ដោយៈសុខុម
ភ្នំពេញ៖ ក្រុមការងារអច្ឆរិយភាពនៃទន្លេមេគង្គ(Wonders of the Mekong) បានប្រកាសកាលពីថ្ងៃទី២៨ ខែកញ្ញា ឆ្នាំ ២០២៣ថា ត្រីបបែលយក្សទឹកសាបទម្ងន់ ៦៦១ ផោន (៣០០គីឡូក្រាម) ដែលក្រុមការងារអច្ឆរិយភាពនៃទន្លេមេគង្គបានកិបស្លាក និងដោះលែងទៅក្នុងទន្លេមេគង្គវិញកាលពីឆ្នាំមុន ត្រូវបានទទួលស្គាល់ជាផ្លូវការដោយ Guinness World Records ថាជាត្រីទឹកសាបដ៏ធំបំផុតនៅលើពិភពលោក»។
ត្រីបបែលយក្សទឹកសាបដ៏ធំនេះត្រូវបានរកឃើញនៅក្នុងឃុំកោះព្រះ ស្រុកសៀមបូក ខេត្តស្ទឹងត្រែង កាលពីឆ្នាំមុន។
ប្រភពដដែលបន្តថា ចាប់តាំងពីធ្វើការដោះលែងវាមក យើងបានប្រមូលព័ត៌មានពីត្រីបបែលដ៏អស្ចារ្យនេះ តាមរយៈប្រព័ន្ធទទួលសញ្ញា acoustic វានឹងជួយយើងការពារប្រភេទសត្វជិតផុតពូជនេះ។
សូមរំលឹកថា មន្ត្រីជំនាញខណ្ឌរដ្ឋបាលជលផលខេត្តស្ទឹងត្រែង និងក្រុមការងារគម្រោងអច្ឆរិយមេគង្គ និងអភិវឌ្ឍន៍ជលផលទឹកសាប (IFREDI) នៃទន្លេមេគង្គកម្ពុជា បានវាស់ថ្លឹង និងកិបស្លាកលេខ ព្រមទាំងយកសំណាកធ្វើ DNA ហើយបានលែងបបែលយក្ស ចូលក្នុងទន្លេមេគង្គ កាលពីថ្ងៃទី ១៤ ខែមិថុនា ឆ្នាំ ២០២២។ បបែលយក្សនេះមានទម្ងន់ ៣០០ គីឡូក្រាម និងទំហំចាប់ពីក្បាលដល់ចុងកន្ទុយប្រវែង ៣៩៨ សង់ទីម៉ែត្រ និងទទឹងដងខ្លួនប្រវែង ២២០ សង់ទីម៉ែត្រ។
លោក សុខ វិជ្ជា អ្នកស្រាវជ្រាវជីវចម្រុះនៅកម្ពុជាធ្លាប់ថ្លែងថា បបែលទាំងអស់នៅក្នុងប្រទេសកម្ពុជា រាប់ទាំងនៅក្នុងទឹកសាប និងទឹកប្រៃមាន ១៥ ប្រភេទ។ ប៉ុន្តែចំពោះប្រភេទបបែលយក្សទឹកសាបខាងលើ ជាប្រភេទមួយកំពុងរងគ្រោះទៅរកការជិតផុតពូជ ព្រោះសត្វបបែលប្រភេទនេះមិនសម្បូរទេនៅតាមទន្លេមេគង្គ។
លោកបន្តថា បបែលនេះជាប់ជាប្រភេទបបែលដែលធំជាងគេបង្អស់នៅលើពិភពលោក ដែលអាចនិយាយបានថា ជាពូជត្រីពិសេសមួយនៅក្នុងប្រទេសកម្ពុជា បន្ទាប់ពីពពួកត្រីរាជ និងត្រីគល់រាំង។លោកបញ្ជាក់ថា ត្រីបបែលយក្សហ្នឹងមានតែនៅខាងប្រទេសឡាវ ថៃ និងប្រទេសកម្ពុជា។វានៅតែតាមបណ្តោយខ្សែទឹកទន្លេមេគង្គ»៕
