ដោយ៖ គង់ហេង
ត្បូងឃ្មុំ៖ បុរសពីរនាក់បានទាស់សម្តីគ្នាក្នុងពេលកំពុងផឹកស៊ីស្រវឹងក៏បានឈានដល់ការទាញកាំបិតរៀងខ្លួន កាប់គ្នាទៅវិញទៅបណ្តាលឱ្យរបួសធ្ងន់ទាំងសងខាង ហើយសាច់ញាតិនាំទៅកាន់មន្ទីរពេទ្យ ដើម្បីសង្រ្គោះបន្ទាន់ ។ហេតុការណ៍នេះបានកើតនៅភូមិបុរីតេជោសែនលិច ឃុំដារ ស្រុកមេមត់ កាលពីរសៀលថ្ងៃទី ១២ កញ្ញា។
![](https://cambodiaflashnews.com/wp-content/uploads/2021/06/top-banner.gif)
ប៉ុន្តែអ្វីដែលចាប់អារម្មណ៍ គឺបុរសទាំងពីរដែលម្នាក់ឈ្មោះ ប៊ុន បូរិទ្ធ អាយុ ៣១ ឆ្នាំ មានទីលំនៅភូមិសាឡង់១ និងម្នាក់ទៀតឈ្មោះ ថា សេងលី អាយុ ៣៧ ឆ្នាំរស់នៅភូមិដារកណ្តោល ឃុំដារដូចគ្នា ត្រូវលោក សួន ទី ព្រះរាជអាជ្ញារងអមសាលាដំបូងខេត្តត្បូងឃ្មុំ បង្គាប់ឱ្យសមត្ថកិច្ចកសាងសំណុំរឿងតាមនីតិវិធី ពីបទហិង្សាមានស្ថានទម្ងន់ទោស។
សេចក្តីរាយកាណ៍ពីស្រុកមេមត់បានឱ្យដឹងថាៈ នៅនឹងផ្ទះកើតហេតុរបស់បុរសឈ្មោះ តាក់ មានការផឹកស៊ីរហូតស្រវឹងរៀងៗខ្លួន ក៏បង្កឱ្យមានការឈ្លោះប្រកែកគ្នារវាងឈ្មោះ ប៊ុន បូរិទ្ធ និងឈ្មោះថា សេងលី បណ្តាលឱ្យទាំង២នាក់បានទាញកាំបិតកាប់គ្នាទៅវិញទៅមក រងរបួសធ្ងន់ធ្ងរ ដោយឈ្មោះ ប៊ុន បូរិទ្ធ របួសធ្ងន់ចំនួនពីរ កន្លែងៈរយះស្មាខាងឆ្វេង និងក្រោយត្រចៀកខាងឆ្វេង។ ចំណែកឈ្មោះ ថា សេងលី ត្រូវរបួសធ្ងន់ចំនួនពីរ កន្លែងដូចគ្នា គឺផ្នែកក្បាលខាងឆ្វេង និងកដៃខាងឆ្វេង។
ក្រោយកើតហេតុត្រូវក្រុមគ្រួសារបញ្ជួនទៅកាន់មន្ទីរពេទ្យ។
សេចក្តីរាយការណ៍នោះបានបន្តថាៈ ករណីបុរសទាំងពីរកាប់គ្នា គឺផ្តើមចេញពីការផឹកស្រាស្រវឹងទាស់ពាក្យសម្តី គឺជាជនសង្ស័យដូចគ្នា ដោយប្រឈមនឹងការចោទប្រកាន់ពីបទ ហិង្សាមានស្ថានទំងន់ទោស ហើយករណីនេះខាងមន្រ្តីនគរបាលយុត្តិធម៌ នៃអធិការនគរបាលស្រុកមេមត់កំពុងស្រាវជ្រាវ និងកសាងសំណុំរឿង ដើម្បីចាត់ការតាមនីតិវិធី៕