ដោយ ៖Anthony Zurcher
ជាសមាជិកជាន់ខ្ពស់បំផុតនៃរដ្ឋបាលរបស់លោកប្រធានាធិបតី Joe Biden បានមកដល់ទីក្រុងប៉េកាំងកាលពីថ្ងៃអាទិត្យ។
ក្រសួងការបរទេសរបស់សហរដ្ឋអាម៉េរិកបានថ្លែងថានៅក្នុងកិច្ចប្រជុំពីរថ្ងៃជាមួយមន្ត្រីនៅក្នុងប្រទេសចិន លោក Antony Blinken រដ្ឋមន្ត្រីការបរទេសអាម៉េរិកបានជួបពិភាក្សាការងារទ្វេភាគី “ដោយត្រង់ទៅត្រង់មក” ជាមួយសមភាគីចិន ។
សេចក្តីថ្លែងការណ៍បានបញ្ជាក់បន្ថែមថា លោក Blinken បានទទូចស្នើសុំឲ្យមានការបើកចំហទំនាក់ទំនងដើម្បីរក្សាចំណងការទូតរវាងប្រទេសទាំងពីរ។
នៅក្នុងរយៈពេលជិតប្រាំឆ្នាំកន្លងមកនេះជាដំណើរទស្សនកិច្ចរបស់អ្នកការទូតកំពូលសអាម៉េរិកទៅកាន់ប្រទេសចិនជាលើកដំបូង។
Blinken បានគ្រោងទុកដំណើរទស្សនកិច្ចតាំងពីខែកុម្ភៈក៏ប៉ុន្តែត្រូវបានលុបចោលទៅវិញក្រោមមូលហេតុប៉េងប៉ោងបង្ហោះរបស់ចិនដែលបានហោះហើរនៅក្នុងទឺកដីនៃដែនអាកាសរបស់អាមេរិកដែលគេសង្ស័យថាប៉េងប៉ោងចារកម្ម ។
ក្រុមមន្ត្រីអាម៉េរិកនិយាយថា គោលបំណងសម្រាប់កិច្ចចរចាជាមួយនឹងក្រុងប៉េកាំងគឺការថែរក្សាទំនាក់ទំនងការទូតឲ្យមានស្ថិរភាពដែលមានសភាពតានតឹងយ៉ាងខ្លាំងនៅក្នុងពេលកន្លងមកនេះ។
នៅលើបណ្តាញផ្សព្វផ្សាយរដ្ឋចិនបាននិយាយថាលោក Qin Gang រដ្ឋមន្ត្រីការបរទេសចិនបានប្រាប់សមភាគីអាម៉េរិក លោក Blinken ថាប្រទេសចិននឹងប្តេជ្ញាកសាងទំនាក់ទំនងរវាងចិននឹងអាម៉េរិកឲ្យមានស្ថិរភាពល្អប្រសើឡើងវិញដែលគេអាចប៉ាន់ប្រមាណថាវាស្ថិតនៅក្នុងលក្ខណស្ថាបនាជាមួយនឹងសហរដ្ឋអាម៉េរិក។ ក្រុមមន្ត្រីអាម៉េរិកបាននិយាយថា លោករដ្ឋមន្ត្រីការបរទេសចិនបានយល់ព្រមទៅធ្វើដំណើរទស្សនកិច្ចនៅទីក្រុងវ៉ាស៊ីនតោនដើម្បីពិភាក្សាលើបញ្ហានេះ។
បណ្តាញផ្សព្វផ្សាយរដ្ឋចិនបាននិយាយថា លោក Qin បាននិយាយសំដៅទៅលើបញ្ហាតៃវ៉ាន់ថាគឺវា អាចនឹបង្កឲ្យមាន “ហានិភ័យដ៏ផុយស្រួយបំផុត” ចំពោះការរក្សាស្ថិរភាពទំនាក់ទំនងរវាងចិននឹងអាម៉េរិក ហើយលោកក៏បានគូសបញ្ជាក់ថាបញ្ហាតៃវ៉ាន់ជា “បញ្ហាដ៏ចំបងរបស់ចិន” ។
ប្រទេសចិនយល់ច្បាស់ណាស់ចំពោះតៃវ៉ាន់ដែលប្រកាន់យកការគ្រប់គ្រងដោយខ្លួនឯងដែលចិនចាត់ទុកថាជាខេត្តបំបែកខ្លួនដែលនឹងស្ថិតនៅក្រោមការគ្រប់គ្រងរបស់ទីក្រុងប៉េកាំងនាពេលខាមុខ។ ក៏ប៉ុន្តែតៃវ៉ាន់គិតថាមេដឹកនាំនឹងរដ្ឋធម្មនុញ្ញរបស់ខ្លួនគឺវាខុសពីចិនដីគោក។ លោក Joe Biden ប្រធានាធិបតីអាមេរិក បានបញ្ជាក់កាលពីឆ្នាំមុនថាសហរដ្ឋអាម៉េរិកនឹងការពារតៃវ៉ាន់ប្រសិនបើមានការវាយប្រហារណាមួយពីប្រទេសចិន។
លោក Qin បានទទួលស្វាគមន៍លោក Blinken កាលពីព្រឹកថ្ងៃអាទិត្យនៅឯសណ្ឋាគាររដ្ឋ Diaoyutai ដែលជាកន្លែងដ៏ប្រណីតសម្រាប់ទទួលភ្ញៀវដែលជាឥស្សរជនមកទស្សនា។
ឥស្សរជនទាំងពីរបានចាប់ដៃគ្នាក្នុងខណៈពេលឈរនៅចំពីមុខទង់ជាតិរៀងៗខ្លួនក្រោយមកក៏បានចូលអង្គុយរួមជាមួយគណៈប្រតិភូនៅជុំវិញតុដ៏វែងដើម្បីចាប់ផ្តើមកិច្ចពិភាគ្សា។
កិច្ចស្វាគមន៍មានលក្ខណៈស៊ីជម្រៅដែលបានគូសបញ្ជាក់ពីការវិវឌ្ឍន៏ដ៏រសើបលើទំនាក់ទំនងរវាងមហាអំណាចទាំងពីរក្នុងប៉ុន្មានឆ្នាំថ្មីៗនេះ។
- មានបញ្ហាជាអាទិភាភចំនួនបីចំណុចសំខាន់ៗនៅក្នុងកិច្ចពិភាក្សារវាងអាម៉េរិកនិងចិន
ភាគីអាម៉េរិកបានវាយតំលៃអំពីការរំពឹងទុកសម្រាប់ការធ្វើដំណើរទស្សនកិច្ចនេះក្នុងកំរឹតមួយទាបបំផុតដូចដែលភាគីទាំងពីរបានបញ្ជាក់ថាគេមិនសូវរំពឹងថាអាចមានច្រកចេញលើដំណោះស្រាយណាមួយនោះទេ។
បញ្ហាសង្រ្គាមនៅអ៊ុយក្រែន បញ្ហាជម្លោះពាណិជ្ជកម្មលើបច្ចេកវិទ្យាកុំព្យូទ័រទំនើប ការរីករាលដាលគ្រឿងញៀន fentanyl នៅសហរដ្ឋអាម៉េរិក និងការរំលោភសិទ្ធិមនុស្ស គឺជាប្រធានបទដ៏ក្តៅគគុកទាំងអស់ដែលអាម៉េរិករំពឹងថានឹងត្រូវដាក់លើតុពិភាក្សា។
ក្រុមមន្ត្រីចិនមានប្រតិកម្មចំពោះដំណើរទស្សនកិច្ចរបស់លោក Blinken ដោយចោទសួរថា តើអាម៉េរិកមានឆន្ទៈស្មោះត្រង់ដើម្បីកែលម្អទំនាក់ទំនងដែរឬទេ។
គេនៅមិនទាន់ដឹងទេថាលោក Blinken នឹងជួបលោក Xi Jinping ឬក៏យ៉ាងណានោះទេ។
ចាប់តាំងពីលោកប្រធានាធិបតី Joe Biden បានឡើងកាន់អំណាចក្នុងខែមករា ឆ្នាំ ២០២១ លោក Blinken គឺជាមន្ត្រីជាន់ខ្ពស់បំផុតរបស់អាម៉េរិក ដែលមកបំពេញទស្សនកិច្ចនៅប្រទេសចិន ។
លោក Blinken បានប្រាប់អ្នកយកព័ត៌មានកាលពីថ្ងៃសុក្រថា”ការប្រកួតប្រជែងជាមួយប្រទេសចិនមិនអាចក្លាយទៅជាជម្លោះនោះទេ ប្រសិនបើយើងធ្វើឱ្យវាប្រាកដក្នុងការប្រាស្រ័យទាក់ទងជាមួយគ្នា” ។
លោកសង្ឃឹមថានឹងមានគម្រោងជួបលោកប្រធានាធិបតី Xi នាពេលខាងមុខប៉ន្មានខែទៀត។
ជំនួបរវាងប្រធានាធិបតី Biden និង Xi Jinping នៅកោះបាលីក្នុងខែវិច្ឆិកា បានបន្ធូរបន្ថយភាពជាប់គាំងទំនាក់ទំនងរវាងចិននឹងអាម៉េរិកដែលជាហានិភ័យឈានទៅរកសង្រ្គាមត្រជាក់សាជាថ្មីម្តងទៀត ប៉ុន្តែចាប់តាំងពីឧបទ្ទវហេតុប៉េងប៉ោងចារកម្មទំនាក់ទំនងកម្រិតខ្ពស់រវាងមេដឹកនាំទាំងពីរគឺកម្រនឹងកើតឡើងខ្លាំងណាស់៕
ប្រភព ៖ BBC