ដោយៈ គង់ហេង
កំពង់ចាម៖ សមត្ថកិច្ចបានឆ្មក់ចាប់បង្រ្កាបទីតាំងល្បែងស៊ីសងខុសច្បាប់ដុះស្លែមួយកន្លែង នៅប្លុកត្នោតជ្រុំ ស្ថិតក្នុងភូមិទី៤ សង្កាត់វាលវង់ ក្រុងកំពង់ចាម ដោយសម្រេចឃាត់ខ្លួន បុរសជាអ្នកប្រព្រឹត្តចំនួន ១០ នាក់ និងបិទទីតាំងនោះជាបណ្តោះអាសន្នកាលពីយប់ថ្ងៃទី ១៤ កញ្ញាម្សិលមិញនេះ។
![](https://cambodiaflashnews.com/wp-content/uploads/2021/06/top-banner.gif)
លោក លី សុវណ្ណ ជាអភិបាលក្រុងកំពង់ចាម និងជាអ្នកដឹកនាំប្រតិបត្តិការបង្រ្កាបខាងលើបានប្រាប់ឱ្យដឹងនៅថ្ងៃទី ១៥ កញ្ញានេះថា៖ដោយអនុវត្តតាមបទបញ្ជាយ៉ាងម៉ឺងម៉ាត់របស់លោក អ៊ុន ចាន់ដា អភិបាលខេត្តកំពង់ចាម ក្រោមកិច្ចសម្របសម្រួលនីតិវិធីពីលោក សេង រិទ្ធី ព្រះរាជអាជ្ញារងអមសាលាដំបូង ខេត្តកំពង់ចាម យើងបានបង្រ្កាបកន្លែងលបលួចលាក់លេងល្បែងស៊ីសងជល់មាន់តាមទូរទស្សន៍អនឡាញ ភ្នាល់ដាក់ប្រាក់នៅទីតាំងខាងលើ។
លោកអភិបាលក្រុងបានឱ្យដឹងទៀតថា៖ ជាលទ្ធផលយើងសម្រេចឃាត់ខ្លួនមុខសញ្ញាសង្ស័យ ចំនួន១០នាក់(ប្រុស) សម្ភារដកហូតមាន៖ទូរសព្ទចំនួន១៥គ្រឿង,ម៉ូតូចំនួន១១គ្រឿង,កាបូបដៃពណ៌ខ្មៅចំនួនបី,ដុំសាកទូរសព្ទចំនួនមួយ,កាបូបស្ពាយពណ៌ខ្មៅចំនួនមួយ,ប្រាក់ដុល្លារចំនួន៣០១០ដុល្លារ,ប្រាក់រៀល ១៣.៥៧២.០០០រៀល(ដប់បីលានហាសិបប្រាំពីរមុឺនពីររយរៀល),ទូរទស្សន៍ម៉ាក LG ចំនួន០១គ្រឿង,កុំព្យូទ័រម៉ាក LEOVOSE ចំនួនពីរគ្រឿង,ឃីបត ចំនួនពីរ ដុំសាកថ្មចំនួនពីរ ឌុយភ្លើងចំនួនពីរ ក្បាលវាយហ្វាយចំនួនបី,ឡេបថបម៉ាក GATEWAY ចំនួនមួយគ្រឿង,រថយន្ដចំនួនពីរគ្រឿង ១.ម៉ាកLEXUS 350 ពណ៌ស ពាក់ផ្លាកលេខ ភ្នំពេញ 2BW-7477។ ២.ម៉ាកPRIUS ពណ៌ស ពាក់ផ្លាកលេខ ត្បូងឃ្មុំ 2A-2322។លទ្ធផលតេស្តទឹកមូត្រស្វែងរកសាធាតុញៀនលទ្ធផលអវិជ្ជមាន ទាំង១០នាក់។
បច្ចុប្បន្នជនសង្ស័យទាំង ១០ នាក់ខាងលើ ត្រូវបានឃាត់ខ្លួនបណ្ដោះអាសន្ន នៅអធិការដ្ឋាននគរបាលក្រុងកំពង់ចាម តាមបញ្ជា លោក សេង រិទ្ធី ព្រះរាជអាជ្ញារង នៃអយ្យការអមសាលាដំបូងខេត្តកំពង់ចាម ដើម្បីសាកសួរ និងកសាងសំណុំរឿងតាមនីតិវិធី៕