ដោយ៖តុលា
សីតុណ្ហភាពក្នុងទីក្រុងប៉េកាំង បានកើនឡើងលើសពី ៤០អង្សាសេនៅថ្ងៃព្រហស្បតិ៍នេះ ដែលជាលើកដំបូងហើយ ចាប់តាំងពីឆ្នាំ ២០១៤ ខណៈដែលរដ្ឋធានីចិន បានព្រមានពីអាកាសធាតុក្តៅខ្លាំង នៅចុងសប្តាហ៍ជាមួយនឹងការត្រឡប់មកវិញនៃរលកកំដៅ ដែលបានបោកបក់ភាគខាងជើងប្រទេសចិន កាលពីមួយសប្តាហ៍មុន។
ស្ថានីយអាកាសធាតុនៅជាយក្រុងប៉េកាំងភាគខាងត្បូងបានកត់ត្រាសីតុណ្ហភាព ៤០.១អង្សាសេ នៅម៉ោង ១ និង២៥នាទីរសៀលតាមម៉ោងក្នុងស្រុក។ យោងតាមការិយាល័យអាកាសធាតុក្រុង ការឡើងកម្តៅលើស ៤០អង្សាសេនេះ គឺជាកំណត់ត្រាអាកាសធាតុក្តៅមិនធ្លាប់ចាប់តាំងពីថ្ងៃទី ២៩ ខែឧសភា ឆ្នាំ ២០១៤។
ចិនបានបង្កើនការជូនដំណឹងពណ៌ទឹកក្រូច ដែលជាការព្រមានអាកាសធាតុខ្ពស់បំផុតទីពីរដោយនិយាយថាសីតុណ្ហភាពអាចកើនឡើងដល់ ៣៩ អង្សារសេបន្តជាប់គ្នានៅតំបន់ភាគច្រើននៃទីក្រុងចាប់ពីថ្ងៃព្រហស្បតិ៍ដល់ថ្ងៃសៅរ៍។
ទីក្រុងប៉េកាំង ធានជីន ហឺប៉ី និងសានទុង នៅភាគខាងជើង និងភាគខាងកើតប្រទេសចិន ត្រូវបានរងនូវការវាយប្រហារពីរលកកំដៅកាលពីសប្តាហ៍មុន ដែលជំរុញឱ្យអាជ្ញាធរក្នុងតំបន់បង្កើនកិច្ចខិតខំប្រឹងប្រែងដើម្បីការពារដំណាំ ធានាសុវត្ថិភាពរបស់អ្នកទេសចរ និងផ្អាកការងារក្រៅកំឡុងពេលក្តៅបំផុតនៃថ្ងៃ៕
ប្រភព៖ REUTERS