ដោយ៖ព្រះអង្គខ្មៅ
បាត់ដំបង៖ ត្រីក្រពតទឹកសាបមួយក្បាលបានខាំជើងកសិករម្នាក់បណ្តាលឲ្យហូរឈាមរងរបួសជាទម្ងន់ ត្រូវគេ បញ្ជូនទៅសង្គ្រោះបន្ទាន់នៅមន្ទីរពេទ្យនៅពេលដែលកសិកររូបនោះបានចុះទៅក្នុងទឹកស្ទឹងដើម្បីបូមទឹក។
សមត្ថកិច្ចបានឲ្យដឹងថា កាលពីល្ងាចថ្ងៃទី១៧ ខែសីហា ឆ្នាំ២០២៣ មានកសិករម្នាក់ឈ្មោះសួន ចំរើន ភេទប្រុស អាយុ៦៣ឆ្នាំ រស់នៅភូមិតាសាញជើង ឃុំតាសាញ ស្រុកសំឡូត ខេត្តបាត់ដំបង បានចុះទៅក្នុងស្ទឹងក្រញូង ស្ថិតក្នុងទឹកដីស្រុកសំឡូត ខេត្តបាត់ដំបង ដើម្បីរៀបចំដាក់សម្ភារបូមទឹក។
សមត្ថកិច្ចបានឲ្យដឹងទៀតថា នៅពេលដែលចុះទៅដល់ក្នុងទឹកស្ទឹងបានបន្តិចក៏ស្រាប់តែមានសត្វអ្វីម្យ៉ាង ខាំជើងរបស់គាត់ម្ខាងបណ្តាលឲ្យហូរឈាមយ៉ាងខ្លាំងក្រោយមកត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ។
ដំបូងៗគេបានដាក់ការសង្ស័យថាជាប្រភេទត្រីពីរ៉ាញ៉ាខាំស៊ីសាច់ តែក្រោយមកទើបដឹងថាសត្វដែលខាំនោះគឺជាត្រីក្រពត។
មន្ត្រីរដ្ឋបាលស្រុកសំឡូតបានបញ្ជាក់ថា ជើងរបស់ជនរងគ្រោះរបួសដោយសារត្រីខាំវាមិនមែនជាត្រីពីរ៉ាញ៉ាខាំស៊ីនោះទេ។ ដោយសារមុនដំបូងត្រីក្រពតវាបានចូលទៅក្នុងស្បែងជើងកវែងរួចខាំជើងត្រូវចំសរសៃឈាមបណ្តាលឲ្យហូរឈាមយ៉ាងខ្លាំងត្រូវបញ្ជូនទៅសង្គ្រោះបន្ទាន់យ៉ាងដូចនេះ។
អាជ្ញាធរស្រុកក៏បានបញ្ជាក់ឲ្យដឹងផងដែរថា ករណីត្រីក្រពតខាំដូចគ្នានេះវាតែងតែបានកើតមានឡើងជារើយៗស្ទើររៀងរាល់ឆ្នាំនៅពេលដែលប្រជាពលរដ្ឋបានចុះទៅក្នុងទឹកស្ទឹងនោះ៕