ដោយ៖សហការី
ភ្នាក់ងារឧទ្យានជាតិបានប្រាប់ឲ្យដឹងថាមានស្ត្រីម្នាក់អាយុប្រហែល ២៦ ឆ្នាំមកពីទីក្រុង Boulder រដ្ឋ Colorado បានស្លាប់ក្រោយពីបានធ្លាក់ពីលើភ្នំក្នុងរយៈកម្ពស់ប្រហែល ៥០០ហ្វីតប្រហែលជាង១៥០ម៉ែត្រ ក្នុងខណៈពេលដែលគាត់បានឡើងភ្នំតែម្នាក់ឯងនៅឧទ្យានជាតិ Rocky Mountain កាលពីថ្ងៃអាទិត្យ។
ភ្នាក់ងាឧទ្យានជាតិបាននិយាយកាលពីថ្ងៃចន្ទថា ដៃគូឡើងភ្នំជាមួយស្ត្រីមិនស្គាល់អត្តសញ្ញាណនេះមានអាយុប្រហែល ២៧ ឆ្នាំបានទូរសព្ទទៅកាន់ក្រុមអនុរក្សឧទ្យានជាតិដើម្បីរាយការណ៍អំពីព្រឹត្តិការណ៍ដែលបានកើតឡើងចំពោះដៃគូរបស់ខ្លួនដែលបានធ្លាក់ពីលើភ្នំ Blitzen Ridge ក្នុងជួភ្នំ Ypsilon បណ្តាលឲ្យបាត់បង់ជីវិតនៅនឹងកន្លែង ។
ការឡើងភ្នំក្នុងប្រភេទ Free-soloing គឺជាបច្ចេកទេសឡើងភ្នំទោលតែម្នាក់ឯងគត់ដ៏ប្រថុយប្រថានបំផុតមួយ ដែលអ្នកឡើងភ្នំមិនមានខ្សែរ៉កជាជំនួយ ឬឧបករណ៍ការពារសុវត្ថិភាពនោះទេដែលធ្វើឲ្យពួកគេធ្លាក់ពីលើភ្នំដោយគ្នានឧបករណ៍ការពារសុវត្ថិភាព។
ភ្នាក់ងារឧទ្យានជាតិបាននិយាយថា ក្រុមរុករក និងក្រុមជួយសង្គ្រោះបានទៅដល់ទីតាំងរបស់ដៃគូឡើងភ្នំដែលមិនរងគ្រោះថ្នាក់កាលពីយប់ថ្ងៃអាទិត្យ ទោះបីជាទីតាំងរបស់គាត់តម្រូវឲ្យមានជំនួយតាមផ្លូវអាកាសពីឆ្មាំជាតិក្នុងរដ្ឋ Colorado ក៏ដោយក៏ក្រុមរុករក និងក្រុមជួយសង្គ្រោះបានប្រើឧទ្ធម្ភាគចក្រពីមូលដ្ឋានទ័ពអាកាស Buckley ដើម្បីយកចេញពីកន្លែងដ៏គ្រោះថ្នាក់។
នៅព្រឹកថ្ងៃចន្ទ ក្រុមរុករក និងជួយសង្គ្រោះបានឡើងភ្នំនៅតំបន់ក្បែបឹង Ypsilon ដើម្បីរៀបចំយកសាកសពស្ត្រីរងគ្រោះដឹកតាមឧទ្ធម្ភាគចក្រ។ បន្ទាប់មកសាកសពត្រូវបានគេដឹកទៅកាន់កន្លែងផ្សេងទៀតក្នុងឧទ្យានជាតិ ហើយបានបញ្ជូនទៅកាន់ការិយាល័យត្រួតពិនិត្យដើម្បីធ្វើកោសលវិច័យ ដែលនឹងកំណត់ពីមូលហេតុនៃការស្លាប់របស់ស្រ្តីរងគ្រោះ។
នេះជាការស្លាប់លើកទីពីរដែលគេបានរាយការណ៍នៅក្នុងខែនេះនៅក្នុងឧទ្យានជាតិ Rocky Mountain ។ មានបុរសអាយុ ២៥ ឆ្នាំម្នាក់បានស្លាប់កាលពីសប្តាហ៍មុនបន្ទាប់ពីបានដួលហើយធ្លាក់ចូលក្នុងជ្រោះនៅឯទឹកធ្លាក់ West Creek ក្នុងឧទ្យានជាតិ៕
ប្រភព៖ CNN