ដោយ៖រតនា
![](https://cambodiaflashnews.com/wp-content/uploads/2021/06/top-banner.gif)
ភ្នំពេញ ៖ ស្ត្រីអាណិកជនខ្មែរម្នាក់រស់នៅប្រទេសនូវែលសេឡង់ កាលពីថ្ងៃទី១១ ខែមិថុនា ឆ្នាំ២០២៣ ត្រូវបានកម្លាំងសមត្ថកិច្ចកងរាជអាវុធហត្ថរាជធានីភ្នំពេញ នាំខ្លួនឡើងតុលាការពាក់ព័ន្ធនឹងការចោទប្រកាន់ពីបទឆបោក និងប្រើប្រាស់ឯកសារក្លែង ហើយរហូតដល់ថ្ងៃ១៣ ខែមិថុនា២០២៣ កំពុងសាកសួរនៅឡើយ។
សមត្ថកិច្ចបានបញ្ជាក់ថា ស្ត្រីរូបនោះឈ្មោះ ហេង ស៊ូសាន អាយុ២៦ ឆ្នាំ មុខរបរជាបុគ្គលិកក្រុមហ៊ុន RHF STORE លក់ថ្មម៉ាប មានស្រុកកំណើតនៅខេត្តកំពង់ចាម ទីលំនៅសព្វថ្ងៃរស់នៅប្រទេសនូវែលសេឡង់ ។
ជនសង្ស័យបានរងនូវការចោទប្រកាន់ថា បានទទួលយកប្រាក់ចំនួន ៦៤៤៦៤ ដុល្លារអាម៉េរិក ដើម្បីរត់ការនាំកូនដើមបណ្តឹងចេញទៅរៀននៅប្រទេសអូស្ត្រាលី តែមិនបានសម្រេច ហើយក៏ស៊ីដាច់ប្រាក់នោះ ។
សំណុំរឿងខាងលើនេះបានស្ថិតនៅលោក សំម ឬទ្ធីវាសនា ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ បើកការស៊ើបសួរ ដែលការសាកសួរនោះត្រូវបានបញ្ចប់នៅរសៀលថ្ងៃទី១២ ខែមិថុនា នេះហើយ ប៉ុន្តែដោយផុតម៉ោងការងាររដ្ឋបាល តំណាងអយ្យការបានផ្ញើស្រ្តីជាជនសង្ស័យទៅសមត្ថកិច្ចវិញ តម្រូវឲ្យនាំទៅបន្តនីតិវិធីនៅព្រឹកថ្ងៃទី១៣មិថុនា៕