ប្រែសម្រួល៖សហការី
ប្រធានាធិបតីអាមេរិក លោក Joe Biden បាននិយាយអះអាងថា ជំនួយសម្រាប់ប្រទេសអ៊ុយក្រែននៅតែបន្តរហូតសម្រាប់ពេលនេះ ខណៈដែលលោកកំពុងខិតខំស្វែងរកការធានាឡើងវិញដល់សម្ព័ន្ធមិត្តដើម្បីបន្តការគាំទ្រដល់កិច្ចខិតខំប្រឹងប្រែងប្រឆាំងនឹងសង្រ្គាមឈ្លានពានរបស់រុស្សីនៅក្នុងប្រទេសអ៊ុយក្រែន។
លោកប្រធានាធិបតីបានថ្លែងកាលពីថ្ងៃអាទិត្យដែលជាការព្រមានមួយទៅកាន់សភាអាមេរិក ដែលបានបោះឆ្នោតទប់ស្កាត់ការបិទរដ្ឋាភិបាលដោយអនុម័តកញ្ចប់ថវិកាសម្រាប់រយៈពេលខ្លីហើយសម្រេចកាត់ចោលកញ្ចប់ថវិកាដែលជាជំនួយសម្រាប់អ៊ុយក្រែនដែលអាមេរិកខិតខំប្រឹងប្រែងគាំទ្រដល់ការប្រយុទ្ធប្រឆាំងនឹងការឈ្លានពានរបស់រុស្ស៊ី។
លោក Biden បានថ្លែងថា “ទោះជាស្ថិតនៅក្រោមកាលៈទេសៈបែបណាក៏ដោយក៏យើងមិនអាចអនុញ្ញាតឱ្យការគាំទ្ររបស់អាមេរិកសម្រាប់អ៊ុយក្រែនត្រូវបានផ្អាកជាដាច់ខាត។
លោកបានមានប្រសាសន៍ថា៖ “ យើងគិតថាវាជាកិច្ចការបន្ទាន់ខ្លាំងណាស់ហើយក៏មិនត្រូវអូសបន្លាយពេលវេលាក្នុងការជួយដល់អ៊ុយក្រែននោះទេ“ លោកបានកត់សម្គាល់ថាការសម្រេចផ្តល់ថវិកាគឺមានរយៈពេលត្រឹមតែពាក់កណ្តាលខែវិច្ឆិកាតែប៉ុណ្ណោះ។
លោក Biden បានទទូចស្នើសុំដល់សភាឲ្យពិនិត្យលើកញ្ចប់ជំនួយឲ្យបានឆាប់តាមតែអាចធ្វើទៅបាន។
លោកបានថ្លែងសុន្ទរកថាចេញពីសេតវិមានថា “ភាគច្រើននៃគណបក្សទាំងពីរដែលមកពីគណបក្សប្រជាធិបតេយ្យ និងសាធារណរដ្ឋ ព្រឹទ្ធសភា និងសភា បានគាំទ្រដល់ការជួយអ៊ុយក្រែនប្រឆាំងនឹងការឈ្លានពានដ៏ឃោរឃៅរបស់រុស្ស៊ី” ។
លោក Biden បាននិយាយដោយបន្ថែមថា “គណបក្សនយោបាយគួតែឈប់លេងហ្គេមតទៅទៀត“ លោករំពឹងថាប្រធានសភាមកពីគណបក្សសាធារណរដ្ឋ លោក Kevin McCarthy នឹងអនុម័តច្បាប់ដាច់ដោយឡែកមួយសម្រាប់កញ្ចប់ថវិកាដែលជាជំនួយសម្រាប់អ៊ុយក្រែននៅក្នុងពេលឆាប់ៗនេះ។
“ខ្ញុំចង់ធានាដល់សម្ព័ន្ធមិត្តរបស់យើងថា ប្រជាជនអ៊ុយក្រែនអាចពឹងផ្អែកលើការគាំទ្ររបស់ប្រជាជនអាមេរិកយើង ហើយយើងដាច់ខាតនឹងមិនដើរចោលអ៊ុយក្រែនទេ“។
ទោះបីជាមានការសម្របសម្រួលនៅក្នុងសភាកាលពីល្ងាចថ្ងៃអាទិត្យក៏សភានៅតែសម្រេចកាត់ចោលកញ្ចប់ថវិកាសម្រាប់អ៊ុយក្រែនដោយសារមានការជំទាស់ពីគណបក្សសាធារណរដ្ឋដែលមាននិន្នាការប្រឆាំងជាហេតុធ្វើឲ្យកាន់តែមិនច្បាស់លាស់ថាតើនឹងមានអ្វីកើតឡើងជាបន្តទៀតនោះទេ។
លោក Biden និងគណបក្សប្រជាធិបតេយ្យរបស់លោក បាននិយាយថា សហរដ្ឋអាមេរិកមានកាតព្វកិច្ចជួយអ៊ុយក្រែនប្រឆាំងនិងការលុកលុយរបស់រុស្ស៊ីដែលដឹកនាំដោយ លោក Vladimir Putin លោក Biden ព្រមានថា ការបរាជ័យក្នុងការជួយអ៊ុយក្រែនអាចជំរុញឲ្យប្រទេសផ្សេងទៀតបាត់បង់ទំនុកចិត្តនាពេលអនាគត។
បញ្ហានេះជារឿងនយោបាយរបស់ទីក្រុងវ៉ាស៊ីនតោនហើយជោគវាសនាក្នុងការផ្តល់ជំនួយយោធាដ៏សំខាន់សម្រាប់អ៊ុយក្រែនឥឡូវនេះកំពុងស្ថិតក្នុងជ្រុងមរណៈសម្រាប់ក្រុង Kyiv ដែលកំពុងព្យាយាមធ្វើឲ្យមានវឌ្ឍនភាពក្នុងការវាយលុកបកមកលើទ័ពរុស្សីដែលមានសភាពថមថយនៅមុនរដូវរងាចូលមកដល់។
សហរដ្ឋអាមេរិកគឺជាអ្នកគាំទ្រដ៏សំខាន់របស់អ៊ុយក្រែន បន្ទាប់ពីរុស្ស៊ីចូលឈ្លានពានកាលពីឆ្នាំមុន ហើយលោក Biden បានស្វែងរកការប្រមូលផ្តុំកម្លាំងទូទាំងពិភពលោករួមទាំងប្រទេសរបស់គាត់ផងដើម្បីរក្សានិរន្តរភាពក្នុងការគាំទ្រដល់អ៊ុយក្រែន។
លោក Biden បានធានាដល់ប្រធានាធិបតីអ៊ុយក្រែនលោក Volodymyr Zelenskyy នៅក្នុងអំឡុងដំណើរទស្សនកិច្ចមកកាន់ទីក្រុងវ៉ាស៊ីនតោនកាលពីខែមុនថា ការគាំទ្រដ៏រឹងមាំរបស់សហរដ្ឋអាមេរិកសម្រាប់សង្រ្គាមប្រឆាំងនឹងការឈ្លានពានរបស់រុស្ស៊ីនឹងត្រូវបានធានានិរន្តរភាពបើទោះបីជាមានការប្រឆាំងពីសមាជិកសភាមកពីគណបក្សសាធារណរដ្ឋមួយចំនួនក៏ដោយ។
លោក Biden បានជំរុញឲ្យគណបក្សសាធារណរដ្ឋសម្រេចចិត្តឲ្យបានឆាប់រហ័ស ដើម្បីបញ្ចៀសវិបត្តិថវិការផ្សេងទៀតនៅក្នុងខែវិច្ឆិកា។
លោក Biden បន្តថា “ល្បែងនយោបាយត្រូវតែបញ្ចប់ ហើយសភាមិនគួរបង្កឲ្យមានវិបត្តិផ្សេងទៀតនោះទេ“។ “ខ្ញុំសូមស្នើដោយទទូចដល់មិត្តភ័ក្តិខាងគណបក្សសាធារណរដ្ឋនៅក្នុងសភាសូមកុំបង្អង់យូរឲ្យសោះនិងសូមកុំខ្ជះខ្ជាយពេលវេលាដូចដែលលោកបានធ្វើកន្លងមកអស់ពេលពេញមួយរដូវក្តៅក្នុងការអនុម័តកិច្ចព្រមព្រៀងថវិកាសម្រាប់រយៈពេលមួយឆ្នាំ សូមលោកគោរពកិច្ចព្រមព្រៀងដែលយើងបានធ្វើកាលពីប៉ុន្មានខែមុន“។
លោក Biden បានស្នើដល់គណបក្សប្រជាធិបតេយ្យថាតើគួរតែពិចារណាថាគាំទ្រលោក McCarthy ជាបន្តទៀតទេប្រសិនបើគាត់ត្រូវការឲ្យគណបក្សប្រជាធិបតេយ្យបោះឆ្នោតគាំទ្រគាត់ដើម្បីបន្តតំណែងជាប្រធានសភាតទៅទៀតនោះ។ លោកប្រធានាធិបតី Biden បាននិយាយថា លោកនឹងទុករឿងនោះជូនមេដឹកនាំគណបក្សប្រជាធិបតេយ្យក្នុងសភាដើម្បីសម្រេច។
សហរដ្ឋអាមេរិកបានអនុម័តផ្តល់ជំនួយចំនួន ៤ លើកដល់អ៊ុយក្រែនដែលជាការឆ្លើយតបប្រឆាំងទៅនឹងការឈ្លានពានរបស់រុស្ស៊ីសរុបជាទឹកប្រាក់ប្រហែលជាង ១១៣ ពាន់លានដុល្លារ ជាមួយនឹងប្រាក់មួយចំនួនសម្រាប់បំពេញបន្ថែមលើសម្ភារយោធាដែលអាមេរិកបានបញ្ជូនទៅសមរភូមិមុខ។ កាលពីខែសីហា លោក Biden បានអំពាវនាវឲ្យសភាផ្តល់ប្រាក់បន្ថែមចំនួន ២៤ ពាន់លានដុល្លារទៀត៕
ប្រភពៈ CNN