ដោយៈ គង់ហេង
កំពង់ចាម៖ មន្ទីរសុខាភិបាលខេត្តកំពង់ចាមបញ្ជួនសំណាកជាបាយមាន់ ដែលបង្កឱ្យពុល ក្អួតចង្អោរ និងរាករួស ដល់ប្រជាពលរដ្ឋក្មេងចាស់ ប្រុស ស្រីចំនួន ១៧ នាក់រស់នៅភូមកំផ្លាក ឃុំបារាយណ៍ ស្រុកស្រីសន្ធរ ទៅក្រសួងសុខាភិបាល ដើម្បីធ្វើការវិភាគរកមេរោគ នៅព្រឹកថ្ងៃទី ១១ សីហានេះ។
![](https://cambodiaflashnews.com/wp-content/uploads/2021/06/top-banner.gif)
លោក គីមសួរ ភិរុណ ជាប្រធានមន្ទីរសុខាភិបាលខេត្តកំពង់ចាមបានឱ្យដឹងថា៖ មកដល់ម៉ោងជាង៣រសៀលថ្ងៃទី ១១ សីហានេះ ជនរងគ្រោះបង្កឡើងដោយសារការពុលអាហារទាំង ១៧ នាក់មានចំនួន ១៦ នាក់បានធូរស្បើយ គ្រូពេទ្យបានអនុញ្ញាតឱ្យពួកគាត់ចេញពីមន្ទីរពេទ្យស្រុកស្រីសន្ធរ ទៅកាន់លំនៅឋានរៀងខ្លួន។ លើកលែងតែបុរសអាយុ ៦០ ឆ្នាំ មិនទាន់ឱ្យចេញ នៅបន្តតាមដានដោយសារគាត់មានជំងឺលើសសម្ពាធឈាមប្រចាំកាយ ដើម្បីឱ្យក្រុមគ្រូពេទ្យបន្តតាមដាន។
លោកបានបន្តថា៖ ជុំវិញករណីពុលអាហារដល់ប្រជាពលរដ្ឋនេះ ខាងលោកបានចុះស្រាវជ្រាវជាបន្ទាន់ដល់ទីតាំងលក់បាយមាន់ដែលបង្កឱ្យពុលដល់អ្នកទទួលទាន គឺក្រុមការងារបានយកសំណាកជាបាយ និងសាច់មាន់ដែលគាត់លក់ទៅក្រសួងសុខាភិបាល ដើម្បីធ្វើវិភាគ រកមេរោគ។
សូមបញ្ជាក់ថា កាលពីម៉ោងប្រហែល ៩ ព្រឹកថ្ងៃទី ១០ សីហា នៅភូមិកំផ្លាក ឃុំបារាយណ៍ ស្រុកស្រីសន្ធរ មានករណីពុលអាហារ(បាយស្រូប)បណ្តាលឱ្យមនុស្សក្មេងចាស់ ប្រុស ស្រីសរុបចំនួន ១៧ នាក់មានអាការឈឺពោះ រាករូស ក្អួតចង្អោរ បន្ទាប់ពីពួកគាត់ជាជនរងគ្រោះបានទទួលទានបាយស្រូបសាច់មាន់ របស់ស្រ្តីអាយុ ៥៥ ឆ្នាំឈ្មោះ លីម ធីតា នៅភូមិជាមួយគ្នា។ ជាមួយនោះជនរងគ្រោះទាំងអស់ត្រូវបានបញ្ជួនទៅកាន់មន្ទីរពេទ្យភ្លាមៗ៕