ដោយ៖សុខុម

ព្រះវិហារ៖រថយន្តសាំងយ៉ុងមួយគ្រឿងដឹកកំប៉ុងហ្គាសនិងដឹកមនុស្សសរុប ៦នាក់ពេលកំពុងធ្វើដំណើរតាមផ្លូវស្រាប់តែផ្ទុះឆេះបណ្ដាលឱ្យអ្នករួមដំណើរក្នុងនោះចំនួន៤នាក់រងរបួសពេញខ្លួនកាលពីរសៀល ថ្ងៃទី១៣ ខែសីហា ឆ្នាំ២០២៣ នៅភូមិត្រពាំងទទឹម ឃុំរមទម ស្រុករវៀង ខេត្តព្រះវិហារ។

នៅក្នុងហេតុការណ៍ឆាបឆេះរថយន្តដឹកកំប៉ុងហ្គាសនោះ ប្រធានគណៈបញ្ជាការឯកភាព រដ្ឋបាលស្រុករវៀង លោក ហោ ប៊ុនហួរ បានដឹកនាំកម្លាំងនគរបាល និងកម្លាំងកងរាជអាវុធហត្ថមូលដ្ឋាន ចុះពិនិត្យពីស្ថានភាព និងជួយសង្គ្រោះជនរងគ្រោះ។ករណីឆេះរថយន្តសាំងយ៉ុងមួយគ្រឿងនោះ មនុស្សប្រុស-ស្រី ៤នាក់ ក្នុងចំណោម ៦នាក់ បានរងរបួសធ្ងន់ និងស្រាល។

លោក ហោ ប៊ុនហួរ ប្រធានគណៈបញ្ជាការឯកភាពស្រុករវៀងងបានប្រាប់ឲ្យដឹងថា រថយន្តដែលឆេះនោះ ជាប្រភេទរថយន្តសាំងយ៉ុង ពណ៌ស។ ចំណែក ប្រជាពលរដ្ឋរងគ្រោះ គឺជាអ្នករត់ឡានតាក់ស៊ី រស់នៅក្នុងភូមិ ឃុំ កើតហេតុខាងលើ។ លោកបានបន្តថា រថយន្តនេះបានផ្ទុកទៅដោយកំប៉ុងហ្គាសតូចៗជាច្រើន ហើយមូលហេតុដែលធ្វើឲ្យរថយន្តនេះឆេះ គឺបណ្តាលមកពីទុស្សេចរន្តភ្លើង។

នគរបាលប៉ុស្តិ៍បានបញ្ជាក់ថា មនុស្សដែលជិះក្នុងរថយន្តនោះ មានគ្នា ៦នាក់ ក្នុងនោះ បុរស ២នាក់ ស្ត្រី ៤នាក់ ចំណែក អ្នករងរបួសធ្ងន់មានស្ត្រី ៣នាក់ និងបុរសម្នាក់ រីឯអ្នករងរបួសស្រាលមាន ២នាក់ គឺបុរសម្នាក់ និងស្រ្តីម្នាក់។

នាយប៉ុស្តិបានបញ្ជាក់ទៀតថា ក្រោយពេលកើតហេតុ លោកបានបញ្ជូនអ្នករងរបួសស្រាលទាំង ២នាក់ ទៅកាន់លំនៅឋាន រីឯអ្នករងរបួសធ្ងន់ ត្រូវបានបញ្ជូនទៅកាន់ មន្ទីរពេទ្យ ដើម្បីជួយសង្គ្រោះជីវិត៕