ដោយៈសុខុម
រតនគិរី៖ ក្មេងៗចំនួន៣នាក់នាំគ្នាទៅឃ្វាលគោ ចៃដន្យក្មេងប្រុសម្នាក់ដើរចំមីនផ្ទុះ បណ្តាលឱ្យដាច់ជើងម្ខាងហើយត្រូវក្រុមគ្រួសារនិងសមត្ថកិច្ចជួយសង្រ្គោះដឹកទៅកាន់មណ្ឌលសុខភាព។ហេតុការណ៍នេះ បានកើតឡើងស្ថិតនៅដីចម្ការអ្នកស្រុកភូមិសោមត្រក់ថ្មី ឃុំសោមធំ ស្រុកអូរយ៉ាដាវ ខេត្តរតនគិរី កាលពីថ្ងៃទី១០ ខែសីហា ២០២៣។
![](https://cambodiaflashnews.com/wp-content/uploads/2021/06/top-banner.gif)
សមត្ថកិច្ចបានឱ្យដឹងថា៖ ក្មេងប្រុសរងគ្រោះឈ្មោះ សេវ លេច អាយុ១១ឆ្នាំ ជនជាតិច្រាយ។ចំណែកម្ចាស់ ចម្ការឈ្មោះ សេវ ឌីន ភេទស្រី នៅចំណុចភ្នំចាកៅ។
មុនពេលកើតហេតុ ក្មេងមានគ្នា៣នាក់បងប្អូននាំគ្នាទៅឃ្វាលគោនៅដីចម្ការស្រ្តីខាងលើនេះ។ ក្រោយកើតហេតុ ក្មេងរងគ្រោះត្រូវបានឪពុកម្ដាយបងប្អូន សាច់ញាតិយករថយន្តសង្រ្គោះបន្ទាន់មណ្ឌលសុខភាពស្រុកអូរយ៉ាដាវ និងបន្តទៅមណ្ឌលសុខភាពស្រុកបរកែវ។
ក្រោយពីមានឧបទ្ទវហេតុផ្ទុះមីន កម្លាំងប៉ុស្តិ៍សហការជាមួយកម្លាំងជំនាញអធិការស្រុក និងកម្លាំងស្នាក់ការប៉េអឹមលេខ៧៨២ប្រចាំនៅភូមិសោមត្រក់ថ្មី ឃុំសោមធំ រួមជាមួយលោកអនុភូមិ បានចុះទៅកន្លែងកើតហេតុហើយធ្វើការសន្និដ្ឋានថាគ្រាប់មីនដែលបង្កឱ្យក្មេងប្រុសម្នាក់រងរបួសនោះទំនងជាសល់តាំងពីសម័យសង្រ្គាម៕