កែសម្រួល៖ រ៉ាម៉េត
កាលពីថ្ងៃព្រហស្បតិ៍តុលាការអេស្ប៉ាញបាននិយាយថាចៅក្រមទីក្រុងបាសេឡូណាប្រទេសអេស្ប៉ាញបានបើកការស៊ើបអង្កេតជាលើកទីពីរលើករណីចោទប្រកាន់ពីបទក្លែងបន្លំពន្ធដោយ Shakira ដែលជាកំពូលតារាចម្រៀងឈ្នះពានរង្វាន់ Grammy ។
ការិយាល័យសារព័ត៌មាននៃក្រសួងយុត្តិធម៌ Catalonia បាននិយាយនៅក្នុងសេចក្តីថ្លែងការណ៍ថាចៅក្រមស៊ើបអង្កេត Barcelona នៃតំបន់ Esplugues de Llobregat បានបើកការស៊ើបអង្កេតលើបណ្តឹងរបស់រដ្ឋអាជ្ញាប្រឆាំងនឹងតារាចម្រៀង Shakira ចំនួនពីរករណីស្តីពីការក្លែងបន្លំពន្ធកាលពីឆ្នាំ ២០១៨ ។
Shakira កំពុងរង់ចាំការបើកសវនាការលើបទចោទប្រកាន់ថាបានគេចពន្ធចំនួន ១៦.២ លានដុល្លារនៅចន្លោះពីឆ្នាំ ២០១២, ២០១៣ និង ២០១៤ ។
កំពូលតារាចម្រៀងដែលមានដើមកំណើតមកពីកូឡុំប៊ីបច្ចុប្បន្នរស់នៅក្នុងទីក្រុងម៉ៃអាមី មុននេះបានច្រានចោលទាំងស្រុងលើការចោទប្រកាន់ពីបទក្លែងបន្លំពន្ធនៅក្នុងចន្លោះឆ្នាំ ២០១២-២០១៤។ កាលពីថ្ងៃព្រហស្បតិ៍តារាចម្រៀង Shakira បានបញ្ជាក់សាជាថ្មីអំពីភាពស្អាតស្អំរបស់នាង។
ក្រុមហ៊ុនទំនាក់ទំនងសាធារណៈបានធ្វើសេចក្តីថ្លែងការណ៍មួយទៅកាន់អ្នកយកព័ត៌មាន CNN កាលពីថ្ងៃព្រហស្បតិ៍ថា “ដូចដែលShakira ធ្លាប់បានបញ្ជាក់រួចមកហើយថាគាត់តែងតែប្រព្រឹត្តតាមច្បាប់និងក្រោមការណែនាំរបស់អ្នកជំនាញពន្ធបានយ៉ាងល្អបំផុត” “ឥឡូវនេះនាងកំពុងរក្សាភាពស្ងប់ស្ងាត់ដើម្បីផ្តោតលើជីវិតសិល្បៈរបស់នាងនៅទីក្រុង Miami ហើយនាងមានទំនុកចិត្តនៅក្នុងដំណោះស្រាយការបង់ពន្ធរបស់នាង”។
តារាចម្រៀង Shakira នៅមិនទាន់បានទទួលការជូនដំណឹងជាផ្លូវការអំពីការស៊ើបអង្កេតលើកចុងក្រោយនោះទេ ហើយនាងរំពឹងថានឹងត្រូវធ្វើនៅឯផ្ទះរបស់នាងនៅ Miami នេះបើយោងតាមក្រុមអ្នកការពារច្បាប់របស់នាង។
កាលពីខែកក្កដាឆ្នាំ ២០២១ ចៅក្រមនៃតុលាការ Barcelona បានសំរេចថានឹងបើកសវនាការលើករណីរបស់នាងពីបទគេចពន្ធ។ សេចក្តីសម្រេចរបស់តុលាការ Barcelona ដែលទទួលបានដោយ CNN ចៅក្រមស៊ើបអង្កេតបាននិយាយថាចៅក្រមមាន “ភស្តុតាងគ្រប់គ្រាន់” ដើម្បីបើកសវនាការលើករណីគេចពន្ធនៅក្នុងចន្លោះឆ្នាំ ២០១២, ២០១៣ និង ២០១៤ ដែលត្រូវបានចោទប្រកាន់លើរូប នាង Shakira ។
លោក Marco Jesús Juberías ដែលជាចៅក្រមសើបអង្កេតបានអះអាងថា Shakira រស់នៅក្នុងប្រទេសអេស្ប៉ាញអស់រយៈពេល ៣ ឆ្នាំហើយនៅក្នុងឆ្នាំនីមួយៗនាងត្រូវទទួលខុសត្រូវលើការបង់ពន្ធជូនរដ្ឋ។
ប្រព័ន្ធផ្សព្វផ្សាយអេស្បាញបានរាយការណ៍ថា ក្រុមអ្នកការពារច្បាប់របស់ Shakira បានច្រានចោលការចោទប្រកាន់ដោយអះអាងថាលំនៅឋានសំខាន់របស់នាងគឺនៅក្នុង Bahamas ។ ប៉ុន្តែប្រព័ន្ធផ្សព្វផ្សាយក្នុងស្រុកបានរាយការណ៍ថានាងមានផ្ទះនៅក្នុងតំបន់ Barcelona ជាមួយអតីតដៃគូរបស់នាងគឺ Gerard Pique ដែលជាអតីតខ្សែការពារបាល់ទាត់របស់ FC Barcelona ។
Pique និង Shakira ដែលមានកូនពីរនាក់ជាមួយគ្នាបានប្រកាសលែងលះគ្នានៅខែមិថុនា ឆ្នាំ ២០២២។
ចៅក្រមសើបអង្កេតបានអះអាងថានាង Shakira និងទីប្រឹក្សាហិរញ្ញវត្ថុរបស់នាងដែលមានឈ្មោះក្នុងសំណុំរឿងបានប្រើប្រាស់ក្រុមហ៊ុនជាបន្តបន្ទាប់នៅក្នុងកន្លែងបង់ពន្ធនៅខាងក្រៅប្រទេសដើម្បីព្យាយាមបិទបាំងប្រភពចំណូលរបស់នាងនៅក្នុងចន្លោះប៉ុន្មានឆ្នាំកន្លងមកនោះ៕
ប្រភព៖ CNN