ដោយ៖តុលា
នាវាចម្បាំងយក្សអាម៉េរិកដើរដោយថាមពលនុយក្លេអ៊ែរ នឹងមកដល់កំពង់ផែប្រទេសវៀតណាមនៅថ្ងៃអាទិត្យសប្តាហ៍នេះ ក្នុងដំណើរទស្សនកិច្ចដ៏កម្រនៅអាស៊ី អាគ្នេយ៍។
នាវាផ្ទុកយន្តហោះដើរដោយថាមពលនុយក្លេអ៊ែរអាម៉េរិកឈ្មោះ Ronald Reagan នឹងឈប់នៅកំពង់ផែ Danang ភាគកណ្តាលប្រទេសវៀតណាមនៅថ្ងៃអាទិត្យទី២៥ ខែ មិថុនា ក្នុងដំណើរទស្សនកិច្ចដ៏កម្រមួយក្នុងនាមជាកងជើងទឹកកំពូលអាម៉េរិកមកកាន់ប្រទេសអាស៊ីអាគ្នេយ៍ ខណៈដែលភាពតានតឹងជាមួយទីក្រុងប៉េកាំងនៅសមុទ្រចិនខាងត្បូងនៅតែកើនឡើងខ្ពស់។
បើតាមអ្នកនាំពាក្យក្រសួងការបរទេសវៀតណាមបាននិយាយ ត្រូវប្រព័ន្ធផ្សព្វផ្សាយក្នុងស្រុករាយការណ៍ នាវានេះនឹងមកដល់នៅរសៀលថ្ងៃអាទិត្យ ហើយស្នាក់នៅទីក្រុង Danang រហូតដល់ថ្ងៃទី 30 ខែមិថុនា តែព័ត៌មានលម្អិតមកមានការងារអ្វី អ្នកនាំពាក្យមិនបានឆ្លើយតបនឹងសំណើសុំអត្ថាធិប្បាយរបស់រ៉យទ័រនោះទេ។
ដំណើរទស្សនកិច្ចរបស់នាវា USS Ronald Reagan មកអាស៊ីអាគ្នេយ៍គឺជាការមកដល់កម្រ តែក៏ជាលើកទីបីដែរហើយសម្រាប់នាវាផ្ទុកយន្តហោះរបស់សហរដ្ឋអាម៉េរិកចាប់តាំងពីបញ្ចប់សង្រ្គាមវៀតណាម។ នាវាអាម៉េរិក USS Theodore Roosevelt បានឈប់នៅប្រទេសវៀតណាមក្នុងឆ្នាំ ២០២០ ដើម្បីប្រារព្ធខួប ២៥ ឆ្នាំចាប់តាំងពីសង្គ្រាមវៀតណាមបានបញ្ចប់នៅឆ្នាំ ១៩៧៥ ។
នៅឆ្នាំនេះផងដែរ ទីក្រុងវ៉ាស៊ីនតោនកំពុងស្វែងរកការធ្វើឱ្យប្រសើរឡើងនូវទំនាក់ទំនងផ្លូវការរបស់ខ្លួនជាមួយវៀតណាម ចំពេលមានជម្លោះជាញឹកញាប់របស់ទីក្រុងហាណូយជាមួយទីក្រុងប៉េកាំងអំពីព្រំដែននៅសមុទ្រចិនខាងត្បូង ទាំងដែលប្រទេសចិនបានទាមទារដែនទឹកស្ទើរតែទាំងស្រុង រួមទាំងតំបន់សេដ្ឋកិច្ចផ្តាច់មុខរបស់វៀតណាម និងប្រទេសដទៃទៀតនៅក្នុងតំបន់៕
ប្រភព៖ REUTERS