ដោយ៖រតនា
ភ្នំពេញ៖ សមត្ថកិច្ចកំពុងតែតាមប្រមាញ់ឃាតក៣នាក់ដែលបានបើកការបាញ់ប្រហារយ៉ាងសាហាវ បណ្តាលឲ្យជនរងគ្រោះ២នាក់ប្តីប្រពន្ធបានស្លាប់នៅក្រោមផ្ទះកាលពីទៀបភ្លឺថ្ងៃទី១២ ខែសីហា ឆ្នាំ២០២៣។
សមត្ថកិច្ចបានឲ្យដឹងថា កាលពីលាម៉ោងជាង៣ទៀបភ្លឺឈានចូលថ្ងៃទី១២ ខែសីហា ឆ្នាំ២០២៣មានខ្មាន់កាំភ្លើងចំនួន៣នាក់ប្រដាប់ដោយអាវុធវែងបានចូលទៅធ្វើសកម្មភាពបាញ់ចំនួន៩គ្រាប់ទៅលើប្តីប្រពន្ធដែលកំពុងដេកក្រោមផ្ទះកន្លែងចិញ្ចឹមទាស្ថិតនៅភូមិថ្មី ឃុំសន្លុង ស្រុកខ្សាច់កណ្តាល ខេត្តកណ្តាលបណ្តាលឲ្យស្លាប់ទាំងអស់គ្នា។
ក្រោយពីធ្វើសកម្មភាពបាញ់សម្លាប់ទាំងកំរោលរួចហើយនោះ ក្រុមជនដៃដល់បាននាំគ្នាគេចខ្លួនចេញពីកន្លែងកើតហេតុទាំងយប់ដោយមិនមានយកទ្រព្យសម្បត្តិអ្វីរបស់ជនរងគ្រោះនោះទេ។
សមត្ថកិច្ចបានឲ្យដឹងថា អ្នកស្លាប់ជាប្តីឈ្មោះ ម៉ុច ម៉ៅ អាយុ៤៧ឆ្នាំមុខរបរចិញ្ចឹមទានិងលក់ចំណីសត្វនិងប្រន្ធឈ្មោះ គល់ ហ៊ាន់ អាយុ៤៥ឆ្នាំ ជនជាតិខ្មែរ។
សមត្ថកិច្ចនៅមិនទាន់បានបញ្ជាក់ពីមូលហេតុដែលនាំឲ្យកើតមានករណីបាញ់សម្លាប់ទាំងប្តីប្រពន្ធនេះនៅឡើយទេ។ប៉ុន្តែប្រភពមិនផ្លូវការបានឲ្យដឹងថា រឿងនេះអាចកើតចេញពីទំនាស់ក្នុងមុខរបររកស៊ី ។
ប៉ុន្តែបើទោះជាយ៉ាងណាក៏ដោយចុះយើងអាចនឹងដឹងពីមូលហេតុច្បាស់លាស់នៅពេលណាដែលកម្លាំងសមត្ថកិច្ចចាប់បានក្រុមឃាតកដៃប្រឡាក់ឈាមក្នុងរឿងនេះនៅពេលខាងមុខ៕
