ប្រែសម្រួល៖ រតនា
យ៉ាងហោចណាស់ក៏មានមនុស្ស 6 នាក់បានស្លាប់ក្នុងនោះមានកុមារម្នាក់ផងបន្ទាប់ពីការវាយប្រហារដោយកាំជ្រួចរបស់រុស្ស៊ីទៅលើទីក្រុង Kryvyi Rih ភាគកណ្តាលនៃប្រទេសអ៊ុយក្រែនដែលជាស្រុកកំណើតរបស់លោកប្រធានាធិបតី Volodymyr Zelensky ។
ការវាយប្រហារតាមអាកាសរបស់រុស្ស៊ីក៏ត្រូវបានគេរាយការណ៍ផងដែរនៅព្រឹកថ្ងៃអង្គារដោយមន្ត្រីអ៊ុយក្រែនលើទីក្រុងខាគីវភាគឦសាន។
ការវាយប្រហារតាមអាកាសបានកើតឡើងនៅពេលដែលរុស្ស៊ីបានបង្កើនការវាយប្រហារលើអ៊ុយក្រែន ជាការឆ្លើយតបទៅនឹងការប៉ុនប៉ងវាយប្រហារដោយយន្តហោះគ្មានមនុស្សបើកដ្រូនលើទីក្រុងម៉ូស្គូកាលពីថ្ងៃអាទិត្យ នេះបើយោងតាមរដ្ឋមន្ត្រីការពារជាតិរុស្ស៊ីលោក Sergei Shoigu ។
ទន្ទឹមនឹងនោះ ការវាយលុករបស់ទីក្រុង Kyiv ទៅលើការឈ្លានពានរបស់រុស្ស៊ីគឺបានដំណើរការយឺតជាងការរំពឹងទុក ដោយកងទ័ពរុស្ស៊ី មានការតស៊ូយ៉ាងស្វិតស្វាញ ខណៈដែលទាហានអ៊ុយក្រែន ព្យាយាមទម្លុះសមរភូមិមុខ៕