ាងយកចិត្តទុកដាក់៕
