ដោយ៖រតនា
សៀមរាប៖រថយន្តមួយគ្រឿងអ្នកបើកបរស្ថិតក្នុងស្ថានភាពស្រវឹងបានបើកបុកចូលទៅចំហ្វូងមនុស្សជាច្រើននាក់ដែលកំពុងតែប្រារព្ធពិធីជួបជុំសប្បាយរីករាយមួយបានបណ្តាលឲ្យរងរបួសមនុស្ស៥នាក់ ដែលក្នុងនោះមានជនជាតិខ្មែរ២នាក់និងបរទេស៣នាក់។
ហេតុការណ៍ដែលមិនគួរឲ្យកើតឡើងនេះគឺបានកើតឡើងនៅវេលាម៉ោងជិត៣រសៀលថ្ងៃទី៦ ខែសីហា ឆ្នាំ២០២៣ នៅស្រុកស្រីស្នំ ខេត្តសៀមរាប។
ប្រភពព័ត៌មានបានឲ្យដឹងថា នៅរសៀលថ្ងៃទី៦ ខែសីហា ឆ្នាំ២០២៣នេះមានពិធីជួបជុំមួយនៅស្រុកស្រីស្នំដែលមានមនុស្សបានចូលរួមផឹកស៊ីកម្សាន្តសប្បាយជាច្រើននាក់។ក្នុងនោះមានជនជាតិខ្មែរនិងជនជាតិហូឡង់ជាច្រើននាក់។
ប៉ុន្តែនៅពេលកម្មវិធីកំពុងជួបជុំគ្នាសប្បាយនោះ ក៏ស្រាប់តែមានឈ្មោះឡំ ឡុញ ភេទប្រុស អាយុ៤១ឆ្នាំ ជាគ្រូបង្រៀននៅភូមិក្រូចចារ ឃុំប្រីយ៍ ស្រុកស្រីស្នំ ខេត្តសៀមរាបបានបើកបររថយន្តនៅក្នុងស្ថានភាពស្រវឹង ទើបចេញពីកន្លែងកម្មវិធីជាមួយគ្នា បានបុករះចូលចំហ្វូងមនុស្សដែលកំពុងតែឈរបណ្តាលឲ្យរងរបួសចំនួន៥នាក់។
ក្រោយពីហេតុការណ៍នេះបានកើតឡើងគេបានរៀបចំបញ្ជូនអ្នករងរបួសទាំងអស់នោះទៅកាន់មន្ទីរពេទ្យដើម្បីជួយសង្គ្រោះ៕
