ដោយ៖សុខុម
រតនគិរី៖ សិស្សសាលាបឋមសិក្សាចំនួន៨០៩នាក់នៅក្នុងស្រុកកូនមុំនៃខេត្តរតនគិរី មិនបានទៅចូលរៀនដូចរាល់ថ្ងៃទេនៅព្រឹកថ្ងៃទី២ ខែសីហា ឆ្នាំ២០២៣។
លោកខាត់ សាម៉ាល់ ប្រធានមន្ទីរអប់ខេត្តរតនគិរីបានប្រាប់អ្នកសារព័ត៌មានឲ្យដឹងថា សិស្សសាលាដែលខកខានមិនបានទៅរៀនថ្ងៃនេះគឺមានចំនួន៨០៩នាក់ ក្នុងនោះសិស្សស្រីចំនួន៦៨នាក់ គឺដោយសារពួកគេមានទីលំនៅជាប់នឹងមាត់ទន្លេស្រែកពកនិងជិតដងអូរ។នៅពេលនេះទឹកទន្លេស្រែពកបានវាយលុកលិចផ្លូវមួយចំនួនហើយ។
លោកខាត់ សាម៉ាល់បានបន្ដថា៖សិស្សទាំងនោះរៀននៅសាលាផ្សេងៗពីគ្នាគឺសាលាបឋមសិក្សាស្រែពកតូច សាលាបឋមស្រែពកធំ សាលាបឋមសិក្សានាងដី សាលាបឋមសិក្សាច្របព្រីង ស្ថិតនៅក្នុងឃុំសិរីមង្គលនិងសាលាបឋមសិក្សាភូមិ២ ស្ថិតនៅក្នុងឃុំស្រែអង្គ្រង ស្រុកកូនមុំ ខេត្តរតនគិរី។
លោកសេក ហៃ អភិបាលស្រុកកូនមុំបានប្រាប់ឲ្យដឹងដែរនៅព្រឹកថ្ងៃទី២ខែសីហាថាទឹកទន្លេស្រែពកបានហក់ឡើងលិចផ្លូវនិងលិចស្រែចម្ការរបស់កសិករមួយចំនួនហើយតែមិនទាន់លិចចូលដល់ភូមិរបស់ពលរដ្ឋទេ ប៉ុន្តែវាបានលិចផ្លូវខ្លះហើយ។
លោកអភិបាលស្រុកបានបញ្ជាក់ថា៖ មេឃកំពុងបន្ដធ្លាក់ភ្លៀងធ្វើឲ្យទឹកទន្លេស្រែពកឡើងដល់កម្ពស់១១ម៉ែត្រហើយចំណុចដែលត្រូវប្រកាសអាសន្ននោះគឺកម្ពស់១២,៥០ម៉ែត្រ។ លោកបានចុះណែនាំប្រជាពលរដ្ឋដែលរស់នៅតាមមាត់ទន្លេស្រែពកឲ្យមានការប្រុងប្រយ័ត្នមើលថែកូនតូចៗកុំឲ្យចុះលេងទឹកនិងត្រៀមជម្លៀសប្រជាពលរដ្ឋរកទីទួលសុវត្ថិភាពដោយចាត់ឲ្យមន្ត្រីចុះចល័តមើលជាប្រចាំ៕
