ឆ្មាំសមុទ្រហ្វីលីពីន (PCG) បាននិយាយថា សាឡង់ដែលមានមនុស្សប្រហែល ១២០ នាក់នៅលើនោះបានឆាបឆេះកាលពីព្រឹកថ្ងៃអាទិត្យ ទី១៨ ខែមិថុនា ចេញពីខេត្ត Bohol ភាគកណ្តាលនៃប្រទេសហ្វីលីពីន។
ស្ថានីយឆ្មាំឆ្នេរសមុទ្រក្នុងទីក្រុង Cebu បានប្រាប់ស៊ីនហួថា អ្នកដំណើរ និងនាវិកទាំងអស់នៅលើសឡង់នោះម្នាក់ៗភ័យព្រលឹងចុងសក់ តែសំណាងល្អពួកគេត្រូវបានជួយសង្គ្រោះដោយសុវត្ថិភាព។ PCG នៅទីក្រុងម៉ានីល ក្រោយមកបានបញ្ជាក់ពីព័ត៌មាននេះ។
អ្នកនាំពាក្យ PCG លោក Armando Balilo បាននិយាយថា ភ្លើងបានឆាបឆេះ M/V Esperanza Star នៅម៉ោងប្រហែល 4:30 នាទីព្រឹក ម៉ោងក្នុងស្រុក ចេញពីកោះ Panglao ខណៈដែលវាចូលទៅជិតកំពង់ផែ Tagbilaran City ។ ដំបូងឡើយ លោក Balilo បាននិយាយថា អ្នកដំណើរ និងនាវិកពី ៥៥ ទៅ ៦៥នាក់ បាននៅលើសាឡង់នោះ។
ស្ថានីយ PCG នៅទីក្រុង Bohol បាននិយាយនៅក្នុងការបង្ហោះតាមប្រព័ន្ធផ្សព្វផ្សាយសង្គមថា សាឡង់បានដឹកអ្នកដំណើរ និងនាវិកយ៉ាងហោចណាស់ 120 នាក់ នៅពេលដែលភ្លើងបានឆាបឆេះវា។
PCG បានចំណាយពេលជាង ៥ ម៉ោងដើម្បីពន្លត់ភ្លើង។ PCG កំពុងពិនិត្យរកមូលហេតុនៃការឆេះនេះ។ គ្រោះថ្នាក់សាឡង់គឺជារឿងធម្មតាទេនៅក្នុងប្រទេសហ្វីលីពីន ជាប្រទេសប្រជុំកោះមួយនៅអាស៊ីអាគ្នេយ៍៕