ដោយៈ គង់ហេង
កំពង់ចាម៖ លោក អ៊ុន ចាន់ដា អភិបាលខេត្តកំពង់ចាម គ្រោងរៀបចំស្ថាបនាជាសំណង់នានា លើទីតាំងផ្ទៃដីទន្លេអុំដែលមានទំហំជិត ៤០ ហិកតា និងពង្រីកផ្លូវជាប់មាត់ទន្លេនេះ គឺប្រែក្លាយជាតំបន់ទេសចរណ៍ដ៏ទាក់ទាញ និងសក្តិសមជាទីក្រុងជាប់ចំណាត់ថ្នាក់ជាផ្ការំដួលបីទង។
លោកអភិបាលខេត្តកំពង់ចាមបានថ្លែងថាៈ គម្រោងអភិវឌ្ឍន៍ទីតាំងទន្លេអុំនេះ គឺនឹងចាប់អនុវត្តនៅឆ្នាំ២០២៤ ឆ្នាំក្រោយ ដោយសាងសង់ជាច្រាំងពីបេតុង ជាកន្លែងអង្គុយជាថ្នាក់ៗ ដូចពហុកីឡដ្ឋានព័ទ្ធជុំវិញ ,សាងសង់ជាវេទិកាតុបតែងលម្អ និងក្នុងផ្ទៃទន្លេអុំទាំងមូលផ្ទុកទឹកយ៉ាងតិចកម្ពស់បីម៉ែត្រ គឺអាចអុំទូកកម្សាន្ត។
លោកបានបន្ថែមថាៈ ក្នុងនោះក៏មានការដាំដើមឈើជុំវិញទន្លេអុំដែរ ជាពិសេសធ្វើការពង្រីកផ្លូវជាតិលេខ៧ចាស់ចាប់ពីរង្វង់មូល ១-៧៩ ដល់ផ្លូវជាតិលេខ៧ថ្មី ជិតរង្វង់មូលនាគព័ន្ធ គឺដើម្បីឱ្យភ្ញៀវចូលមកដល់ចាប់អារម្មណ៍ និងមានការទាក់ទាញ មកលេងទស្សនាកម្សាន្ត សប្បាយ គឺធ្វើយ៉ាងណាឱ្យក្លាយជាទីក្រុងទេសចរណ៍។
ការថ្លែងប្រកាសឱ្យដឹងពីគម្រោងស្ថាបនា ជាសំណង់នៅទីតាំងទន្លេអុំ ដើម្បីឱ្យក្លាយជាតំបន់ទេសចរណ៍របស់លោក អ៊ុន ចាន់ដា អភិបាលខេត្តកំពង់ចាម ធ្វើឡើងនៅក្នុងកិច្ចប្រជុំសាមញ្ញលើកទី ៥១ អាណត្តិទី៣ នៃក្រុមប្រឹក្សាខេត្តកំពង់ចាម ក្នុងសាលាខេត្តនេះកាលពីថ្ងៃទី ១០ សីហាម្សិលមិញ៕
