ប្រែសម្រួល៖រតនា
សារព័ត៌មានបរទេសថ្មីៗនេះបានចេញផ្សាយដំណឹងគួរឲ្យភ្ញាក់ផ្អើលថា លោកLi Shangfu រដ្ឋមន្ត្រីការពារជាតិចិនដែលទើបនឹងឡើងកាន់តំណែងគឺអាចត្រូវបានចាប់ខ្លួនហើយឃុំគាត់ឲ្យនៅតែក្នុងផ្ទះដើម្បីបើកការស៊ើបអង្កេត។
ព័ត៌មាននៃការចាប់ខ្លួនរដ្ឋមន្រ្តីការពារជាតិចិននេះបានលេចឭឡើងបន្ទាប់ពីគេសង្កេតឃើញរដ្ឋមន្ត្រីការពារជាតិចិនរូបនោះមិនបានឃើញចូលទៅក្នុងជំនួបដ៏សំខាន់ជាមួយវៀតណាមដែលគ្រោងទុកកាលពីសប្តាហ៍មុន។
រដ្ឋមន្ត្រីការពារជាតិចិន លោក Li Shangfu បានដកខ្លួនចេញពីកិច្ចប្រជុំភ្លាមៗជាមួយមេដឹកនាំការពារជាតិវៀតណាមកាលពីសប្តាហ៍មុន មន្ត្រីបីរូបដែលមានចំណេះដឹងផ្ទាល់អំពីបញ្ហានេះបាននិយាយថា ចំពេលមានសំណួរអំពីការអវត្តមានរយៈពេលជាងពីរសប្តាហ៍របស់លោកពីទិដ្ឋភាពសាធារណៈ។
លោក Li ដែលមានអាយុ 65 ឆ្នាំគ្រោងនឹងចូលរួមកិច្ចប្រជុំប្រចាំឆ្នាំស្តីពីកិច្ចសហប្រតិបត្តិការលើវិស័យការពារជាតិដែលរៀបចំដោយវៀតណាមនៅតាមព្រំដែនរបស់ខ្លួនជាមួយប្រទេសចិននៅថ្ងៃទី 7-8 ខែកញ្ញា ប៉ុន្តែកិច្ចប្រជុំត្រូវបានពន្យារពេលបន្ទាប់ពីទីក្រុងប៉េកាំងបានប្រាប់ទីក្រុងហាណូយប៉ុន្មានថ្ងៃមុនព្រឹត្តិការណ៍ថារដ្ឋមន្ត្រីមាន “ស្ថានភាពសុខភាព” ។ នេះបើតាមមន្ត្រីវៀតណាមពីររូប។
ការពន្យារពេលភ្លាមៗនៃកិច្ចប្រជុំ និងហេតុផលដែលលើកឡើងដោយប្រទេសចិន ត្រូវបានរាយការណ៍ដោយ Reuters ជាលើកដំបូង។
ការិយាល័យព័ត៌មានក្រុមប្រឹក្សារដ្ឋរបស់ប្រទេសចិន ក៏ដូចជាក្រសួងការពារជាតិ និងក្រសួងការបរទេស មិនបានឆ្លើយតបភ្លាមៗចំពោះសំណើសុំការអត្ថាធិប្បាយអំពីការអាក់ខានពីព្រឹត្តិការណ៍ជួបជាមួយវៀតណាមនេះទេ។ ស្ថានទូតវៀតណាមប្រចាំទីក្រុងប៉េកាំងមិនអាចទាក់ទងបានភ្លាមៗដើម្បីសុំការអត្ថាធិប្បាយឡើយកាលពីល្ងាចថ្ងៃព្រហស្បតិ៍។
កាលពី២ខែមុនគេបានឃើញលោក Li Shangfu ដែលជាប្រមុខការពារជាតិចិនរូបនោះបានទៅចូលរួមប្រជុំមួយនៅប្រទេសរុស្ស៊ី។ នៅទីនោះលោកបានបញ្ចេញវោហាសាស្រ្តគំរាមដល់បណ្តាប្រទេសលោកខាងលិចមិនឲ្យលូកដៃចូលបញ្ហាកោះតៃវ៉ាន់ទេ។
ការផ្សព្វផ្សាយរឿងចាប់ខ្លួនលោក Li នេះគឺបានកើតឡើងបន្ទាប់ពីការផ្លាស់ប្តូរជំនួសតំណែងរដ្ឋមន្ត្រីការបរទេស លោកQin Gang ដែលមិនមានការពន្យល់ពីមូលហេតុរបស់មេដឹកនាំប្រទេសចិនក្នុងខែកក្កដា៕