ដោយ៖រតនា
ក្រចេះ៖ អ្នកស្រុកប្រមាណជាង៣០០នាក់នៅព្រឹកថ្ងៃទី៥សីហា ឆ្នាំ២០២៣ បាននាំគ្នាទៅដុតបំផ្លាញ ស្នាក់ការបរិស្ថានមួយកន្លែងនៅស្រុកអូរគ្រៀងសែនជ័យ ខេត្តក្រចេះ ដោយមូលហេតុខឹងនឹងមន្រ្តីបរិស្ថាន ប្រចាំការនៅទីនោះចាប់ម៉ាស៊ីនអារឈើរបស់ពូកគាត់។
![](https://cambodiaflashnews.com/wp-content/uploads/2021/06/top-banner.gif)
បើតាមប្រជាពលរដ្ឋបាននិយាយឲ្យដឹងថា មនុស្សប្រមាណជាង៣០០នាក់នោះគឺរស់នៅភូមិស្រែជិះ,ភូមិររៀង និងភូមិអំពក ស្ថិតក្នុងឃុំស្រែជិះ។ មូលហេតុដែលពួកគាត់នាំគ្នាទៅដុតបំផ្លាញនេះ គឺដោយសារ ក្តៅក្រហាយនឹងមន្រ្តីបរិស្ថានបានចុះបង្ក្រាបរណារត្រង់ស៊ីន័រ កាំបិត ពូថៅ របស់ពួកគាត់ដែលទៅអារឈើ យកធ្វើរបងស្រែនិងធ្វើរបងរោងដំាបាយ។
ប៉ុន្តែប្រធានមន្ទីរបរិស្ថានខេត្តក្រចេះ លោក ឆាយ ដួងសាវុធ បានឲ្យដឹងថា ករណីនេះកើតចេញពី ពលរដ្ឋទាំងនោះខឹងសម្បានឹងមន្រ្តីបរិស្ថានបានចុះទៅចាប់ម៉ាស៊ីនរណារយន្ដ១គ្រឿង និងកាំបិត១ដែលបុគ្គលម្នាក់បានទៅអារឈើក្នុងតំបន់ការពារកាលពីថ្ងៃទី២ ខែសីហា ឆ្នាំ២០២៣។
លោកបានបញ្ជាក់ទៀតថា ការដែលពលរដ្ឋលើកគ្នាទៅដុតបំផ្លាញស្នាក់ការបរិស្ថាននោះ មានមេខ្លោងចំនួន២នាក់ ឈ្មោះក្លូ និងម្នាក់ទៀតឈ្មោះ រ៉ា ទី ហើយឈ្មោះរ៉ា ទីនេះ មានតួនាទីជាអនុប្រធានសហគមន៍ព្រៃឈើទៀតផង។ បុគ្គលរូបនេះ ជាអ្នកទៅអារឈើក្នុងតំបន់ការពារនោះតែម្ដង។
លោកបន្ថែមថា ពួកគាត់បានដុតបំផ្លាញស្នាក់ការបរិស្ថាន និងឈើជាវត្តុតាងដែលបង្រ្កាបបានកន្លងមកទាំងអស់ផងដែរ។ប៉ុន្តែបើទោះជាយ៉ាងណាក៏ដោយឥឡូវនេះគេនៅមិនទាន់ឃើញអាជ្ញាធរបានចាត់វិធានការផ្លូវច្បាប់យ៉ាងណានៅឡើយនោះទេ៕