ដោយ៖សុខុម
ព្រៃវែង៖ បុរស២នាក់ត្រូវជាពូនិងក្មួយត្រូវគេប្រទះឃើញស្លាប់នៅក្នុងអណ្តូងទឹកមួយកណ្តាលវាលស្រែកាលពីល្ងាចថ្ងៃទី១ខែសីហា ឆ្នាំ២០២៣ នៅចំណុចវាលស្រែខាងលិចភូមិស្គាក្តី ចម្ងាយ ប្រហែលជិត២គីឡូម៉ែត្រពីផ្ទះអ្នកភូមិ ស្ថិតក្នុងភូមិស្គាក្តី ឃុំព្នៅទី២ ស្រុកស៊ីធរកណ្តាល ខេត្តព្រៃវែង។
![](https://cambodiaflashnews.com/wp-content/uploads/2021/06/top-banner.gif)
សមត្ថកិច្ចបានឱ្យដឹងថា៖ នៅមុនពេលកើតហេតុ បុរសទាំងពីរនាក់បានស៊ីឈ្នួលជីកអណ្ដូងទឹកឱ្យគេ ដើម្បីបូមទឹកដាក់ស្រែ តាំងពីរសៀលរហូតដល់យប់មិនឃើញមកផ្ទះ។ពេលបាត់យូរ អ្នកផ្ទះមកតាមរក ស្រាប់តែឃើញដេកស្លាប់ក្នុងអណ្ដូងទឹកទាំង២នាក់បាត់ទៅហើយ។
ក្រោយពីមានហេតុការណ៍នេះកើតឡើង កម្លាំងនគរបាលស្រុកស៊ីធរកណ្ដាល ចុះអន្តរាគមន៍ធ្វើកោសល្យវិច័យពិនិត្យនៅលើដងខ្លួនសព។
សពទី១ឈ្មោះ ជ្រឿន ដេន អាយុ ៤៣ឆ្នាំ ត្រូវជាក្មួយនិងទី២ ឈ្មោះ ធន់ សារ៉េន អាយុ ៥៤ឆ្នាំ ។អ្នកទាំង ២ មានទីលំនៅ នៅភូមិ-ឃុំកើតហេតុខាងលើ ។
សមត្ថកិច្ចបានបញ្ជាក់ថា៖ នៅជុំវិញកន្លែងកើតហេតុមានអណ្ដូងទឹក ១ រាងរង្វង់ សម្រាប់បូមទឹកដាក់ស្រែ ទំហំមុខកាត់ (អង្កត់ផ្ចិត) ១,២ ម៉ែត្រ និងមានជម្រៅ ៦,៥ ម៉ែត្រ រួមនិងម៉ាស៊ីនបូមទឹកចំនួន១គ្រឿងនៅមាត់អណ្តូង ។
ក្រោយពីពិនិត្យសព មន្រ្តីជំនាញសង្ស័យថា ករណីនេះអាចបណ្តាលមកពីខ្វះខ្យល់អុកស៊ីសែនទើបធ្វើឱ្យពីរនាក់ពូក្មួយស្លាប់៕