ប្រែសម្រួល៖រតនា
អាជ្ញាធររុស្ស៊ីបាននិយាយថា យន្តហោះគ្មានមនុស្សបើកបានវាយប្រហារអគារមិនមែនលំនៅដ្ឋានចំនួនពីរក្នុងទីក្រុងមូស្គូនៅព្រឹកព្រលឹមថ្ងៃចន្ទ ហើយត្រូវបាន “បង្ក្រាប” ដោយការការពារនៅទីនោះ ដោយពណ៌នាឧបទ្ទវហេតុនេះថាជាការវាយប្រហារ “រារាំង” ។
អភិបាលក្រុងមូស្គូ លោក Sergei Sobyanin បាននិយាយនៅលើ Telegram កាលពីថ្ងៃចន្ទថា ការវាយប្រហារនេះមិនបណ្តាលឱ្យមានការខូចខាតធ្ងន់ធ្ងរ ឬរងរបួសនោះទេ។
ក្រសួងការពារជាតិរុស្ស៊ីបានស្តីបន្ទោសអ៊ុយក្រែនដោយពណ៌នាការវាយប្រហារនេះថាជា “ការវាយប្រហារភេរវកម្មនៃរបបក្រុងគៀវ” ហើយថាយន្តហោះគ្មានមនុស្សបើកពីរគ្រឿងត្រូវបាន “បង្ក្រាប” និងបានធ្លាក់នៅទីក្រុងមូស្គូ។
យោងតាមប្រព័ន្ធផ្សព្វផ្សាយរដ្ឋរបស់រុស្ស៊ី TASS យន្តហោះគ្មានមនុស្សបើកបានវាយប្រហារមជ្ឈមណ្ឌលពាណិជ្ជកម្មខ្ពស់មួយនៅលើវិថី Likhacheva ក្នុងទីក្រុងមូស្គូ។
TASS បានរាយការណ៍ថា កម្ទេចកម្ទីយន្តហោះគ្មានមនុស្សបើក ត្រូវបានរកឃើញនៅលើផ្លូវ Komsomolsky ក្នុងទីក្រុងមូស្គូ កាលពីព្រឹកថ្ងៃចន្ទ។
TASS រាយការណ៍ដោយដកស្រង់ពីនាយកដ្ឋានដឹកជញ្ជូន និងអភិវឌ្ឍន៍ហេដ្ឋារចនាសម្ព័ន្ធផ្លូវនៃទីក្រុងមូស្គូ ចរាចរណ៍នៅលើវិថី Komsomolsky ពីកណ្តាលទីក្រុងមូស្គូឆ្ពោះទៅកាន់តំបន់នេះត្រូវបានបិទ។
CNN មិនអាចផ្ទៀងផ្ទាត់ដោយឯករាជ្យនូវរបាយការណ៍នេះទេ
អ៊ុយក្រែនស្ទើរតែមិនដែលប្រកាសទទួលខុសត្រូវជាសាធារណៈចំពោះការវាយប្រហារដែលបានកើតឡើងនៅលើទឹកដីរុស្ស៊ីក្នុងអំឡុងពេលនៃសង្រ្គាមដែលទីក្រុងមូស្គូបានចាប់ផ្តើមនៅពេលដែលខ្លួនបានឈ្លានពានកាលពីខែកុម្ភៈឆ្នាំមុន។
បរិបទខ្លះ៖ ការវាយប្រហារដែលបានរាយការណ៍កើតឡើងបន្ទាប់ពីមីស៊ីលរុស្ស៊ីបានបំផ្លាញយ៉ាងធ្ងន់ធ្ងរដល់វិហារគ្រិស្តអូស្សូដក់ជាប្រវត្តិសាស្ត្រនៅក្នុងទីក្រុងកំពង់ផែ Odesa ភាគខាងត្បូងនៃប្រទេសអ៊ុយក្រែន ដែលបង្កឱ្យមានកំហឹង និងជំរុញឱ្យប្រធានាធិបតីអ៊ុយក្រែន Volodymyr Zelensky ប្តេជ្ញាសងសឹក។
មន្ត្រីអ៊ុយក្រែនបាននិយាយថា ការវាយប្រហារនៅ Odesa បានសម្លាប់មនុស្សយ៉ាងហោចណាស់ម្នាក់ និងជាច្រើននាក់ទៀតរងរបួស នេះជាការវាយប្រហារចុងក្រោយបំផុតនៅក្នុងទីក្រុងកំពង់ផែ។ ក្រសួងវប្បធម៌របស់ប្រទេសអ៊ុយក្រែនបាននិយាយថា ការវាយប្រហារក៏បានបំផ្លាញអគារប្រវត្តិសាស្ត្រផ្សេងទៀតផងដែរ។
ទាំងនោះរួមមានការវាយប្រហារដោយដ្រូនលើក្រុងមូស្គូកាលពីខែឧសភា ដែលបានបំផ្លាញអគារពីរ និងរបួសមនុស្សពីរនាក់ ដែលអ៊ុយក្រែនបានបដិសេធការជាប់ពាក់ព័ន្ធដោយផ្ទាល់។
កាលពីដើមខែនេះ រុស្ស៊ីបាននិយាយថា ខ្លួនបាន “បំផ្លាញ ឬបន្សាប” យន្តហោះគ្មានមនុស្សបើករបស់អ៊ុយក្រែនចំនួន 5 គ្រឿងនៅក្នុងអ្វីដែលខ្លួនបានពិពណ៌នាថាជា “ការវាយប្រហារភេរវកម្ម” ៕