ដោយ៖ កំចាយ
![](https://cambodiaflashnews.com/wp-content/uploads/2024/04/cropped-Header-Middle-footer.png)
កំពត÷ រថយន្តបែនដឹកដីបានបុករះម៉ូតូ២គ្រឿងពេលកំពុងបើកបរបញ្ច្រាសទិសគ្នាបណ្តាលឲ្យយុវជនម្នាក់បាត់បង់ជីវិត និង៣នាក់ទៀតរងរបួស។ ហេតុការណ៍នេះបានកើតឡើងកាលពីល្ងាចថ្ងៃទី១១ ខែកក្កដា ឆ្នាំ២០២៤ ស្ថិតក្នុងភូមិត្រពាំងសង្កែ ឃុំត្រពាំងសង្កែ ស្រុកទឹកឈូ។
លោកវរសេនីយ៍ឯក សូ ប៊ុនធឿន អធិការនគរបាលស្រុកទឹកឈូបានប្រាប់ឲ្យដឹងថា យុវជនដែលបានស្លាប់ឈ្មោះ ពួយ សំបូរ អាយុ ១៦ឆ្នាំ មានទីលំនៅភូមិត្រពាំងសង្កែ ឃុំត្រពាំងសង្កែ ស្រុកទឹកឈូ ខេត្តកំពត របួសធ្ងន់។ ចំណែកអ្នករងរបួស រួមមាន ១. ឈ្មោះ សុផាន់ ណារ៉ាត់ អាយុ ២១ឆ្នាំ។ ២. ឈ្មោះ តឿន ដារ៉េត អាយុ ២៣ឆ្នាំ។ ទាំង២នាក់រស់នៅភូមិស្នំប្រាំពីរ ឃុំម៉ាក់ប្រាង ស្រុកទឹកឈូ ខេត្តកំពត។ ៣. ឈ្មោះ ឡេី សុខមករា អាយុ ២២ឆ្នាំ រស់នៅភូមិបឹងទូក សង្កាត់បឹងទូក ក្រុងបូកគោ ខេត្តកំពត។
លោកអធិការបានរៀបរាប់ថា កាលពីវេលាម៉ោង៥ និង១០នាទីល្ងាចថ្ងៃទី១១ ខែកក្កដា មានករណីគ្រោះថ្នាក់ចរាចរមួយបានកេីតឡេីងនៅលើផ្លូវលេខ១៣៣១ ស្ថិតក្នុងភូមិត្រពាំងសង្កែ ឃុំត្រពាំងសង្កែ រវាងរថយន្ត និងម៉ូតូ២គ្រឿងពេលកំពុងបើកបរបញ្ច្រាសទិសគ្នា។ មុនគ្រោះថ្នាក់កើតឡើង គេឃើញរថយន្តបែនដឹកដីពាក់ផ្លាកលេខចង្កូតស្តាំPP-2716 បើកបរយ៉ាងលឿនក្នុងទិសដៅពីកេីតទៅលិច។ លុះមកដល់ចំណុចកើតហេតុ រថយន្តបានបុករះម៉ូតូ២គ្រឿងបើកមកពីមុខបណ្តាលឲ្យយុវជនម្នាក់រងរបួសធ្ងន់ និង៣នាក់ទៀតរងរបួសស្រាល។ ភ្លាមៗ អ្នកបើកបររថយន្តបានរត់គេចបាត់ដោយបន្សល់ទុករថយន្តនៅនឹងកន្លែងកើតហេតុ។
លោក សូ ប៊ុនធឿនបានបញ្ជាក់ថា ក្នុងស្ថានភាពបែបនេះ សមត្ថកិច្ចក៏បានទំនាក់ទំនងហៅរថយន្តដើម្បីដឹកជនរងគ្រោះទៅកាន់មន្ទីរពេទ្យដើម្បីសង្គ្រោះបន្ទាន់ តែដោយសារស្ថានភាពរបួសធ្ងន់ធ្ងរពេក យុវជនម្នាក់ក៏បានបាត់បង់ជីវិតតែម្តង៕